ପାଟଣା,୧୧।୧(ସ୍ବ.ପ୍ର.): କେନ୍ଦୁଝର ଜିଲା ପାଟଣା ରେଞ୍ଜ ଟେଣ୍ଡେରା ପଞ୍ଚାୟତ ହରିହରପୁର ଗ୍ରାମରେ ଶୁକ୍ରବାର ରାତିରେ ଏକ ଅଭାବନୀୟ ଘଟଣା କ୍ରମରେ ଏକ ଗୋଠଛଡା ଦନ୍ତା ଜଣେ ୧୧ବର୍ଷୀୟା ଝିଅକୁ କଚାଡ଼ି ମାରିଦେଇଥିଲା। ଏହାକୁ ନେଇ ସ୍ଥାନୀୟ ଅଞ୍ଚଳରେ ଭୟର ବାତାବରଣ ସହ ଉତ୍ତେଜନା ସୃଷ୍ଟି ହୋଇଛି। ଶନିବାର ଉତ୍ତ୍ୟକ୍ତ ଲୋକେ କ୍ଷତିପୂରଣ ଦାବିରେ ରାଞ୍ଚି ବିଜୟୱାଡା ୨୨୦ ନଂ. ଜାତୀୟ ରାଜପଥର ପାଟଣା ସାହାରପଡା ରାସ୍ତାର ବଡ଼ବିଲି ଛକ ନିକଟରେ ରାସ୍ତା ଅବରୋଧ କରିଥିଲେ। ଏପରିକି ଲୋକମାନେ ସାହାରପଡ଼ା ତହସିଲଦାର ଲମ୍ବୋଦର ଖୁଣ୍ଟିଆଙ୍କୁ ଅଟକ ରଖିଥିଲେ। ଖବର ପାଇ ପାଟଣା ଥାନାଧିକାରୀ ସଂଧ୍ୟାରାଣୀ ଜେନା ଘଟଣାସ୍ଥଳରେ ପହଞ୍ଚି ଉତ୍ତ୍ୟକ୍ତ ଲୋକଙ୍କୁ କ୍ଷତିପୂରଣ ଦେବାର ପ୍ରତିଶ୍ରୁତି ଦେବା ପରେ ରାସ୍ତାରୋକୋ ହଟିଥିବା ଜଣାପଡ଼ିଛି।
ପ୍ରକାଶଯୋଗ୍ୟ, ମୃତ ଶିଶୁକନ୍ୟା ହେଉଛନ୍ତି ଶୈଳେନ୍ଦ୍ରୀ ମହାନ୍ତଙ୍କ ଝିଅ ସୁବାସିନୀ ମହାନ୍ତ। ସୁବାସିନୀ ମେଧାବୀ ଛାତ୍ରୀ ଥିଲେ। ଶନିବାର ସେ ନବୋଦୟ ପ୍ରବେଶିକା ପରୀକ୍ଷା ଦେଇଥାନ୍ତେ। ହେଲେ ଏହା ପୂର୍ବରୁ ଶୁକ୍ରବାର ରାତିରେ ଦନ୍ତା ଆକ୍ରମଣରେ ତାଙ୍କ ମୃତ୍ୟୁ ଘଟିଛି। ଅପରପକ୍ଷେ ହାତୀଟି ଏବେ ଆହୁରି ହିଂସ୍ର ହୋଇ ଉଠିଛି। ବିଳମ୍ବିତ ରାତିରେ ଭଣ୍ଡାରୀବିଲା, ଗୁଳୁଦୀପଶି ଓ ତୁଳସୀପୁର ଗ୍ରାମରେ ଲୋକଙ୍କ ଘର ଭାଙ୍ଗିଦେବା ସହ ଧାନ ଚାଉଳ ଖାଇଯାଇଛି। ବନ ବିଭାଗ ହାତୀ ଘଉଡାଇବାରେ ବିଫଳ ହେବା ଯୋଗୁଁ ଲୋକଙ୍କ ମଧ୍ୟରେ ଅସନ୍ତୋଷ ବୃଦ୍ଧି ପାଉଛି।
