ନ୍ୟୁୟର୍କ,୯।୯(ଏପି): ସ୍ପାନିଶ ଟେନିସ କିମ୍ବଦନ୍ତୀ ରାଫାଲ ନାଡାଲ ରବିବାର କ୍ୟାରିୟରର ୧୯ତମ ଗ୍ରାଣ୍ଡସ୍ଲାମ ଟାଇଟଲ ହାସଲ କରିଛନ୍ତି। ଏଠାରେ ଚାଲିଥିବା ୟୁଏସ୍ ଓପନ ଫାଇନାଲରେ ଡାନିଏଲ ମେଦ୍ଭେଦେଭଙ୍କୁ ହରାଇ ଏହି ସଫଳତା ପାଇଛନ୍ତି। ୫ ସେଟ୍ ବିଶିଷ୍ଟ ଫାଇନାଲରେ ନାଡାଲ ଏକଦା ୨-୦ରେ ଆଗୁଆ ଥିଲେ। ଏହାସତ୍ତ୍ୱେ ନାଡାଲଙ୍କୁ କ୍ୟାରିୟରର ୫ମ ୟୁଏସ୍ ଓପନ ଟାଇଟଲ ହାତେଇବା ପାଇଁ ୫ମ ସେଟ୍ ପର୍ଯ୍ୟନ୍ତ ଅପେକ୍ଷା କରିବାକୁ ପଡ଼ିଥିଲା। ଦ୍ୱିତୀୟ ସିଡ୍ ନାଡାଲ ୭-୫, ୬-୩, ୫-୭, ୪-୬, ୬-୪ ସେଟ୍ ଫାଇନାଲ ମ୍ୟାଚ୍ ଜିତିଛନ୍ତି। ବିଜୟ ଲାଗି ତାଙ୍କୁ ୪ ଘଣ୍ଟା ୫୦ ମିନିଟ୍ ଲାଗିଥିଲା। ୩୨ ବର୍ଷୀୟ ନାଡାଲ ପୁରୁଷ ସିଙ୍ଗଲ୍ସ ବର୍ଗରେ ସର୍ବକାଳୀନ ରେକର୍ଡର ନିକଟତର ହୋଇଛନ୍ତି। ଏବେ ରୋଜର ଫେଡରର ସର୍ବାଧିକ ୨୦ ଗ୍ରାଣ୍ଡସ୍ଲାମ ଟାଇଟଲ ସହ ଶୀର୍ଷରେ ରହିଛନ୍ତି। ନାଡାଲ ଏପର୍ଯ୍ୟନ୍ତ ୧୨ ଫ୍ରେଞ୍ଚ ଓପନ, ଦୁଇ ଓ୍ବିମ୍ବେଲଡନ ଓ ଗୋଟିଏ ଅଷ୍ଟ୍ରେଲିଆନ ଓପନ ଜିତିସାରିଛନ୍ତି।