କବିସୂର୍ଯ୍ୟନଗର,୧୭ା୮-ଗଞ୍ଜାମ ଜିଲା କବିସୂର୍ଯ୍ୟନଗର ଥାନା ଅଞ୍ଚଳରେ ଏକ ଗୁରୁବାର ଏକ ଅଭାବନୀୟ ଘଟଣା ଘଟିଛି। ୬ ବର୍ଷିୟା ଜଣେ ନାବାଳିକାଙ୍କୁ ବଳାତ୍କାର କରାଯାଇଛି। ଗୁରୁତର ଅବସ୍ଥାରେ ତାଙ୍କୁ ପ୍ରଥମେ ଆସିକା ଡାକ୍ତରଖାନାକୁ ନିଆଯାଇଥିଲା। ସେଠାରୁ ଅଧିକ ଚିକିତ୍ସା ପାଇଁ ଶୁକ୍ରବାର ସନ୍ଧ୍ୟାରେ ବ୍ରହ୍ମପୁର ବଡ଼ ମେଡିକାଲକୁ ସ୍ଥାନାନ୍ତର କରାଯାଇଥିବା ଆସିକାର ଇନଚାର୍ଜ ଡ଼ା. ଦୀପକ ସାମନ୍ତରା ସୂଚନା ଦେଇଛନ୍ତି। ଅନ୍ୟପକ୍ଷରେ କବିସୂର୍ଯ୍ୟନଗର ପୋଲିସ ଗୁରୁବାରଠାରୁ ଅଭିଯୁକ୍ତଙ୍କୁ ଅଟକ ରଖିଛି । ଏ ନେଇ ଥାନାରେ ପୀଡ଼ିତାଙ୍କ ସମ୍ପର୍କୀୟଙ୍କ ଏତଲା ଦେବା ପରେ ପୋଲିସ ନଂ.୧୯୧/୧୯ରେ ଏକ ମାମଲା ରୁଜୁ କରି ତଦନ୍ତ ଆରମ୍ଭ କରିଛି। ସାଇଣ୍ଟିଫିକ୍ ଟିମ ମଧ୍ୟ ଘଟଣାସ୍ଥଳକୁ ଯାଇ ତଦନ୍ତ କରିଛନ୍ତି ।
ପ୍ରକାଶ ଯେ, ନାବାଳିକା ଜଣଙ୍କ ତାଙ୍କ ଅଜା ଘରେ ରହୁଥିଲେ। ଗୁରୁବାର ରାକ୍ଷୀ ପୂର୍ଣ୍ଣିମାରେ ସେ ସାଙ୍ଗମାନଙ୍କ ସହ ଗାଁରେ ବୁଲୁଥିଲେ। ଏହି ସମୟରେ ଉକ୍ତ ଗ୍ରାମର ଜଣେ ବିବାହିତ ବ୍ୟକ୍ତି ନାବାଳିକାଙ୍କ ୨ ସାଙ୍ଗଙ୍କୁ ଲଡ଼ୁ ଦେଇ ଘରକୁ ପଠାଇ ଦେଇଥିଲେ। ପୀଡ଼ିତା ନାବାଳିକାଙ୍କୁ ଘରେ ଛାଡି ଦେବେ କହି ଗାଁ ଶେଷରେ ଥିବା ଏକ ଗଛମୂଳକୁ ନେଇ ବଳାତ୍କାର କରିଥିବା ଅଭିଯୋଗ ହୋଇଛି।