ଧାମନଗର, ୧୩।୮ (ଡି.ଏନ.ଏ.)- ଭଦ୍ରକ ଜିଲା ଧାମନଗର ବ୍ଲକ ଧୂଷୁରୀ ଥାନା ଅଧୀନ ଗୋଡ଼ିପୋଖରୀ ସୟଦଜାଫର ଗ୍ରାମର ରିତାଞ୍ଜଳି ମଳିକ ନାମକ ଜଣେ ନବବିବାହିତା ମହିଳାଙ୍କ ମୃତଦେହ ଝୁଲନ୍ତା ଅବସ୍ଥାରେ ପୋଲିସ ସୋମବାର ଉଦ୍ଧାର କରିଛି। ଯୌତୁକ ପାଇଁ ରିତାଞ୍ଜଳିଙ୍କୁ ହତ୍ୟା କରାଯାଇଥିବା ବାପଘର ପକ୍ଷରୁ ଧୂଷୁରୀ ଥାନାରେ ଅଭିଯୋଗ କରାଯାଇଛି। ଅଭିଯୋଗ ଆଧାରରେ ପୋଲିସ ଯୌତୁକଜନିତ ହତ୍ୟା ମାମଲା(ନଂ.୧୫୨/୧୯) ରୁଜୁ କରି ତଦନ୍ତ ଚଳାଇଛି। ମୃତା ରିତାଞ୍ଜଳିଙ୍କ ସାନଭାଇ ଆରଡ଼ି ଫାଣ୍ଡି ଅଧୀନ ମୁଁଆ ଗ୍ରାମର ଶାନ୍ତନୁ ଦାସ ଅଭିଯୋଗ କରିଛନ୍ତି ଯେ, ଗତ ମେ ୫ ତାରିଖରେ ରିତାଞ୍ଜଳି ଗୋଡ଼ିପୋଖରୀ ସୟଦଜାଫର ଗ୍ରାମର ରମେଶ ମଳିକଙ୍କୁ ବୈଦିକ ରୀତିରେ ବିବାହ କରିଥିଲେ। ସେତେବେଳେ ଦାବି ମୁତାବକ ଯୌତୁକ ଦିଆଯାଇଥିଲା। ପରେ ଶାଶୁଘର ଲୋକେ ରିତାଞ୍ଜଳିଙ୍କୁ ଅଧିକ ଯୌତୁକ ପାଇଁ ନିର୍ଯାତନା ଦେଇଆସୁଥିଲେ। ତାଙ୍କ ଭଉଣୀଙ୍କୁ ଶାଶୁଘର ଲୋକେ ମାରି ଦେଇଥିବା ସେ ଦର୍ଶାଇଛନ୍ତି। ଅପରପକ୍ଷେ ରବିବାର ରାତିରେ ଶୋଇବା ଘର ଫ୍ୟାନରେ ରିତାଞ୍ଜଳିଙ୍କ ମୃତଦେହ ଝୁଲନ୍ତା ଅବସ୍ଥାରେ ଦେଖି ପୋଲିସକୁ ଖବର ଦେଇଥିବା ଶାଶୁଘର ଲୋକେ କହିଛନ୍ତି। ପୋଲିସ ସୋମବାର ମୃତଦେହ ଉଦ୍ଧାର କରି ବ୍ୟବଚ୍ଛେଦ ପାଇଁ ଭଦ୍ରକ ପଠାଇଛି। ରିତାଞ୍ଜଳିଙ୍କ ବାପା ବାହାରେ ରହୁଥିବାରୁ ତାଙ୍କ ସାନଭାଇ ଥାନାରେ ଅଭିଯୋଗ କରିଛନ୍ତି। ମୃତା ରିତାଞ୍ଜଳିଙ୍କ ସ୍ବାମୀଙ୍କୁୁ ଥାନାରେ ଅଟକ ରଖି ତଦନ୍ତ ଜାରି ରହିଥିବା ଆଇଆଇସି ପ୍ରଫୁଲ୍ଲ କୁମାର ସିଂ ସୂଚନା ଦେଇଛନ୍ତି।