ନାଉଗାଁ ,୨୫।୧୧(ସ୍ବ.ପ୍ର.): ରୋଗୀଙ୍କୁ ବିନାମୂଲ୍ୟରେ ହସ୍ପିଟାଲରେ ପହଞ୍ଚାଇବା ପାଇଁ ସରକାର ୧୦୮ ପରି ଜରୁରି ଆମ୍ବୁଲାନ୍ସ ସେବା ଆରମ୍ଭ କରିଛନ୍ତି। ଏହି ଆମ୍ବୁଲାନ୍ସ ସେବା ନାଉଗାଁ ବ୍ଲକରେ ୨୦୧୫ରୁ କାର୍ଯ୍ୟକାରୀ ହେଉଛି। ହେଲେ ନାଉଗାଁ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଥିବା ୧୦୮ ଆମ୍ବୁଲାନ୍ସ ଏବେ ଅଚଳ ଅବସ୍ଥାରେ ରହିଥିବା କୁହାଯାଉଛି। ଦୀର୍ଘ ଦିନ ଧରି ଆମ୍ବୁଲାନ୍ସ ମରାମତି ହୋଇ ନ ଥିବାବେଳେ ଏହାର ରକ୍ଷଣାବେକ୍ଷଣ ମଧ୍ୟ କରାଯାଉ ନାହିଁ। ଆମ୍ବୁଲାନ୍ସ ଡୋର କାଚ ପଡ଼ିଲାଣି। ତେଣୁ ଝରକାରେ କାଗଜ ପଟି ଲଗାଯାଇଛି। ସେହିପରି ଭିତରେ ଥିବା ସିଟ୍ ମଧ୍ୟ ଭାଙ୍ଗିଯାଇଛି। ଆମ୍ବୁଲାନ୍ସରେ ଶୀତତାପ ନିୟନ୍ତ୍ରଣ ବ୍ୟବସ୍ଥା ଥିଲେ ବି ତାହା ଅଚଳ ହୋଇପଡ଼ିଛି। ନାମକୁ ମାତ୍ର ଏହି ସ୍ବାସ୍ଥ୍ୟକେନ୍ଦ୍ରରେ ଆମ୍ବୁଲାନ୍ସ ରିହିଛି। ଗାଁ ଗହଳିକୁ ଉକ୍ତ ଆମ୍ବୁଲାନ୍ସ ରୋଗୀ ଆଣିବା ପାଇଁ ଗଲେ ବିଭିନ୍ନ ସମୟରେ ଷ୍ଟାଟ୍ ହେଉ ନ ଥିବା ଅଭିଯୋଗ ହୋଇଛି। ଫଳରେ ଆମ୍ବୁଲାନ୍ସକୁ ଅଧିକାଂଶ ସମୟରେ ଠେଲି ଷ୍ଟାଟ କରିବାକୁ ପଡ଼ୁଛି। ସାଧାରଣତଃ କୋଣସି ରୋଗୀକୁ ସେବା ଯୋଗାଇ ଦେବା ପାଇଁ ଏହି ଆମ୍ବୁଲାନ୍ସ ଠିକ ସମୟରେ ପହଞ୍ଚତ୍ ପାରୁନାହିଁ। ଅନେକ ସମୟରେ ଆମ୍ବୁଲାନ୍ସ ଉପରେ ଲୋକେ ଭରସା ନ କରି ନିଜେ ଗାଡି ଖର୍ଚ୍ଚ କରି ସ୍ବାସ୍ଥ୍ୟକେନ୍ଦ୍ରକୁ ରୋଗୀକୁ ନେଇ ଯାଇଥାନ୍ତି। ବ୍ଲକରେ ୧ଲକ୍ଷରୁ ଊର୍ଦ୍ଧ୍ୱ ଜନସାଧରାଣ ବସବାସ କରୁଥିବା ବେଳେ ଅନେକ ଦାରିଦ୍ର୍ୟ ସୀମା ରେଖା ତଳେ ରହିଛନ୍ତି। ଫଳରେ ସେମାନେ ଏହି ଆମ୍ବୁଲାନ୍ସ ଉପରେ ନିର୍ଭର କରିଥାନ୍ତି। ତେଣୁ ଆମ୍ବୁଲାନ୍ସକୁ ଶୀଘ୍ର ମରାମତି କରି ରୋଗୀ ସେବାରେ ଲଗାଇବାକୁ ବ୍ଲକ ଅଞ୍ଚଳବାସୀ ଦାବି କରିଛନ୍ତି। ଏ ସମ୍ପର୍କରେ ନାଉଗାଁ ସ୍ବାସ୍ଥ୍ୟକେନ୍ଦ୍ର ଭାରାପ୍ରାପ୍ତ ଅଧିକାରୀ ଡା. ସୁନନ୍ଦନ ମହାନ୍ତିଙ୍କୁ ପଚାରିବାରେ ଆମ୍ବୁଲାନ୍ସ ମରାମତି ପାଇଁ ଜିଲା ମୁଖ୍ୟ ଚିକିତ୍ସାଧିକାରୀଙ୍କ ଦୃଷ୍ଟି ଆକର୍ଷଣ କରାଯାଇଛି। ମୁଖ୍ୟ ଚିକିତ୍ସାଧିକାରୀଙ୍କ ନିର୍ଦ୍ଦେଶକ୍ରମେ ଖୁବ୍ଶୀଘ୍ର ଏହାର ମରାମତି କରାଯିବ ବୋଲି କହିଥିଲେ।