ଘସିପୁରା,୧୧।୧୦(ଡି.ଏନ.ଏ.)-କେନ୍ଦୁଝର ଜିଲା ଘସିପୁରା ବ୍ଲକ ଅନ୍ତର୍ଗତ ଗୋହିରା ପଞ୍ଚାୟତ ଓସ୍ତପୁରା ଗ୍ରାମରେ ଦୀର୍ଘଦିନ ହେବ ପାନୀୟଜଳ ସମସ୍ୟା ଲାଗି ରହିଛି। ଏହା ଏକ ବଣପାହାଡ଼ଘେରା ଅଞ୍ଚଳ। ବ୍ଲକ ଠାରୁ ଏହାର ଦୂରତା ପାଖାପାଖି ୫ କି.ମି. ହେବ। କହିବାକୁ ଗଲେ ଗ୍ରାମଟି ହେଉଛି ଏକ ଆଦିବାସୀ ଅଧ୍ୟୁଷିତ ଅଞ୍ଚଳ। ଗ୍ରାମେରେ ବିଭିନ୍ନ ପ୍ରକାର ସମସ୍ୟା ଲାଗି ରହିଥିବାବେଳେ ପାନୀୟ ଜଳ ସମସ୍ୟା ହେଉଛି ମୁଖ୍ୟ। ଲୋକମାନେ ପାଣି ପାଇଁ ଦୂଷିତ ଜଳକୁ ବ୍ୟବହାର କରୁଛନ୍ତି। ଏଥିଲାଗି ନାହିଁ ନ ଥିବା ଅସୁବିଧା ମଧ୍ୟ ଭୋଗୁଛନ୍ତି। ପାନୀୟ ଜଳ ଯୋଗାଣ ପାଇଁ ସରକାର ବିଭିନ୍ନ ଯୋଜନାରେ ନଳକୂପ ଖନନ ଠାରୁ ଆରମ୍ଭ କରି ତାହାର ରକ୍ଷଣାବେକ୍ଷଣା ଓ ପ୍ଲାଟଫର୍ମ (ପିଣ୍ଡି) ନିର୍ମାଣ ପାଇଁ ପଞ୍ଚାୟତ ସ୍ତରରେ ସ୍ବତନ୍ତ୍ର ଅନୁଦାନ ଦେଉଛନ୍ତି। କିନ୍ତୁ ସରକାରଙ୍କ ଏହି ଅନୁଦାନର ସଦୂପଯୋଗ କରାଯାଇ ନ ପାରିବା ପରିତାପର ବିଷୟ। ଏଠାରେ ନଳକୂପ ଅଛି ସତ କିନ୍ତୁ ବ୍ୟବହାର କରାଯାଇପାରୁନି। ଏନେଇ ବାରମ୍ବାର ଅଭିଯୋଗ କରାଯାଉଥିଲେ ମଧ୍ୟ ଶୁଣିବାକୁ କେହି ନାହାନ୍ତି।
ଓସ୍ତପୁରା ଗ୍ରାମରେ ବର୍ଷବର୍ଷ ଧରି ଲୋକଙ୍କ ଦାବି ପରେ ନଳକୂପ ଖନନ ହେଲା। ମାତ୍ର ଇତି ମଧ୍ୟରେ ଏକ ବର୍ଷ ବିତିଥିଲେ ମଧ୍ୟ ଉକ୍ତ ନଳକୂପରେ ପ୍ଲାଟଫର୍ମ ନିର୍ମାଣ କରାଯାଇ ନଥିବା ବେଳେ ରକ୍ଷଣାବେକ୍ଷଣା ପ୍ରତି ମଧ୍ୟ ଦୃଷ୍ଟି ଦିଆଯାଇ ନାହିଁ। ଫଳରେ ବିଶୁଦ୍ଧ ପାନୀୟ ଜଳ ପାଇ ପାରୁ ନଥିବା ୩ନଂ ୱାର୍ଡ ମଙ୍ଗଳାଶାଳର ଲୋକେ ଅଭିଯୋଗ କରିଛନ୍ତି। ବିଶେଷ କରି ବର୍ଷା ଦିନ ହୋଇଥିବାରୁ ନଳକୂପ ଭିତରେ ଆଖପାଖ ଅଞ୍ଚଳର ଗୋଳିଆ ପାଣି ଜମି ରହୁଛି। ଯାହା ବ୍ୟବହାର ଅନୂପଯୋଗୀ। ଏହାକୁ ବ୍ୟବହାର କରି ନାନା ରୋଗର ସମ୍ମୁଖୀନ ହେଉଛନ୍ତି। ପ୍ଲାଟଫର୍ମ ନିର୍ମାଣ ପାଇଁ ବାରମ୍ବାର ସରପଞ୍ଚଙ୍କ ଠାରୁ ଆରମ୍ଭ କରି ପ୍ରଶାସନିକ ଅଧିକାରୀଙ୍କୁ ଅବଗତ କରାଇଥିଲେ ମଧ୍ୟ ଏପର୍ଯ୍ୟନ୍ତ କୌଣସି ସ୍ଥାୟୀ ସମାଧାନ ହୋଇପାରିନାହିଁ । ତୁରନ୍ତ ସମସ୍ୟାର ସମାଧାନ ଦିଗରେ ପଦକ୍ଷକ୍ଷେପ ନେବାକୁ ଗ୍ରାମବାସୀ କୃଷ୍ଣଚନ୍ଦ୍ର ନାୟକ, ନାଳୁ ମହାକୁଡ଼, ସୁର ମହାକୁଡ଼, କୈଳାଶ ନୟକ, ନନ୍ଦିଆ ନାୟକ, ତପୁ ମହାକୁଡ଼, ରଞ୍ଜନ ନାୟକ, ବାୟାଧର ନାୟକ ପ୍ରମୁଖ ଦାବି କରିଛନ୍ତି।