ଭାପୁର,୨୪ା୭ (ଡି.ଏନ୍.ଏ): ଦୀର୍ଘ ୨୦ ବର୍ଷ କାଳ ଓଡ଼ିଶାରେ ବିଜେଡି ସରକାର ଅମଳରେ ସବୁଠାରୁ ଅବହେଳିତ ଅବସ୍ଥାରେ ଖବରଦାତାମାନେ ରହିଛନ୍ତି। ରାଜ୍ୟରେ ସେମାନଙ୍କୁ ଚିହ୍ନଟ କରି ବିଭିନ୍ନ ସୁବିଧା, ସୁଯୋଗ ଦେବା ପାଇଁ ଗଣମାଧ୍ୟମ ପ୍ରତିନିଧିମାନେ ଦୀର୍ଘ ୫୦ ବର୍ଷ ହେଲା ଦାବି କରି ଆସୁଥିବା ସତ୍ତ୍ୱେ ଏମାନଙ୍କୁ ଚିହ୍ନଟ କରାଯାଇପାରୁ ନ ଥିଲା। ଗତବର୍ଷ ରାଜ୍ୟର ୬ ହଜାର ଖବରଦାତା ଚିହ୍ନଟ ହେବା ପରେ ସେମାନଙ୍କୁ ରାଜ୍ୟ ସରକାର ୨ ଲକ୍ଷ ଟଙ୍କାର ସ୍ବାସ୍ଥ୍ୟବୀମା ଯୋଗାଇ ଦେଇଥିଲେ। ଅପରପକ୍ଷରେ ବିଜୁ ସ୍ବାସ୍ଥ୍ୟ ବୀମା ଯୋଜନାରେ ସାଧାରଣ ଲୋକମାନଙ୍କୁ ୫ଲକ୍ଷ ଟଙ୍କାର ବୀମା ଓ ମହିଳାମାନଙ୍କୁ ୧୦ ଲକ୍ଷ ଟଙ୍କାର ସ୍ବାସ୍ଥ୍ୟ ବୀମା ଦେବାକୁ ସରକାର ଘୋଷଣା କରିଛନ୍ତି। ରାଜ୍ୟରେ ଦେଢ଼ କୋଟିରୁ ଊର୍ଦ୍ଧ୍ୱ ଲୋକଙ୍କୁ ୫ଲକ୍ଷ ଓ ୧୦ଲକ୍ଷ ଟଙ୍କାର ସ୍ବାସ୍ଥ୍ୟ ବୀମା ପ୍ରଦାନ କରାଯାଉଥିବାବେଳେ ହାତଗଣତି ଖବରଦାତାଙ୍କୁ ୨ଲକ୍ଷ ଟଙ୍କାର ସ୍ବାସ୍ଥ୍ୟ ବୀମା ଦେଇ ରାଜ୍ୟ ସରକାର ଖବରଦାତା ବିରୋଧୀ ପରିଚୟ ଦେଇଛନ୍ତି। ଅନ୍ୟପକ୍ଷରେ ସେହି ୨ ଲକ୍ଷ ଟଙ୍କାର ବୀମା ଯୋଗାଉଥିବା ବେଳେ ଏହା ଗତ ମେ ମାସ ୩୧ ତାରିଖଠାରୁ ତା’ର ଅବଧି ସରିଯାଇଥିଲେ ହେଁ ଏହା ନବୀକରଣରେ ଅହେତୁକ ବିଳମ୍ବ କରାଯାଉଛି। ଯାହାଯୋଗୁ ହଜାର ହଜାର ଖବରଦାତା ପରିବାର ଏହି ଯୋଜନାରୁ ଏବେ ବାଦ୍ ପଡ଼ିଛନ୍ତି। ଏ ନେଇ ନୟାଗଡ଼ ଜିଲା ଲୋକସମ୍ପର୍କ ଅଧିକାରୀ କୁହନ୍ତି ଯେ, ଆମେ ଜିଲାର ସମସ୍ତ ଖବରଦାତାଙ୍କ ସ୍ବାସ୍ଥ୍ୟବୀମା ନବୀକରଣ ପାଇଁ ରାଜ୍ୟକୁ ପଠାଇ ଦେଇଛୁ।