ଭୁବନେଶ୍ୱର, ୩୦।୧୦(ବ୍ୟୁରୋ): ‘କାଳିଆ ଯୋଜନା’ର ଦ୍ୱିତୀୟ କିସ୍ତି ଟଙ୍କା ନଭେମ୍ବରରେ ପ୍ରଦାନ କରାଯିବ। ଏନେଇ ଘୋଷଣା କରାଯିବା ପରେ ଉଭୟ ଭାଜପା ଏବଂ କଂଗ୍ରେସ ନେତାମାନେ ରାଜ୍ୟ ସରକାରଙ୍କୁ ଟାର୍ଗେଟ କରିଛନ୍ତି। ଭାଜପା ନେତା ତଥା ଦଳୀ ଉପସଭାପତି ସମୀର ମହାନ୍ତି କହିଛନ୍ତି, ରାଜ୍ୟ ସରକାର ୭୫ଲକ୍ଷ ଚାଷୀଙ୍କୁ ଯୋଜନାରେ ସାମିଲ କରିଥିଲେ। ୫୧ଲକ୍ଷ ଚାଷୀ ଟଙ୍କା ପାଇଲେ। ତେବେ ଆଉ ୨୪ଲକ୍ଷ କେବେ ପାଇବେ ବୋଲି ସେ ପ୍ରଶ୍ନ କରିଛନ୍ତି। ସେହିଭଳି ପିଏମ୍ କିଷାନ ଯୋଜନା ଲାଗି ୨୨ଲକ୍ଷ ଚାଷୀଙ୍କ ନାମ ଦିଆଯାଇଥିବା ବେଳେ ବାକି ତାଲିକା କେବେ ଦେବେ ବୋଲି ସେ ପ୍ରଶ୍ନ କରିଛନ୍ତି। ଲୋକଙ୍କ ମୋବାଇଲକୁ ମେସେଜ ଆସିଲା ହେଲେ ଟଙ୍କା ଆସିଲା ନାହିଁ। ସେମାନଙ୍କୁ କାଳିଆ ଟଙ୍କା କେବେ ମିଳିବ ତାହା ସରକାର ସ୍ପଷ୍ଟ କରନ୍ତୁ। କେତେ ଚାଷୀ ତାଲିକାଭୂକ୍ତ ହୋଇଥିଲେ, କେତେ ସହାୟତା ପାଇଥିଲେ, ଆଉ କେତେ ଚାଷୀ ଟଙ୍କା ପାଇବେ ସେ ନେଇ ସରକାର ଶ୍ୱେତପତ୍ର ଜରିଆରେ ପ୍ରକାଶ କରନ୍ତୁ ବୋଲି ସମୀର ଦାବି କରିଛନ୍ତି।
ଅପରପକ୍ଷେ କଂଗ୍ରେସ ନେତା ତଥା ପୂର୍ବତନ ପିସିସି ସଭାପତି ଜୟଦେବ ଜେନା ଏନେଇ ପ୍ରତିକ୍ରିୟା ରଖି କହିଛନ୍ତି, କାଳିଆ ଯୋଜନା ଏବଂ ଟଙ୍କା ବିଜେଡିର ଏକ ନିର୍ବାଚନ ପ୍ରତିଶ୍ରୁତି। ନିର୍ବାଚନ ବେଳେ ରାଜ୍ୟ ସରକାର ସରକାର ଗଠନ କରିବାର ପ୍ରଥମ ଦିନରେ ଟଙ୍କା ମିଳିବ ବୋଲି କହିଥିଲେ। କେତେଜଣ ଚାଷୀଙ୍କୁ ସରକାର ଟଙ୍କା ଦେଇଛନ୍ତି ତାହା ସ୍ପଷ୍ଟ କରାଯାଉ। ଭୋଟ ପାଇଁ ‘କାଳିଆ’ ମିଛ ବାହାନା ଥିଲା ବୋଲି ସେ କହିଛନ୍ତି।
ସୂଚନାଯୋଗ୍ୟ, ସେପ୍ଟେମ୍ବର ୧୮ରେ କୃଷି ମନ୍ତ୍ରୀ ଅରୁଣ ସାହୁ ଅଯୋଗ୍ୟ ହିତାଧିକାରୀଙ୍କଠାରୁ ଟଙ୍କା ଫେରସ୍ତ ଅଣାଯିବ ବୋଲି କହିଥତିଲେ। ହେଲେ ଏହି ସଂଖ୍ୟା କମ୍ ବାହାରିଥିଲା। ଏବେ ଯୋଜନାରେ ତାଲିକାଭୁକ୍ତ ଯୋଗ୍ୟ ହିତାଧିକାରୀଙ୍କୁ ଦ୍ୱିତୀୟ କିସ୍ତି ଅର୍ଥ ପ୍ରଦାନ କରାଯିବ ବୋଲି କୃଷି ବିଭାଗ ସଚିବ ସୌରଭ ଗର୍ଗ କହିଛନ୍ତି।