ଓ୍ବାଶିଂଟନ/ବ୍ରାଜିଲିଆ/ନୂଆଦିଲ୍ଲୀ,୨୯ା୫: ଦିନ ଗଡ଼ୁଛି, ସଂଖ୍ୟା ବଢ଼ୁଛି। ଅସମ୍ଭାଳ ହେଲାଣି କରୋନା ସ୍ଥିତି। ବିଶ୍ୱର ୨୧୩ ଦେଶରେ ଏବେ ରାଜୁତି କରୁଛି କରୋନା ଭୂତାଣୁ। ଗୋଟାଏ ପରେ ଗୋଟାଏ ମୁଣ୍ଡ ଗଡ଼ିବା ସହ ସଂକ୍ରମିତଙ୍କ ସଂଖ୍ୟା ଅହେତୁକ ଭାବେ ବଢ଼ିଚାଲିଛି। ବିଶ୍ୱରେ ଏବେ ଭୂତାଣୁଜନିତ ମୃତ୍ୟୁସଂଖ୍ୟା ବଢ଼ି ୩,୫୮, ୩୨୯ରେ ପହଞ୍ଚିଛି। ସଂକ୍ରମିତଙ୍କ ସଂଖ୍ୟା ୫୮,୨୮,୧୫୭କୁ ବୃଦ୍ଧିପାଇଛି। ଯଦିଓ ଏପର୍ଯ୍ୟନ୍ତ ୨୫ ଲକ୍ଷରୁ ଊର୍ଦ୍ଧ୍ୱ ରୋଗୀ ସୁସ୍ଥ ହୋଇ ଘରକୁ ଫେରିଛନ୍ତି, ତଥାପି କରୋନାର ଉଗ୍ର ସଂକ୍ରମଣ ସ୍ଥିତି ଆତଙ୍କ ଖେଳାଇଛି। ବିଶ୍ୱର ସର୍ବାଧିକ ଆକ୍ରାନ୍ତ ତାଲିକାର ଶୀର୍ଷରେ ଆମେରିକା ଥିବାବେଳେ ଦ୍ୱିତୀୟରେ ବ୍ରାଜିଲ, ତୃତୀୟରେ ରୁଷିଆ ଅଛନ୍ତି। ଏହି ୩ ଦେଶରେ ସ୍ଥିତି ଏବେ ଭୟଙ୍କର ରହିଛି। ଭାରତରେ ଗତ କିଛିଦିନ ମଧ୍ୟରେ ଉଗ୍ର ସଂକ୍ରମଣ ସ୍ଥିତି ଦେଖାଦେବା ଫଳରେ ଗୁରୁବାର ତାଲିକାର ନବମ ସ୍ଥାନକୁ ଏହି ଦେଶ ଉତ୍ତୀର୍ଣ୍ଣ ହୋଇଛି। ବର୍ତ୍ତମାନ ସୁଦ୍ଧା ଭାରତରେ ୪,୫୬୮ଜଣଙ୍କ ମୃତ୍ୟୁ ଘଟିଥିବା ଜଣାପଡ଼ିଛି। ଗତ ୨୪ ଘଣ୍ଟା ମଧ୍ୟରେ ଭାରତରେ ୫ ହଜାରରୁ ଊର୍ଦ୍ଧ୍ୱ ନୂଆ ମାମଲା ନଜରକୁ ଆସିଛି। ଏହି ସମୟ ମଧ୍ୟରେ ଆମେରିକାରେ ୪ ହଜାର, ରୁଷିଆରେ ୮,୩୩୧ ମାମଲା ସାମ୍ନାକୁ ଆସିଛି।
ଆମେରିକାରେ କରୋନା ମୃତ୍ୟୁସଂଖ୍ୟା ବଢ଼ି ୧,୦୨,୨୪୯ରେ ପହଞ୍ଚିଛି। ସଂକ୍ରମିତଙ୍କ ସଂଖ୍ୟା ବଢ଼ି ୧୭.୪୯ ଲକ୍ଷ ଟପିଲାଣି। ବ୍ରାଜିଲରେ ୪୧.୪ ଲକ୍ଷରୁ ଅଧିକ ଭୂତାଣୁ ଆକ୍ରାନ୍ତ ଥିବାବେଳେ ମୃତ୍ୟୁସଂଖ୍ୟା ୫,୬୯୭କୁ ବୃଦ୍ଧିପାଇଛି। ଏହା ପଛକୁ ରହିଛି ରୁଷିଆ। ଏଠାରେ ରୋଗୀସଂଖ୍ୟା ୩.୭୯ ଲକ୍ଷରୁ ଅଧିକ ରହିଥିବା ବେଳେ ମୃତ୍ୟୁସଂଖ୍ୟା ୪,୧୪୨ ରହିଛି। ସ୍ପେନ୍, ବ୍ରିଟେନ, ଇଟାଲୀ, ଫ୍ରାନ୍ସ ଓ ଜର୍ମାନୀ ପଛକୁ ଭାରତ ରହିଛି। ଏହିସବୁ ଦେଶଗୁଡ଼ିକରେ ଭୂତାଣୁ ଆକ୍ରାନ୍ତଙ୍କ ସଂଖ୍ୟା ଯଥାକ୍ରମେ ୨.୮୩ ଲକ୍ଷ, ୨.୬୭ ଲକ୍ଷ, ୨.୩୧ ଲକ୍ଷ, ୧.୮୨ ଲକ୍ଷ, ୧.୮୨ ଲକ୍ଷ ଓ ୧.୬୩ ଲକ୍ଷରୁ ଊର୍ଦ୍ଧ୍ୱ ରହିଛି। ଗତ ୨୪ ଘଣ୍ଟା ମଧ୍ୟରେ ଆମେରିକାରେ ୧୪୨, ରୁଷିଆରେ ୧୭୪, ଜର୍ମାନୀରେ ୧୫ ଓ ଭାରତରେ ୧୧୯ ଜଣଙ୍କ ମୃତ୍ୟୁ ଘଟିଛି। ଏହାଛଡ଼ା ତୁର୍କୀରେ ୧.୫୯ ଲକ୍ଷ, ଇରାନରେ ୧.୪୩ ଲକ୍ଷ, ପେରୁରେ ୧.୩୫ ଲକ୍ଷରୁ ଅଧିକ ଲୋକ କରୋନା ସଂକ୍ରମଣ ହୋଇଛନ୍ତି। ଏଥିସହ ବେଲଜିୟମରେ ୯,୩୮୮, ମେକ୍ସିକୋରେ ୮,୫୯୭, ନେଦରଲାଣ୍ଡ୍ସରେ ୫,୯୦୩, ସୁଇଡେନରେ ୪,୨୬୬ ଜଣ ପ୍ରାଣ ହରାଇଥିବା ଜଣାପଡ଼ିଛି।