ଜୁନାଗଡ଼, ୨୪।୯(ଡି.ଏନ୍.ଏ.): କଳାହାଣ୍ଡି ଜିଲା ଜାରିଙ୍ଗ ଜଙ୍ଗଲ ଗଣ ବଳାତ୍କାର ଘଟଣାରେ ପୋଲିସ ୪ଜଣ ଅଭିଯୁକ୍ତଙ୍କୁ ଅଟକ ରଖିଛି। ଘଟଣାକୁ ନେଇ ସୋମବାର ରାଜ୍ୟ ମହିଳା କମିଶନଙ୍କ ୩ ଜଣିଆ କମିଟି କଳାହାଣ୍ଡି ଗସ୍ତ କରିଛନ୍ତି। ରାଜ୍ୟ ମହିଳା କମିଶନ ପୋଲିସ ଅଧିକାରୀ ସହ ଆଲୋଚନା କରି ପୀଡିତାଙ୍କୁ ଭେଟିଛନ୍ତି। କମିଶନ ଅଧ୍ୟକ୍ଷା ମୀନତି ବେହେରାଙ୍କ ନେତୃତ୍ୱରେ ୩ ଜଣିଆ କମିଟି ଜୁନାଗଡ଼ ଥାନାରେ କେସ୍କୁ ନେଇ ପୋଲିସ ସହ ଆଲୋଚନା କରିଥିବା ବେଳେ ପୀଡ଼ିତାଙ୍କୁ ଜୁନାଗଡ଼ ହସ୍ପିଟାଲରେ ଭେଟି ଆଶ୍ୱାସନା ଜଣାଇଛନ୍ତି। କମିଶନ ଘଟଣାକୁ କଠୋର ନିନ୍ଦା କରିବା ସହିତ ଅଭିଯୁକ୍ତଙ୍କୁ କଠୋର ଦଣ୍ଡ ବିଧାନ ପାଇଁ କମିଶନ ଓ ସରକାର ପ୍ରତିଶ୍ରୁତିବଦ୍ଧ ବୋଲି କହିଛନ୍ତି।
ପ୍ରକାଶ ଯେ, ଗଣବଳାତ୍କାର ଶିକାର ହୋଇଥିବା ଛାତ୍ରୀ ଜଣଙ୍କ ଜୁନାଗଡ଼ର ଏକ ଘରୋଇ ନର୍ସିଂ କେନ୍ଦ୍ରରେ ତାଲିମ ନେଉଥିଲେ। ସବୁଦିନ ପରି ଗତ ୧୪ ତାରିଖରେ ସେ ଚିକିତ୍ସା ପାଇଁ ଭବାନୀପାଟଣାକୁ ଯାଇଥିଲେ। ସେଠାରୁ ଅପରାହ୍ନରେ ଭବାନୀପାଟଣା ବସଷ୍ଟାଣ୍ଡ ରାସ୍ତାକଡ଼ରେ ଛିଡ଼ା ହୋଇ ବସ୍କୁ ଅପେକ୍ଷା କରିଥିଲେ। ଏହି ସମୟରେ ସେ ଯାତାୟାତ କରୁଥିବା ଘରୋଇ ବସ୍ ଡ୍ରାଇଭର କୋକସରାକୁ ଆଉ ବସ୍ ନାହିଁ କହି ତାଙ୍କୁ ବାଇକ୍ରେ ଛାଡିଦେବେ ବୋଲି କହିଥିଲେ। ପରେ ସେ ବାଇକ୍ରେ ବସାଇ ନିକଟସ୍ଥ ଘନା ଜଙ୍ଗଲକୁ ନେଇ ୬/୭ ବନ୍ଧୁଙ୍କ ସହ ବଳାତ୍କାର କରିଥିଲେ। ଏପରିକି ଜଣେ ବ୍ୟକ୍ତି ଉକ୍ତ ଘଟଣାର ଭିଡିଓ ଶୁଟିଂ କରିଥିଲେ। କିଛି ଦିନ ପରେ ଏହି ଭିଡ଼ିଓ ଭାଇରାଲ ହେବା ପରେ ପୀଡ଼ିତା ଜୁନାଗଡ଼ ଥାନାରେ ଏତଲା ଦେଇଛନ୍ତି।
