ପୋର୍ଟ-ଅଉ-ପ୍ରିନ୍ସ (ହାଇତି), ୨୬।୫ (ଏଏଫ୍ପି): ନାବାଳିକାଙ୍କୁ ବଳାତ୍କାର ଅଭିଯୋଗରେ ହାଇତି ଫୁଟବଲ ଫେଡେରେଶନ ମୁଖ୍ୟ ୟଭେସ ଜିନ-ବାର୍ଟଙ୍କୁ ସସ୍ପେଣ୍ଡ କରାଯାଇଛି। ବିଶ୍ୱ ଫୁଟ୍ବଲର ସର୍ବୋଚ୍ଚ ପ୍ରଶାସନିକ ସଂସ୍ଥା ଫିଫା ୭୩ ବର୍ଷୀୟ ବାର୍ଟଙ୍କ ବିପକ୍ଷରେ ଏହି କଡ଼ା ନିଷ୍ପତ୍ତି ନେଇଛି ବୋଲି ଘୋଷଣା କରିଛି। ଜାତୀୟ ଟ୍ରେନିଂ ସେଣ୍ଟରରେ ସେ ଏକାଧିକ ନାବାଳିକା ଖେଳାଳିଙ୍କୁ ଯୌନ ଶୋଷଣ କରିବାର ଅଭିଯୋଗ ହୋଇଛି। ତେବେ ସେ ଏହି ଅଭିଯୋଗକୁ ଖଣ୍ଡନ କରିଛନ୍ତି। ତାଙ୍କୁ ୯୦ ଦିନ ପାଇଁ ସସ୍ପେଣ୍ଡ କରାଯାଇଛି। ତାଙ୍କ ବିରୋଧରେ ତଦନ୍ତ ପ୍ରକ୍ରିୟା ଆରମ୍ଭ ହୋଇଛି। ଫିଫା ଆଚରଣ ବିଧି ଧାରା ୮୪ ଓ ୮୫ ଅନୁଯାୟୀ ହାଇତିଆନ ଫୁଟବଲ ଫେଡେରେଶନ (ଏଫ୍ଏଚ୍ଏଫ୍)ର ଅଧ୍ୟକ୍ଷ ବାର୍ଟଙ୍କୁ ଉଭୟ ଜାତୀୟ ଓ ଅନ୍ତର୍ଜାତୀୟ ଫୁଟବଲ କାର୍ଯ୍ୟକଳାପରୁ ୯୦ ଦିନ ପାଇଁ ବାସନ୍ଦ କରାଯାଇଛି ବୋଲି ସୋମବାର ଫିଫା ତରଫରୁ କୁହାଯାଇଛି। ତଦନ୍ତ ପ୍ରକ୍ରିୟାକୁ ଦୃଷ୍ଟିରେ ରଖି ତାଙ୍କ ବିରୋଧରେ ଏହି ପଦକ୍ଷେପ ଗ୍ରହଣ କରାଯାଇଛି। ଏହି ସାମୟିକ ବାସନ୍ଦାଦେଶ ତୁରନ୍ତ ଆରମ୍ଭ ହୋଇଛି। ହାଇତି ପୋଲିସ୍ ମଧ୍ୟ ଏ ନେଇ ତଦନ୍ତ ଆରମ୍ଭ କରିଛି। ଏହି ଘଟଣାରେ କେତୋଟି ପ୍ରଶ୍ନର ଉତ୍ତର ପାଇଁ ଜଣେ ଜଜ୍ ଫେଡେରେଶନର କେତେଜଣ କର୍ମଚାରୀଙ୍କୁ ହାଜର ହେବାକୁ ନିର୍ଦ୍ଦେଶ ଦେଇଛନ୍ତି।
ଦି ଗାର୍ଡିଆନ୍ରେ ପ୍ରକାଶିତ ଏକ ଖବର ଅନୁଯାୟୀ ଜଣେ ମହିଳା ବାର୍ଟଙ୍କ ବିରୋଧରେ ସାଂଘାତିକ ଅଭିଯୋଗ ଆଣିଛନ୍ତି। ବାର୍ଟ ଗତ କେତେବର୍ଷ ଧରି କେତେଜଣ ସ୍ବଳ୍ପ ବୟସ୍କା ମହିଳା ଖେଳାଳିଙ୍କୁ ଦୁଷ୍କର୍ମ କରି ଆସୁଥିଲେ। ପନଶ୍ଚ ଚୁପ୍ ରହିବାକୁ ସେ ଚାପ ମଧ୍ୟ ପକାଉଥିଲେ। ତେଣୁ ତାଙ୍କୁ ସସ୍ପେଣ୍ଡ କରି ଫିଫା ଏକ ଦୃଷ୍ଟାନ୍ତମୂଳକ ନିଷ୍ପତ୍ତି ନେଇଛି ବୋଲି ନ୍ୟାଶନାଲ ନେଟ୍ଓ୍ବର୍କ ଫର୍ ଦି ଡିଫେନ୍ସ ଅଫ୍ ହ୍ୟୁମାନ ରାଇଟ୍ ତରଫରୁ କୁହାଯାଇଛି।