ଆସିକା,୧୫।୩ (ଡି.ଏନ୍.ଏ.): ଗଞ୍ଜାମ ଜିଲା ଆସିକା-ସୋରଡା ମୁଖ୍ୟରାସ୍ତାର ଧରାକୋଟ ଥାନା ଅନ୍ତର୍ଗତ କେ.ରାମଚନ୍ଦ୍ରପୁର (କଇଠରା) ଗ୍ରାମରେ ରବିବାର ସକାଳେ ବାଣ ବିସ୍ଫୋରଣ ଘଟି ୪ ଗୁରୁତର, ୪ ଆହତ ହୋଇଛନ୍ତି। ସକାଳେ ପୌରାଣିକ ନାଟକ ଚାଲିଥିଲା ବେଳେ ନାଟକର ଏକ ଦୃଶ୍ୟରେ ବାଣ ବିସ୍ଫୋରଣ ଘଟି ୮ରୁ ଊର୍ଦ୍ଧ୍ୱ ଦର୍ଶକ ଗୁରୁତର ହୋଇଥିଲେ । ସେମାନେ ହେଲେ ନାବାଳକ ଓମ୍ ରେଡି, ସୁମନ୍ ରେଡି, ରାଜା ଗୌଡ, ବିନୟ ଗୌଡ, ବିଜୟ ଗୌଡ, ବାବୁ ବିଷୋୟୀ, ଅରୁଣ ବିଷୋୟୀ ଓ ଚନ୍ଦନ ବିଷୋୟୀ। ସେମାନଙ୍କୁ ଚିକିତ୍ସା ଲାଗି ଆସିକା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଥିଲା। ସେଠାରେ ପ୍ରାଥମିକ ଚିକିତ୍ସା ପରେ ବିଜୟ, ବାବୁ, ଅରୁଣ ଓ ଚନ୍ଦନଙ୍କ ଅବସ୍ଥା ଗୁରୁତର ହେବାରୁ ସେମାନଙ୍କୁ ବ୍ରହ୍ମପୁର ବଡ ମେଡିକାଲକୁ ସ୍ଥାନାନ୍ତର କରାଯାଇଛି।