ଭୁବନେଶ୍ୱର,୨୭ା୧୦(ବ୍ୟୁରୋ): ବରିଷ୍ଠ ନେତା ଦାମୋଦର ରାଉତ ନିୟମିତ ବ୍ୟବଧାନରେ ନିଜ ମନ୍ତବ୍ୟ ନେଇ ଚର୍ଚ୍ଚାରେ ରହିଆସିଛନ୍ତି। ଭାଜପାରୁ ଇସ୍ତଫା ଦେବା ପରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଶନିବାର ଦାମ ପ୍ରଶଂସା କରିଛନ୍ତି। ଏପରିକି ସେ ବିଜେଡି ପ୍ରତି କଦାପି ବିମୁଖ ନ ଥିବା କହିଛନ୍ତି। ଗଣମାଧ୍ୟମ ପ୍ରତିନିଧିଙ୍କୁ ଦାମ କହିଛନ୍ତି ଯେ, ମୁଁ ବିଜେଡି ପ୍ରତି ବିମୁଖ ନୁହେଁ। ବିଜେଡି ତାଙ୍କୁ ଦଳରୁ ବିଦା କରିଥିଲା, ସେ ବିଜେଡି ଛାଡି ନ ଥିଲେ। ୧୯୭୪ରୁ ବିଜୁ ପଟ୍ଟନାୟକଙ୍କ ସହ ଥିଲି, ତାଙ୍କ ଦେହାନ୍ତ ପରେ ନବୀନ ବାବୁଙ୍କ ସହ ରହିଛି। ନବୀନ ବାବୁଙ୍କ କ୍ଷତି କରିଥିବା ଲୋକଙ୍କଠାରୁ ତାଙ୍କୁ ଦୂରେଇ ରଖିବାକୁ ଚେଷ୍ଟା କରିଛି। ଏସବୁ ସତ୍ତ୍ୱେ ଦଳ ମୋତେ ବାହାର କରିଦେଲା। ରାଜ୍ୟବାସୀ ଜାତୀୟ ଦଳ ଅପେକ୍ଷା ଆଞ୍ଚଳିକ ଦଳକୁ ଅଧିକ ପସନ୍ଦ କରୁଛନ୍ତି। ତେଣୁ ନବୀନ ବାବୁ ଅପରାଜେୟ ବୋଲି ଦାମ କହିଛନ୍ତି। ଦାମଙ୍କ ଏପରି ମନ୍ତବ୍ୟକୁ ନେଇ ଚର୍ଚ୍ଚା ଲାଗିରହିଛି। ଦାମ କୌଣସିମତେ ନିଜ ପୂର୍ବ ଦଳ ବିଜେଡିକୁ ଫେରିବା ପାଇଁ ମସୁଧା କରୁଥିବା ସମୀକ୍ଷକମାନେ ମତ ଦେଇଛନ୍ତି।