ବନ୍ତଳା, ୫।୮(ଡି.ଏନ.ଏ.) ୩ ବଷର୍ର୍ର ନାତୁଣୀକୁ ମାଡ଼ ମାରିବା ଓ ଦୀର୍ଘ ସମୟ ଘରେ ତାଲା ପକାଇ ରଖିବା ଅଭିଯୋଗରେ ଗିରଫ ହୋଇଛନ୍ତି ଜେଜେ ମା’। ଏଭଳି ଘଟଣା ରବିବାର ଅନୁଗୋଳ ଜିଲାରେ ଚର୍ଚ୍ଚାର ବିଷୟ ପାଲଟିଛି। କ୍ଷତାକ୍ତ ଅବସ୍ଥାରେ ପୋଲିସ ଶିଶୁଟିକୁ ଉଦ୍ଧାର କରି ସିଡବ୍ଲ୍ୟୁସିକୁ ହସ୍ତାନ୍ତର କରିଛି। ଜିଲା ମୁଖ୍ୟ ଚିକିତ୍ସାଳୟରେ ଶିଶୁକନ୍ୟାର ଚିକିତ୍ସା ଚାଲିଥିବା ଜଣାପଡିଛି।
ସୂଚନା ମୁତାବକ, ଅନୁଗୋଳ ଜିଲା ବନ୍ତଳା ଥାନା ଗଡ଼ତରାସ ଗ୍ରାମର ଅସିତ ରାଉତ ସ୍ତ୍ରୀ ଦୀପ୍ତି ରାଉତ(୨୨)ଙ୍କ ୫ ଓ ୩ ବର୍ଷର ଦୁଇ କନ୍ୟା ସନ୍ତାନ ରହିଛନ୍ତି। ବର୍ଷେ ପୂର୍ବରୁ ଦୀପ୍ତିଙ୍କ ମୃତ୍ୟୁ ହୋଇଯାଇଥିବାରୁ ଦୁଇ ଶିଶୁ ବାପା, ଜେଜେ ମା’ ଓ ଜେଜେ ବାପାଙ୍କ ସହ ରହୁଛନ୍ତି। ଗ୍ରାମବାସୀଙ୍କ କହିବା ମୁତାବକ, ଜେଜେ ମା’ କୁମୁଦିନୀ ରାଉତ ଶିଶୁଙ୍କୁ ଅଧିକାଂଶ ସମୟରେ ମାର୍ପିଟ କରିଥାନ୍ତି। ରବିବାର ସକାଳେ କୁମୁଦିନୀ ତାଙ୍କ ସାନ ନାତୁଣୀକୁ ମାଡ଼ ମାରିବା ସହିତ ଘରେ ପୂରାଇ ତାଲା ପକାଇଦେଇଥିଲେ। ଦୀର୍ଘ ସମୟ ଧରି ତାଲା ନ ଖୋଲିବାରୁ ଅଙ୍ଗନଓ୍ବାଡ଼ି କର୍ମୀ ଓ ସମିତିସଭ୍ୟ ଘଟଣା ସମ୍ପର୍କରେ ଗ୍ରାମବାସୀଙ୍କୁ ଜଣାଇବା ସହ ଜିଲା ଶିଶୁ ମଙ୍ଗଳ ଅଧିକାରୀ, ବନ୍ତଳା ଥାନା ଆଇଆଇସିଙ୍କୁ ସୂଚନା ଦେଇଥିଲେ। ଗ୍ରାମବାସୀ ଓ ସରପଞ୍ଚଙ୍କ ହସ୍ତକ୍ଷେପ ପରେ ଶିଶୁକନ୍ୟାକୁ ତାଲା ଖୋଲି ବାହାର କରାଯାଇଥିଲା। ପରେ ପୋଲିସ ଘଟଣାସ୍ଥଳରେ ପହଞ୍ଚି ଶିଶୁକୁ ସେଠାରୁ ଉଦ୍ଧାର କରି ସିଡବ୍ଲ୍ୟୁସିକୁ ହସ୍ତାନ୍ତର କରିଥିଲା। ବନ୍ତଳା ଥାନାରେ ଆୟୁସିଏଡବ୍ଲ୍ୟୁ(ଇନଭେଷ୍ଟିଗେଶନ ୟୁନିଟ କ୍ରାଇମ ଏଗେନ୍ସଷ୍ଟ ଓମେନ)ର ଅତିରିକ୍ତ ଏସପି ବସନ୍ତ କୁମାର ପ୍ରଧାନ ପହଞ୍ଚି ଶିଶୁଙ୍କ ସ୍ବାସ୍ଥ୍ୟ ପରୀକ୍ଷା କରାଇଥିଲେ। ଗ୍ରାମର ତାପସ ସାମଲଙ୍କ ଅଭିଯୋଗ କ୍ରମେ ପୋଲିସ ନଂ. ୧୩୫/୧୯ରେ ମାମଲା ରୁଜୁ କରିବା ସହ ଅପରାହ୍ନରେ କୁମୁଦିନୀଙ୍କୁ ଗିରଫ କରାଯାଇଥିଲା।
ଘଟଣା ସମ୍ପର୍କରେ ଅଙ୍ଗନଓ୍ବାଡ଼ି କର୍ମୀ ବିଦ୍ୟୁତପ୍ରଭା ସିଂ, ସମିତି ସଭ୍ୟା କାମିନୀ ସାମଲ କୁହନ୍ତି, କୁମୁଦିନୀ ଏକ ବାଡିରେ ଶିଶୁଟିକୁ ମାଡ଼ ମାରି ତାଲା ପକାଇଦେଇଥିଲେ। ଶିଶୁଟି ଜୋରରେ କାନ୍ଦିବା ସହ ପାଣି ମାଗିଥିଲା। ହେଲେ କୁମୁଦିନୀ କବାଟ ଖୋଲି ନ ଥିଲେ। ତେଣୁ ଶିଶୁଟିକୁ ବାଳାଶ୍ରମରେ ସୁରକ୍ଷିତ ଛାଡିବାକୁ ସରପଞ୍ଚ ରୁନୁବାଳା ମାଝି, ଗ୍ରାମ ସଭାପତି ଧୂଳିଆ ସାହୁ, ତାପସ ସାମଲ, ବୀରେନ୍ଦ୍ର ସାମଲ, ସୁଶାନ୍ତ ମାଝି, ଆଶୁତୋଷ ଦେବତା, ଲୁଲୁ ମାଝି ପ୍ରମୁଖ ଦାବି କରିଛନ୍ତି। ବାପା ଅସିତ କୁହନ୍ତି, ମୋ ଅନୁପସ୍ଥିତିରେ ମା’ ବାଡେଇଛନ୍ତି। ମୁଁ ଏ ବିଷୟରେ ଜାଣି ନ ଥିଲି। ଆଗରୁ କେବେ ବାଡେଇବା ଜାଣିନି। ଝିଅକୁ ମୋ ପାଖରେ ରଖିବି। ଏ ନେଇ ଜିଲା ଶିଶୁ ମଙ୍ଗଳ ଅଧିକାରୀ ଗୌରୀଶଙ୍କର ବେହେରା କହିଛନ୍ତି, ସୂଚନା ପାଇବା ପରେ ତୁରନ୍ତ ଆଇଆଇସିଙ୍କୁ ଜଣାଇ ଦିଆଯାଇଥିଲା। ପୋଲିସ ଶିଶୁକୁ ଉଦ୍ଧାର କରି ମହିଳା ପୋଲିସ ଦ୍ୱାରା ଶିଶୁ ମଙ୍ଗଳ ଅଧିକାରୀଙ୍କ ପାଖରେ ହାଜର କରିଥିଲେ। ଶିଶୁଟି ସୁସ୍ଥ ହେଲା ପରେ ପଦକ୍ଷେପ ନିଆଯିବ।