କେସିଙ୍ଗା, ୭ା୧୨ (ଡି.ଏନ.ଏ.)-
କଳାହାଣ୍ଡି ଜିଲା କେସିଙ୍ଗା ବ୍ଲକ ଲଇତରା ପଁଚେତ୍ ଜୋଲକୋ ଗଁା ଗଉଡ଼ପଡ଼ାର ୪ ମା’ବାପ୍ ଛେଉଁଡ୍ ଭାଇବହେନ୍ ଭୋଖ୍ ଉପାସରେ ଦିନ୍ ବିତଉଥିଲେ। ଇ ବାବ୍ଦେ ଗଲା ୪ ତାରିଖ ଧରିତ୍ରୀ ସମ୍ବଲପୁର ସଂସ୍କରଣରେ ‘ବାପ୍ ଆରପାରେ, ମା’ ନିଖୋଜ: ନାବାଲିକ୍ ଉପରେ ଭାଇବହେନ୍କଁର ବୋଝ୍’ ଶୀରଷକ୍ରେ ଖବର ବାହାରିଥିଲା। ଖବର ବାହାରଲା ଉତାରୁ ଗୁରୁବାର ଥାନୀଅ ପରଶାସନ ମା’ବାପ୍ ଛେଉଁଡ୍ ଭାଇବହେନ୍କର ପାସେ ପୁହୁଁଚିଛେ।
ସୂଚନା ଅନ୍ସାରେ ଜୋଲକୋ ଗଁା ଗଉଡ଼ପଡ଼ାର ସୁନୀଲ ବାଗକଁର ୨୦୧୧ ସାଲେ ଟିବି ରୋଗ୍ରେ ମୁର୍ତୁ ହେଇଥିଲା। ସେ ମରବାର ବଛରକର ଉତାରୁ ତାକର ବିଧବା ମାଏକିନା ସତ୍ୟବତୀ ବି ନିଖୋଜ ହେଇଯାଇଥିଲେ। ଏନ୍ତାଥି ସ୍ବର୍ଗତ ସୁନୀଲକଁର ବଡ଼ ଝି’ ଝରଣାର ଉପରେ ଭାଇବହେନ୍ର ବୋଝ୍ ପଡ଼ିଥିଲା। ଆଏଜ୍କେ ୭ ବଛର ହେଲା ଝରଣା ପରହର କାମ୍ବୁତା କରି ୩ ଭାଇ ବହେନ୍ ସେତୁ (୧୨), ଚୈତୁ(୧୦) ଆର ସାନ ବହେନ୍ ଅପରାଜିତା(୯) ପେଟ୍ ପାଲିଆସୁଛନ୍। ହେଲେ ଝରଣାର ଦିହିପା ଖରାପ୍ ହେଲେ ଭାଇବହେନ୍ ସଭେ ଖାଡ଼ା ଉପାସରେ ରହୁଛନ୍। ସାନ୍ ବହେନ୍ ଗଁା ସ୍କୁଲ ଆର ଦୁଇ ଭାଇ ଲଇତରା ପ୍ରାଥମିକ ସ୍କୁଲରେ ପଢ଼ୁଛନ୍। ସେମାନେ ବେଲାକେ ସ୍କୁଲରେ ଖାଉଥିଲାବେଲେ ଅଭାବ ଅନାଟନ ଲାଗି ବଡ଼ଭାଗି ଦିନ୍ ରାତିରେ ଭୁଖେ ଶୁଉଛନ୍। ଏନ୍ତାଥି କେଭେ କେନ୍ତା ପାଖ୍ପଡ଼ିଶା ତାହାକୁ ଖାଏବାକେ ଦେଉଛନ୍। ଥାନୀଅ ଅଙ୍ଗନଓ୍ବାଡି କେନ୍ଦ୍ରରେ ବି ଛୁଆମାନେ କେତେବେଲେ କେନ୍ତା ଖାଉଛନ୍। ଭାଇବହେନ୍କର ଦୁରଦଶା ଦେଖି ଥାନୀଅ ଅଙ୍ଗନଓ୍ବାଡି କରମୀ ସେମାନକୁ କେସିଙ୍ଗା ବିଡିଓକଁର ପାସ୍କେ ଧରିକରି ଯାଇଥିଲେ। ଘଟନା ବାବ୍ଦେ ଉପଜିଲାପାଲକଁର ଦୁରୁଷ୍ଟି ଆକରଷନ୍ କରବାର ସଂଗେ ତାକଁର ମତାମତ ନେଇ ୪ ମା’ବାପ୍ ଛେଉଁଡ୍ ଭାଇବହେନ୍କର ଉପରେ ଧରିତ୍ରୀରେ ଖବର ବାହାରିଥିଲା। ଖବର ବାହାରଲାରୁ ଗୁରୁବାର ରାତି ୮ ବଜେ ପଁଚେତ୍ ତରଫୁ ୩୫ କେ.ଜି. ଆର ସିଡିପିଓ ୫୦ କେ.ଜି. ଚାଉଲ ସେମାନକୁ ଦେଇଥିଲେ। ଇ ବାବ୍ଦେ କେସିଙ୍ଗା ବିଡିଓ ଭୀମସେନ ଶବରକୁଁ ପଚରାଲାରୁ ମା’ବାପ୍ ଛେଉଁଡ୍ ଭାଇବହେନ୍କୁ ବ୍ଲକ ପରଶାସନ ତରଫୁ ସବୁ ପରକାର ସାହାଯ୍ ଯୁଗେଇ ଦିଆଯିବା। ଅପରାଜିତାକୁଁ ପାସର କେହେନ୍ସି ଗୁଟେ କସ୍ତୁରବା ଗାନ୍ଧୀ ଆବାସିକ ବିଦ୍ୟାଲୟରେ ଦାଖଲ କରେଇ ତାକର ପାଠ୍ ପଢ଼ବାର ବେବସ୍ତା କରାଯିବା ବଲି ସେ କହିଥିଲେ।
