କଟକ ଅଫିସ,୩୦ା୯: ନର୍ସ ନୀହାରିକା ପାତ୍ର ହତ୍ୟା ଘଟଣାରେ ପୋଲିସ ଅଭିଯୁକ୍ତ ପ୍ରେମିକ ରାଜା ଓରଫ କିଶୋର ଚନ୍ଦ୍ର ଆଞ୍ଚଲଙ୍କୁ ଗିରଫ କରିଛି। ହେଲେ ଏହି ହତ୍ୟା ଘଟଣା ଉପରୁ ସମ୍ପୂର୍ଣ୍ଣ ପରଦା ଉଠାଇ ପାରିନାହିଁ। ଅଧିକ ତଦନ୍ତ ପାଇଁ ରବିବାର ବିରିଡି ପୋଲିସ ହତ୍ୟାକାଣ୍ଡ ଘଟିଥିବା ଚାଉଳିଆଗଞ୍ଜ ଅପର୍ଣ୍ଣାନଗରସ୍ଥିତ ଘରର କୋଠରିକୁ ସିଲ୍ କରିଛି। ମିଳିଥିବା ସୂଚନା ଅନୁଯାୟୀ, ଅପର୍ଣ୍ଣାନଗରରେ ରାଜାଙ୍କ ବନ୍ଧୁ ସୁନୀଲ ସାହୁ ଘର ଭଡା ନେଇ ରହୁଥିଲେ। ସେହି ଘରକୁ ରାଜା ନିଜ ପ୍ରେମିକା ନୀହାରିକାଙ୍କୁ ନେବା ସହ ସେଠାରେ ତାଙ୍କ ତଣ୍ଟି ଚିପି ହତ୍ୟା କରିଥିଲେ ବୋଲି ପୋଲିସ ଆଗରେ କହିଥିଲେ। ଗତ ୨୪ରେ ଫୋରେନ୍ସିକ ଟିମ୍ ଏହି ଘରକୁ ଯାଞ୍ଚ କରିବା ସମୟରେ କାନ୍ଥ ଓ ବେଡରୁ ରକ୍ତ ଛିଟା ପାଇଥିଲା। ରାଜା ନୀହାରିକାଙ୍କ ତଣ୍ଟିଚିପି ହତ୍ୟା କରିଥିବା କଥା ପୋଲିସ ଆଗରେ ମାନିଥିବା ବେଳେ କାନ୍ଥରେ ଲାଗିଥିବା ରକ୍ତଛିଟାକୁ ନେଇ ଅନେକ ପ୍ରଶ୍ନବାଚୀ ସୃଷ୍ଟି କରିଛି। ହତ୍ୟା ସମ୍ବନ୍ଧରେ ରାଜାଙ୍କ ବୟାନ ଏବଂ ପାରିପାର୍ଶ୍ୱିକ ଚିତ୍ର ଖାପ ଖାଉ ନ ଥିବାରୁ ହତ୍ୟା ଘଟଣାଟି ସନ୍ଦେହ ଘେରକୁ ଠେଲି ହୋଇଯାଇଛି। ସୂଚନାଯୋଗ୍ୟ, ଖୋର୍ଦ୍ଧା ଜିଲା ବାଲିଅନ୍ତା ଥାନା ଅଞ୍ଚଳର ନର୍ସ ନୀହାରିକା ଓ ବିରିଡି ଅଞ୍ଚଳର ରାଜାଙ୍କ ମଧ୍ୟରେ ପ୍ରେମ ସମ୍ପର୍କ ଗଢି ଉଠିଥିଲା। ରାଜା ବେରୋଜଗାର ଥିବାରୁ ବିବାହକୁ ନେଇ ଉଭୟଙ୍କ ମଧ୍ୟରେ ମତାନ୍ତର ଦେଖାଦେଇଥିଲା। ଗତ ୮ ତାରିଖରେ ନୀହାରିକା ନର୍ସିଂହୋମ୍ରୁ ରାଜାଙ୍କ ସହ ଯାଇଥିଲେ। ମାତ୍ର ଆଉ ଫେରି ନ ଥିଲେ। ଗତ ୧୯ରେ ବିରିଡି ଥାନା ଅନ୍ତର୍ଗତ ବିଲୁଆଖାଇ ନଦୀପଠାରୁ ନୀହାରିକାଙ୍କ ମୃତଦେହ ମିଳିଥିଲା।