ଉଦଳା, ୧୪ା୨(ଡି.ଏନ.ଏ.):‘ବରଷା ରାତିକୁ ଭରସା ନାହିଁ’ ନାଟକର ଟାଇଟଲ ଗୀତ ଗାଉଥିଲେ ଗାୟକ। କିନ୍ତୁ ଏହି ଗୀତ ପାଲଟିଗଲା ତାଙ୍କ ଜୀବନର ଶେଷ ଗୀତ। ଗୀତ ଗାଉଥିବା ବେଳେ ହଠାତ ଟଳିପଡିଲେ ଗାୟକ ସଞ୍ଜୟ କୁମାର ପାତ୍ର। ସ୍ତବ୍ଧ ପାଲଟିଯାଇଥିଲେ ଯାତ୍ରା କଳାକାର ଆଉ ଉପସ୍ଥିତ ଦର୍ଶକ। କିଛି କ୍ଷଣ ମଧ୍ୟରେ ମନୋରଞ୍ଜନର ପରିବେଶ ହୋଇଯାଇଥିଲା ଶୋକାକୁଳ। ମୟୂରଭଞ୍ଜ ଜିଲା ଉଦଳାରେ ରବିବାର ରାତିରେ ତୁଳସୀ ଗଣନାଟ୍ୟର ଯାତ୍ରା ଚାଲିଥିବା ବେଳେ ଏଭଳି ହୃଦୟବିଦାରକ ଘଟଣା ଘଟିଥିଲା।
ଉଦଳା ବସ୍ଷ୍ଟାଣ୍ଡ ନିକଟରେ ତୁଳସୀ ଗଣନାଟ୍ୟର ଯାତ୍ରା ଅନୁଷ୍ଠିତ ହେଉଥିଲା। ଯାତ୍ରାପାର୍ଟିର ସୁନାମଧନ୍ୟ ଗାୟକ ସଞ୍ଜୟ ନାଟକର ଶେଷ ଗୀତ ଗାଉଥିବା ବେଳେ ହଠାତ୍ ଛାତିରେ ଯନ୍ତ୍ରଣା ଅନୁଭବ କରି ସେହିଠାରେ ଟଳି ପଡିଥିଲେ। ସହକର୍ମୀ ଏବଂ ଯାତ୍ରା କମିଟିର ସଦସ୍ୟ ତୁରନ୍ତ ତାଙ୍କୁ ଚିକିତ୍ସା ନିମନ୍ତେ ଉଦଳା ଡାକ୍ତରଖାନାରେ ଭର୍ତ୍ତି କରିଥିଲେ। ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ତେବେ ତାଙ୍କ ମୃତ୍ୟୁର କାରଣ ସ୍ପଷ୍ଟ ହୋଇ ନ ଥିବା ବେଳେ ପୋଲିସ ମୃତଦେହ ଜବତ କରି ଘଟଣାର ତଦନ୍ତ ଆରମ୍ଭ କରିଛି। ତାଙ୍କ ବିୟୋଗରେ ତୁଳସୀ ଯାତ୍ରା ପାର୍ଟିର କଳାକାର ଜୁଲି ପଣ୍ଡା, ଅଶ୍ୱିନୀ ବ୍ରହ୍ମ, ନୀର ସ୍ବାଇଁଙ୍କ ସମେତ ସମସ୍ତ କଳାକାର ଶୋକ ପ୍ରକାଶ କରିଛନ୍ତି। ସଞ୍ଜୟଙ୍କ ଦେହାନ୍ତ ପରେ ଯାତ୍ରା ପାର୍ଟିରେ ସୃଷ୍ଟି ହୋଇଥିବା ଶୂନ୍ୟ ସ୍ଥାନ ପୂରଣ ହେବା କଷ୍ଟକର ବୋଲି କହିଛନ୍ତି ଅନେକ କଳାକାର।