ନୂଆଦିଲ୍ଲୀ,୧୧।୮(ପି.ଟି.)- ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ଜାତୀୟ ନିଶା ନିବାରଣ ସଂସ୍ଥା (ନାଡା) ଅଧୀନକୁ ଆସିବାର ନିଷ୍ପତ୍ତିକୁ କେନ୍ଦ୍ର କ୍ରୀଡ଼ାମନ୍ତ୍ରୀ କିରନ ରିଜିଜୁ ସ୍ବାଗତ କରିଛନ୍ତି। ଏହା ଦ୍ୱାରା କ୍ରିକେଟ ତଥା ଅନ୍ୟ କ୍ରୀଡ଼ା ଦୁର୍ନୀତିମୁକ୍ତ ଓ ସ୍ବଚ୍ଛ ହୋଇପାରିବ ବୋଲି ସେ କହିଛନ୍ତି। ଦୀର୍ଘ ଏକ ଦଶନ୍ଧି ହେବ ମନ୍ତ୍ରଣାଳୟ ବିସିସିଆଇକୁ ନାଡା ଅଧୀନକୁ ଆଣିବାକୁ ନିରନ୍ତର ପ୍ରୟାସ କରି ଆସୁଥିଲା। ଏହା ଏକ ଯୁଗାନ୍ତକାରୀ ସକାରାତ୍ମକ ପଦକ୍ଷେପ। କୌଣସି ସମସ୍ୟା ସମାଧାନ ନ ହେଉ ତାହା ଚାହେଁ ନାହିଁ। ସବୁ ପ୍ରକାର ମତପାର୍ଥକ୍ୟ ସୌହାର୍ଦ୍ଦ୍ୟପୂର୍ଣ୍ଣ ବାତାବରଣରେ ସମାଧାନ ହେଉ ବୋଲି ଚାହେଁ। କ୍ରୀଡ଼ା ପ୍ରଶାସନରେ ସ୍ବଚ୍ଛତା ଆଣିବା ମୋର ମୂଳ ଲକ୍ଷ୍ୟ। କ୍ରୀଡ଼ାର ବୃହତ୍ତର ସ୍ବାର୍ଥ ଦୃଷ୍ଟିରୁ ଏଭଳି ପଦକ୍ଷେପ ନେବାର ଆବଶ୍ୟକତା ଥିଲା ବୋଲି ରିଜିଜୁ କହିଛନ୍ତି।
ସ୍ବାୟତତ୍ତା ହାତରୁ ଚାଲିଯିବ ବୋଲି ବିସିସିଆଇ ନାଡା ଅଧୀନକୁ ଆସିବାକୁ ଚାହୁଁ ନ ଥିଲା। ନାଡାର ‘ହୋୟାର ଏବାଉଟ୍’ କ୍ଲଜ୍ ନେଇ କେତେକ ବରିଷ୍ଠ କ୍ରିକେଟରମାନେ ମଧ୍ୟ ଆପତ୍ତି ଉଠାଇଥିଲେ। ପ୍ରତିଯୋଗିତା ବାହାରେ ଡୋପ୍ ଟେଷ୍ଟର ଏହି ସର୍ତ୍ତକୁ ସେମାନେ ଗ୍ରହଣ କରିବାକୁ ରାଜି ନ ଥିଲେ। କାରଣ ଏହା ଦ୍ୱାର ପ୍ରାଇଭେସି ବା ବ୍ୟକ୍ତିଗତ ବ୍ୟାପାରରେ ବୁଝାମଣା ହେବ ବୋଲି ସେମାନେ ଭାବୁଥିଲେ। ତେବେ ଶେଷରେ ବିସିସିଆଇ ମୁଖ୍ୟ କାର୍ଯ୍ୟନିର୍ବାହୀ ରାହୁଲ ଜୋହରି ଓ କ୍ରୀଡ଼ା ସଚିବ ରାଧେଶ୍ୟାମ ଝୁଲନିୟା ବୈଠକରେ ବସି ଏ ନେଇ ମିଳିତ ଭାବେ ନିଷ୍ପତ୍ତି ନେଇଥିଲେ। ନିୟମ ସମସ୍ତଙ୍କ ପାଇଁ ସମାନ ଓ ଏହା ସମସ୍ତଙ୍କୁ ମାନିବାକୁ ହେବ ବୋଲି ବିସିସିଆଇକୁ କହିଥିଲି ବୋଲି ଝୁଲନିୟା କହିଛନ୍ତି। ଆଇନ ଆଗରେ ବିସିସିଆଇ ସମେତ ସବୁ ଜାତୀୟ କ୍ରୀଡ଼ା ଫେଡେରେଶନ ସମାନ। ତେଣୁ ଏଥିରେ କୌଣସି ଚୁକ୍ତିରେ ସ୍ବାକ୍ଷର କରାଯିବାର ଆବଶ୍ୟକତା ନାହିଁ। ନିୟମକାନୁନ ସମସ୍ତଙ୍କ ପାଇଁ ସମାନ ହୋଇଥିବାରୁ କୌଣସି ଏମ୍ଓୟୁ ବା ବୁଝାମଣା ପତ୍ରର ଆବଶ୍ୟକତା ନାହିଁ ବୋଲି ଝୁଲନିୟା ବିସିସିଆଇକୁ ଅବଗତ କରାଇଥିଲେ।