ରାୟପୁର,୨୬।୬: ଭାରତରେ ଡିଜିଟାଲ ଯୁଗ ଆରମ୍ଭ ହୋଇସାରିଛି। ଗୋଟିଏ ପରେ ଦେଶ ମହାକାଶ ଗବେଷଣା କ୍ଷେତ୍ରରେ ଶ୍ରେଷ୍ଠତ୍ୱ ହାସଲ କରୁଥିବାବେଳେ ଅପରପକ୍ଷରେ ଏବେ ମଧ୍ୟ ସମାଜରେ କୁସଂସ୍କାର ଜାରି ରହିଛି। ଏହାର ଏକ ସଦ୍ୟତମ ଉଦାହରଣ ଛତିଶଗଡ଼ରେ ଦେଖିବାକୁ ମିଳିଛି। ସ୍ଥାନୀୟ ବଳରାମପୁର ଜିଲା ଅନ୍ତର୍ଗତ କନକପୁର ଗାଁରେ ଦୁର୍ଗାବତୀ ନାମକ ଜଣେ ନାବାଳିକା ନାଗସାପକୁ ବିବାହ କରିବାକୁ ଅଡ଼ି ବସିଛି। ନାଗଦେବତା ସ୍ବପ୍ନରେ ଆସି ତା ମୁଣ୍ଡରେ ସିନ୍ଦୂର ଲଗାଇଥିବା ସେ କହୁଛି। ଏନେଇ ସ୍ଥାନୀୟ ଅଞ୍ଚଳରେ ଚର୍ଚ୍ଚା ଜାରି ରହିଛି। ଏଠାରେ ବାସ କରୁଥିବା କେଳା ସମ୍ପ୍ରଦାୟରେ ଏଭଳି ପରମ୍ପରା ପ୍ରଚଳିତ ବୋଲି ସ୍ଥାନୀୟ ଲୋକେ କୁହନ୍ତି। ଏହି ସମ୍ପ୍ରଦାୟର କେତେକ ଝିଅ ନାଗଦେବତାଙ୍କ ପ୍ରତି ନିଜକୁ ସମର୍ପଣ କରିଥାନ୍ତି। ସେମାନେ ନାଗଦେବତାଙ୍କୁ ସ୍ବାମୀ ଭାବେ ଗ୍ରହଣ କରି ଜୀବନସାରା ଏକା ଏକା ରହିଥାନ୍ତି। ଏହାର ଅମାନ୍ୟ କଲେ ନାଗଦେବତାଙ୍କ କୋପ ଦୃଷ୍ଟି ପଡ଼ିଥାଏ ବୋଲି ଏହି ସମ୍ପ୍ରଦାୟର ଲୋକେ ବିଶ୍ୱାସ କରନ୍ତି।
