ଅନୁଗୋଳ ଅଫିସ, ୭।୫ – କୋଭିଡ୍ ମ୍ୟାପ୍ରେ ଗ୍ରୀନ୍ ଜୋନରେ ଥିବା ଅନୁଗୋଳ ଜିଲାର ବାଳ ସୁଧାର ଗୃହକୁ ରେଡ୍ଜୋନ୍ ଭଦ୍ରକ ଜିଲାରୁ ମଙ୍ଗଳବାର ବିଳମ୍ବିତ ରାତିରେ ଆସିଥିବା ଜଣେ ନାବାଳକ ଅଭିଯୁକ୍ତଙ୍କୁ ନେଇ ପୋଲିସ ଓ ବାଳ ସୁଧାର ଗୃହର ସୁପରିଣ୍ଟେଣ୍ଡେଣ୍ଟଙ୍କ ମଧ୍ୟରେ ମୁହଁ।ମୁହିଁ ପରିସ୍ଥିତି ସୃଷ୍ଟି ହୋଇଥିବା ଚର୍ଚ୍ଚାର ବିଷୟ ହୋଇଛି। ସୂଚନା ଅନୁଯାୟୀ, ଭଦ୍ରକ ଜିଲାର ସମ୍ପୃକ୍ତ ନାବାଳକ ଅଭିଯୁକ୍ତଙ୍କୁ ଅନୁଗୋଳ ବାଳ ସୁଧାର ଗୃହକୁ ଭଦ୍ରକ ପୋଲିସ ଧରି ଆସିଥିଲା। କିନ୍ତୁ ବାଳ ସୁଧାର ଗୃହର ସୁପରିଣ୍ଟେଣ୍ଡେଣ୍ଟ ନାବାଳକଙ୍କ କୋଭିଡ ପରୀକ୍ଷାର ପ୍ରମାଣପତ୍ର ଖୋଜିଥିଲେ। କିନ୍ତୁ ଭଦ୍ରକ ପୋଲିସ ନାବାଳକ ଜଣଙ୍କ ୧୪ ଦିନିଆ କ୍ବାରାଣ୍ଟାଇନ୍ ଶେଷ କରିଥିବା କହିଥିଲେ। ହେଲେ ସୁପରିଣ୍ଟେଣ୍ଡେଣ୍ଟ ଭିତରକୁ ପ୍ରବେଶ ପାଇଁ ଅନୁମତି ପ୍ରଦାନ କରି ନ ଥିଲେ। ଖବରପାଇ ଅନୁଗୋଳ ଥାନା ଅଧିକାରୀ ରମେଶ ଚନ୍ଦ୍ର ବିଶୋଇ ପହଞ୍ଚି ସୁପରିଣ୍ଟେଣ୍ଡେଣ୍ଟଙ୍କ ସହ କଥା ହୋଇଥିଲେ। କିନ୍ତୁ କୋର୍ଟଙ୍କ ନିର୍ଦ୍ଦେଶ ମୁତାବକ କରୋନା ସମୟରେ ବାହାର ଜିଲାର ଅଭିଯୁକ୍ତଙ୍କୁ ବାଳ ସୁଧାର ଗୃହରେ ପୂରାଇ ନ ଦେବାକୁ ନିର୍ଦ୍ଦେଶନାମା ଜାରି କରାଯାଇଥିବା ସୁପରିଣ୍ଟେଣ୍ଡେଣ୍ଟ କହିଥିଲେ। ପରେ ନାବାଳକଙ୍କୁ ଧରି ଭଦ୍ରକ ଓ ଅନୁଗୋଳ ପୋଲିସ ଫେରି ଆସିଥିଲା। କିନ୍ତୁ ରାତି ଅଧରେ ପୁଣି ବାଳ ସୁଧାର ଗୃହର ସୁପରିଣ୍ଟେଣ୍ଡେଣ୍ଟଙ୍କ ଉପରେ ବିଭିନ୍ନ ମହଲରୁ ଚାପ ପକାଯାଇ ନାବାଳକ ଅଭିଯୁକ୍ତଙ୍କୁ ଭିତରେ ଛଡ଼ାଯାଇଥିବା ଚର୍ଚ୍ଚା ହେଉଛି। ସମ୍ପୃକ୍ତ ନାବଳକ ଅଭିଯୁକ୍ତଙ୍କୁ ସିକ୍ ରୁମ୍ରେ କ୍ବାରାଣ୍ଟାଇନ୍ରେ ରଖାଯାଇଛି। ଯୋଗାଯୋଗ ସମ୍ଭବ ନ ହେବାରୁ ଅନୁଗୋଳ ପୋଲିସର ମତାମତ ମିଳିପାରି ନାହିଁ।