ବାରଙ୍ଗ,୨୧ା୩ (ଡି.ଏନ୍.ଏ.): ରାଜ୍ୟରେ କରୋନାକୁ ନେଇ ଭୟର ବାତାବରଣ ସୃଷ୍ଟି ହୋଇଥିବାବେଳେ ନନ୍ଦନକାନନରେ ଜୀବଜନ୍ତୁମାନଙ୍କ ମୃତ୍ୟୁହାର କମିବାର ନଁ। ଧରୁ ନାହିଁ। ଗତ ବୁଧବାରଠାରୁ ଶୁକ୍ରବାର ୩ଦିନ ମଧ୍ୟରେ ୧୨ଟି ଜନ୍ତୁଙ୍କ ମୃତ୍ୟୁ ଘଟିଥିବାବେଳେ ୯ଟି ଜନ୍ମ ଗ୍ରହଣ କରିଛନ୍ତି। ମୃତ୍ୟୁ ନେଇ ବନ୍ୟଜନ୍ତୁମାନଙ୍କ ମଧ୍ୟରେ ହରିଣମାନଙ୍କ ସଂଖ୍ୟା ଅଧିକ ଥିବା ଜଣାପଡିଛି। ତେବେ ଜନ୍ମ ଅପେକ୍ଷା ମୃତ୍ୟୁ ପରିମାଣ ବଢିବାରେ ଲାଗିଛି। ବୁଧବାର ନନ୍ଦନକାନନର ଅନ୍ୟତମ ଆକର୍ଷକ କଲରାପତରିଆ ବାଘର ମୃତ୍ୟୁ ଘଟିଛି। ଏହିଦିନ ୬୮ନଂ ଏନକ୍ଲୋଜରରେ ଥିବା ଚାରୋଟି ଚିତ୍ରାହରିଣ, ୪୫ସି ଏନ୍କ୍ଲୋଜରରେ ଥିବା ଗୋଟିଏ କୁଜିହରିଣରର ମୃତ୍ୟୁ ହୋଇଛି। ଏହିଦିନ ଜନ୍ମ ପରିମାଣ ମଧ୍ୟ ୯ଟି ରହିଛି। ସେଥିମଧ୍ୟରେ କ୍ୱାରାଣ୍ଟାଇନରେ ଥିବା ଓ ଏନକ୍ଲୋଜରରେ ଥିବା ବିଲୁଆ ୭ଟି ଛୁଆ ଜନ୍ମ କରିଛି ଓ କଟାସ ଦୁଇଟି ଛୁଆ ଜନ୍ମ ଦେଇଛି। କିନ୍ତୁ ଗତ୧୨ ତାରିଖଠାରୁ ହରିଣ ଜାତୀୟ ପ୍ରାଣୀମାନଙ୍କର ମୃତ୍ୟୁର ତାଣ୍ଡବ ନନ୍ଦନକାନନରେ ଦେଖାଦେଇଛି। ଦିନକୁଦିନ ମୃତ୍ୟୁହାର ବୃଦ୍ଧିପାଇବାରେ ଲାଗିଥିବାର ଦେଖିବାକୁ ମିଳିଛି। ଗୁରୁବାର ଚିତ୍ରାହରିଣ ଦୁଇ, ଗୋଟିଏ କୁଜିହରିଣ ଓ ଶୁକ୍ରବାର ତିନଟି ଚିତ୍ରାହରିଣ ମୃତ୍ୟୁ ଘଟଣା ଜନ୍ତୁବିଭାଗ ଦାୟିତ୍ୱରେ ଥିବା ଅଧିକାରୀଙ୍କ ପାଇଁ ମୁଣ୍ଡବିନ୍ଧାର କାରଣ ସାଜିଛି।
