ବନ୍ତଳା,୧୭ା୧(ଡି.ଏନ.ଏ.) – ଅନୁଗୋଳ ବନଖଣ୍ଡ ତାଳଚେର ରେଞ୍ଜ ଅଞ୍ଚଳରେ ଆତଙ୍କ ସୃଷ୍ଟି କରିଥିବା ନରହନ୍ତା ଦନ୍ତାକୁ ଶୁକ୍ରବାର ଟ୍ରାଙ୍କୁଲାଇଜ୍ କରାଯିବାକୁ ବନ ବିଭାଗ ପକ୍ଷରୁ ପ୍ରସ୍ତୁତି ଚାଲିଥିବା ସୂଚନା ମିଳିଛି। ଏଥିପାଇଁ ଶିମିଳିପାଳର କୁମ୍କୀ ହାତୀ ସହ ସାତକୋଶିଆ ଟିକରପଡାଠାରେ ଥିବା ହାତୀ ମହେନ୍ଦ୍ରର ସହାୟତା ନିଆଯିବାକୁ ନିଷ୍ପତ୍ତି ହୋଇଛି।
ବନ ବିଭାଗ ସୂତ୍ରରୁ ପ୍ରକାଶ ଯେ, ୨୦୧୯ରେ ତାଳଚେର ରେଞ୍ଜ ଅଞ୍ଚଳରେ ଉକ୍ତ ଦନ୍ତା ଆତଙ୍କ ସୃଷ୍ଟି କରିବା ସହିତ ଗୋଟିଏ ଦିନରେ ୫ ଜଣଙ୍କ ମୃତ୍ୟୁର କାରଣ ହୋଇଥିଲା। ସେହିପରି ତାଳଚେର ସହର ଶର୍ମା ଛକରେ ଜଣେ ଲୋକକୁ ମାରିଥିଲା। ସେବେଠାରୁ ଏହି ହାତୀକୁ ଟ୍ରାଙ୍କୁଲାଇଜ କରିବାକୁ ତାଳଚେର ଅଞ୍ଚଳବାସୀଙ୍କ ତରଫରୁ ଦାବି କରାଯାଉଥିଲା। ତାଳଚେର ବିଧାୟକ ବ୍ରଜକିଶୋର ପ୍ରଧାନ ଏ ନେଇ ସରକାରଙ୍କୁ ଅବଗତ କରିବା ପରେ ଅନୁମତି ମିଳିଛି। ନରହନ୍ତା ଦନ୍ତାକୁ ଟ୍ରାଙ୍କୁଲାଇଜ କରାଯାଇ ଢେଙ୍କାନାଳ ଜିଲା କପିଳାସ ଚିଡିଆଖାନାକୁ ନେବା ପାଇଁ ସ୍ଥିର କରାଯାଇଛି। ବର୍ତ୍ତମାନ ବନ ବିଭାଗ ପକ୍ଷରୁ ୪ଟି ଟିମ୍ ଗଠନ କରାଯାଇ ଦନ୍ତାକୁ ତାଳଚେର ରେଞ୍ଜ ଡେରା ମୁକୁନ୍ଦନାଳ ରିଜର୍ଭ ଜଙ୍ଗଲରେ ଘେରାଉ କରାଯାଇଛି। ଏଥିସହିତ ଆଉ ତିନୋଟି ସ୍ବତନ୍ତ୍ର ଟିମ୍ ଗଠନ କରାଯାଇଛି। ଗୋଟିଏ ଟିମ୍ରେ ଅନୁଗୋଳ ଡିଏଫ୍ଓ ଭି. କାର୍ତ୍ତିକଙ୍କ ସହିତ ବନ ଅଧିକାରୀ, ଆଉ ଏକ ଟିମ୍ରେ ଏସିଏଫ ବାସୁଦେବ ବେହେରାଙ୍କ ସହିତ ବନ କର୍ମଚାରୀ ଓ ତୃତୀୟ ଟିମ୍ରେ ସାତକୋଶିଆ ପ୍ରାଣୀ ଡାକ୍ତର କିଶୋର ସାହୁଙ୍କ ସହିତ ଅନ୍ୟ ଡାକ୍ତର ଦଳ ରହିବେ। ସାତକୋଶିଆରୁ ଏକ ଟ୍ରକ୍ରେ ମହେନ୍ଦ୍ରକୁ ଅଣାଯାଇ ତାଳଚେର ଡେରା ଅଞ୍ଚଳରେ ଅପରେଶନ ଆରମ୍ଭ କରାଯିବ ବୋଲି ବନ ବିଭାଗ ସୂଚନା ଦେଇଛି।