ଜଗତ୍ସିଂହପୁର ଅଫିସ/ବିରିଡ଼ି(ଡି.ଏନ୍.ଏ.),୧୯ା୯: ବିରିଡ଼ି ଥାନା କୁଳକଇଜଙ୍ଗା ପଞ୍ଚାୟତ ନୂଆପାରି ଗ୍ରାମ ନିକଟ ବିଲୁଆଖାଇ ନଦୀପଠାରୁ ନର୍ସ ନିହାରିକା ପାତ୍ର ଓରଫ ରୂପାଲୀ(୨୪)ଙ୍କ ମୃତଦେହ ଉଦ୍ଧାର ହେବାର ଦୁଇଦିନ ପରେ ମଧ୍ୟ ସମଗ୍ର ଘଟଣା ରହସ୍ୟାବୃତ ହୋଇରହିଛି। ବିଶେଷକରି ତାଙ୍କ ପ୍ରେମିକ ବିରିଡ଼ି ଥାନା ହାଜିପୁରର କିଶୋର ଚନ୍ଦ୍ର ଆଞ୍ଚଲଙ୍କୁ ନେଇ ସନ୍ଦେହ ବଢ଼ିବାରେ ଲାଗିଛି। ଏକ ଅଖା ମଧ୍ୟରୁ ହାତଗୋଡ଼ ବନ୍ଧା ଅବସ୍ଥାରେ ନିହାରିକାଙ୍କ ମୃତଦେହ ମିଳିଥିବାବେଳେ ମୁହଁ ନଷ୍ଟ ହୋଇଯାଇଥିବାରୁ ଚିହ୍ନଟ ପ୍ରକ୍ରିୟା ସମ୍ପୂର୍ଣ୍ଣ ହୋଇପାରିନାହିଁ। ଯଦିଓ ପୋଷାକ, ବାମହାତରେ ବନ୍ଧାହୋଇଥିବା ସୂତା ଓ ଶରୀର ଦେଖି ତାଙ୍କ ବାପା ଖୋର୍ଦ୍ଧା ଜିଲା ବାଲିଅନ୍ତା ଥାନା ଭିଙ୍ଗାରପୁର ଗ୍ରାମର ଗଗନ ପାତ୍ର ଓ ମା’ ପ୍ରତିମା ପାତ୍ର ନିହାରିକାଙ୍କୁ ଚିହ୍ନଟ କରିଛନ୍ତି, ତେବେ ତାହା ପର୍ଯ୍ୟାପ୍ତ ନୁହେଁ। ତେଣୁ ତାଙ୍କ ଡିଏନ୍ଏ ପରୀକ୍ଷା ହେବ ବୋଲି ଜଗତ୍ସିଂହପୁର ଏସ୍ଡିପିଓ ପ୍ରକାଶ ଚନ୍ଦ୍ର ପାଲ କହିଛନ୍ତି। ଏଥିପାଇଁ ବୁଧବାର ମୃତଦେହରୁ ନମୁନା ସଂଗ୍ରହ କରାଯାଇଛି। ଏଥିସହ କଟକ ବଡ଼ ଡାକ୍ତରଖାନା ପରିସର ଏଫ୍ଏମ୍ଟି ବିଭାଗରେ ମୃତଦେହ ବ୍ୟବଚ୍ଛେଦ କରାଯାଇଛି। ଅନ୍ୟପକ୍ଷରେ କିଶୋରଙ୍କ ଉପରେ ପୋଲିସର ସନ୍ଦେହ ବଢିଛି। କାରଣ ନିହାରିକା କଟକର ଯେଉଁ ନର୍ସିଂହୋମରେ କାମ କରୁଥିଲେ, ସେଠାରୁ ଗତ ୮ ତାରିଖ ଅପରାହ୍ନରେ ତାଙ୍କୁ କିଶୋର ନିଜ ସାଥିରେ ନେଇଯାଇଥିଲେ। ଏହା ପରଠାରୁ ଆଉ ନିହାରିକା ନ ଫେରିବାରୁ ନର୍ସିଂହୋମ ପକ୍ଷରୁ ମଧୁପାଟଣା ଥାନାରେ ଅଭିଯୋଗ କରାଯାଇଥିଲା। କିଶୋର ଏବେ ଫେରାର ଅଛନ୍ତି। ତେଣୁ ତାଙ୍କ ବାପା, ମା’ ଓ ଭାଇଙ୍କ ସମେତ ୬ଜଣଙ୍କୁ ପୋଲିସ ପର୍ଯ୍ୟାୟକ୍ରମେ ଥାନାକୁ ଆଣି ପଚରାଉଚରା କରିଛି। ନିହାରିକାଙ୍କ ବିବାହ କିଶୋରଙ୍କ ସହ ସ୍ଥିର ହୋଇଥିଲା। କିନ୍ତୁ କିଶୋରଙ୍କର ଆବଶ୍ୟକ ଘର ନ ଥିବାରୁ ବିବାହ ଅଟକି ରହିଥିଲା। ୨ ବଖରା ଛାତ କରି ସାରିଲା ପରେ ବିବାହ ହେବ ବୋଲି ସ୍ଥିର ହୋଇଥିଲା। ସେହି ଅନୁଯାୟୀ, ଘର କାମ ଆରମ୍ଭ ହୋଇ ଛାତ ପଡିଛି। କିନ୍ତୁ ଘର ଶେଷ ହେବା ପୂର୍ବରୁ ନିହାରିକାଙ୍କ ଏଭଳି ମୃତ୍ୟୁ ଘଟିବା ସମଗ୍ର ଘଟଣାକୁ ରହସ୍ୟମୟ କରିଦେଇଛି।