ଭୁବନେଶ୍ୱର,୧୨।୧୨(ବ୍ୟୁରୋ): କେନ୍ଦ୍ର ସରକାରଙ୍କ ନାଗରିକତ୍ୱ ସଂଶୋଧନ ବିଲ୍କୁ କଂଗ୍ରେସ ପାର୍ଲାମେଣ୍ଟ ଭିତରେ ଏବଂ ବାହାରେ ଜୋରଦାର ବିରୋଧ ପ୍ରଦର୍ଶନ କରିଛି। ଏହି ଅବସରରେ ନିଖିଳ ଭାରତ କଂଗ୍ରେସ କମିଟି(ଏଆଇସିସି) ନିର୍ଦ୍ଦେଶକ୍ରମେ ଓଡିଶା ପ୍ରଦେଶ କଂଗ୍ରେସ କମିଟି (ଓପିସିସି) ପକ୍ଷରୁ ବୁଧବାର ବିକ୍ଷୋଭ ସାଙ୍ଗକୁ ଧାରଣା ଦିଆଯାଇଛି। କଂଗ୍ରେସ ରାଜ୍ୟ କାର୍ଯ୍ୟାଳୟ ସମ୍ମୁଖ ରାସ୍ତା ଅପର ପାର୍ଶ୍ୱରେ ଉକ୍ତ ବିଲ୍ ବିରୋଧୀ ବ୍ୟାନର ଲଗାଇ ଦଳୀୟ ନେତାମାନେ ଧାରଣାରେ ବସିଛନ୍ତି। କଂଗ୍ରେସ ନେତୃବୃନ୍ଦ ମୁହଁରେ କଳାପଟି ବାନ୍ଧି ଧାରଣା ଦେଇଥିଲେ। ଭାଜପା ନେତୃତ୍ୱାଧୀନ ଏନ୍ଡିଏ ସରକାରକୁ ତୀବ୍ର ସମାଲୋଚନା କରି କଂଗ୍ରେସ ନେତା ଶରତ ରାଉତ କହିଛନ୍ତି ଯେ,ଏହି ବିଲ୍ ଆଇନରେ ପରିଣତ ହେଲେ ଦେଶ ପ୍ରତି ବିପଦ ସୃଷ୍ଟି କରିବ। ଭାରତ ଏକ ସାର୍ବଭୌମ ଧର୍ମ ନିରପେକ୍ଷ ରାଷ୍ଟ୍ର ହୋଇଥିବାବେଳେ ଏହି ବିଲ୍ ଗଣତନ୍ତ୍ରର ପରିପନ୍ଥୀ ବୋଲି ଦଳୀୟ ନେତାମାନେ ମତ ରଖିଛନ୍ତି। ଅନ୍ୟପକ୍ଷରେ ଉକ୍ତ ବିଲ୍କୁ ବିଜେଡି ସମର୍ଥନ ଦେବା ଘଟଣାକୁ ମଧ୍ୟ କଂଗ୍ରେସ କଡା ସମାଲୋଚନା କରିଛି। ଉପସ୍ଥିତ ନେତାମାନେ ହାତରେ ପ୍ଲାକାର୍ଡ ଧରି ବିରୋଧ କରିଛନ୍ତି। ଉକ୍ତ ପ୍ଲାକାର୍ଡରେ ବିଜେଡି-ଭାଜପା ସମ୍ପର୍କ ପ୍ରତି ଜନସାଧାରଣ ସତର୍କ ରହିବା ପାଇଁ କୁହାଯାଇଥିବା ବେଳେ ଦୁଇଦଳର ଭିତିରି ବୁଝାମଣା କଥା ଧରା ପଡିଯାଇଥିବା ଉଲ୍ଲେଖ କରାଯାଇଛି। ଏହି ଆନ୍ଦୋଳନରେ ପିସିସି ସଭାପତି ନିରଞ୍ଜନ ପଟ୍ଟନାୟକ, କାର୍ଯ୍ୟକାରୀ ସଭାପତି ଚିରଞ୍ଜୀବ ବିଶ୍ୱାଳ ଓ ପ୍ରଦୀପ ମାଝି ଅନୁପସ୍ଥିତ ଥିଲେ।