Close up of male hands in bracelets behind back
ଭୁବନେଶ୍ୱର,୧୧।୧୧(ବ୍ୟୁରୋ) : ଜଣେ ନାବାଳିକାଙ୍କୁ ଅପହରଣ କରିବା ପରେ ବଳାତ୍କାର କରିବା ମାମଲାର ୪ବର୍ଷ ପରେ ନୟାପଲ୍ଲୀ ଥାନା ପୋଲିସ ଅଭିଯୁକ୍ତଙ୍କୁ ଗିରଫ କରିଛି। ସେ ହେଲେ ୟୁନିଟ୍-୮ କ୍ୟାରମ୍ଫିଲ୍ଡ ବସ୍ତିର ଗଣେଶ ସେଠୀ(୨୨)। ତାଙ୍କୁ ପଚରାଉଚରା ପରେ କୋର୍ଟଚାଲାଣ କରାଯାଇଛି।
ପୋଲିସ ସୂଚନା ଅନୁଯାୟୀ, ୨୦୧୫ରେ ଉକ୍ତ ନାବାଳିକାଙ୍କୁ ଅଭିଯୁକ୍ତ ଗଣେଶଙ୍କ ଭାଇ ଏକ ତରଫା ଭଲ ପାଉଥିଲେ। ତାଙ୍କୁ ବାରମ୍ବାର ହଇରାଣ କରିବା ସହ ଉଠାଇନେବାକୁ ଧମକ ଦେଉଥିଲେ। ନାବାଳିକା ଜଣକ ପରିବାର ଲୋକଙ୍କୁ ଜଣାଇବା ପରେ ଗଣେଶ ଓ ତା’ର ଭାଇ ନାବାଳିକାଙ୍କୁ ଅପହରଣ କରି ନେଇ ଭୁବନେଶ୍ୱରର ଏକ ବସ୍ତିରେ ରଖି ବଳାତ୍କାର କରିଥିଲେ। ନାବାଳିକାଙ୍କୁ ନ ପାଇବାରୁ ପରିବାର ଲୋକେ ନୟାପଲ୍ଲୀ ଥାନାରେ ଅଭିଯୋଗ କରିଥିଲେ। ପୋଲିସ ଏକ ମାମଲା ରୁଜୁ କରି ତଦନ୍ତ ଆରମ୍ଭ କରିଥିଲା। ପୋଲିସ ଟିମ୍ ଉକ୍ତ ବସ୍ତିରେ ଚଢ଼ାଉ କରି ନାବାଳିକାଙ୍କୁ ଉଦ୍ଧାର କରିବା ସହ ଗଣେଶଙ୍କ ଭାଇଙ୍କୁ ଗିରଫ କରିଥିଲା। ଉକ୍ତ ନାବାଳିକାଙ୍କୁ ସେମାନେ ଜବରଦସ୍ତ ଅନୈତିକ କାର୍ଯ୍ୟରେ ଲଗାଉଥିଲେ। ନାବାଳିକା ଜଣକ ପୋଲିସ ଆଗରେ ଏକଥା କହିବା ପରେ ଗଣେଶ ଫେରାର ହୋଇଯାଇଥିଲେ। ସେ କିଛିଦିନ ବାହାରେ ରହିବା ପରେ କ୍ୟାରମଫିଲ୍ଡ ଅଞ୍ଚଳରେ ଥିବା ଘରେ ଆସି ରହୁଥିଲେ। ଇତିମଧ୍ୟରେ ଘଟଣା ସମୟରେ ଥାନାରେ ଥିବା ଅଧିକାରୀଙ୍କ ବଦଳି ହୋଇଯାଇଥିବାରୁ ଉକ୍ତ ମାମଲାକୁ ଆଉ ଗୁରୁତ୍ୱ ଦିଆଯାଇ ନ ଥିଲା। ଗତ ୩ମାସ ହେବ ଏହି ଥାନାଞ୍ଚଳରେ ରହୁଥିବା ଜଣେ ଆଇଏଏସ୍ ଅଫିସରଙ୍କ ଘରୁ ଚୋରି ମାମଲାରେ ପୋଲିସ ଗଣେଶଙ୍କ ଭାଇ ଓ ଅନ୍ୟ ଦୁଇଜଣଙ୍କୁ ଗିରଫ କରି ପଚରାଉଚରା କରିଥିଲା। ଏହି ସମୟରେ ଗଣେଶଙ୍କ ନାମରେ ବଳାକତ୍ାର ମାମଲା ରହିଥିବା ଜଣାପଡ଼ିଥିଲା।