ଅନୁଗୋଳ ଅଫିସ, ୨୩।୭
ଅନୁଗୋଳ ବସ୍ଷ୍ଟାଣ୍ଡସ୍ଥିତ ଆହାରକେନ୍ଦ୍ର ପଛପଟେ ଗତ ଶନିବାର ବିଳମ୍ବିତ ରାତିରେ ଘଟିଥିବା ନାବାଳିକା ବଳାତ୍କାର ଘଟଣାର ତଦନ୍ତ ପ୍ରକ୍ରିୟାକୁ ଜୋରଦାର କରିଛି ପୋଲିସ। ଘଟଣା ପରଠାରୁ ୫ଜଣଙ୍କୁ ଅଟକ ରଖି ପଚରାଉଚରା କରିବା ପରେ ଏବେ ମୁଖ୍ୟ ଅଭିଯୁକ୍ତଙ୍କ ନିକଟତର ହୋଇଥିବା ପୋଲିସ ସୂଚନା ଦେଇଛି। ଏପରି କି ସନ୍ଦେହ କରାଯାଉଥିବା ଜଣେ ଅଭିଯୁକ୍ତଙ୍କ ପିନ୍ଧା ବସ୍ତ୍ର ପରୀକ୍ଷା ପାଇଁ ପଠାଇ ଦେଇଛି। ଯଦି ରିପୋର୍ଟ ମେଳ ଖାଏ ତା’ହେଲେ ସମ୍ପୃକ୍ତ ଅଭିଯୁକ୍ତଙ୍କୁ ତୁରନ୍ତ ଗିରଫ କରାଯିବ ବୋଲି ଅନୁଗୋଳ ପୋଲିସର ଜଣେ ଅଧିକାରୀ ସୂଚନା ଦେଇଛନ୍ତି। ତେବେ କଟକରେ ଚିକିତ୍ସିତ ହେଉଥିବା ପୀଡ଼ିତାଙ୍କ ସ୍ବାସ୍ଥ୍ୟାବସ୍ଥା ଭଲ ରହିଛି ଓ ସେ ରବିବାର ହାତ ଠାରି ପାଣି ପିଇବାକୁ ମାଗିଥିବା ସମ୍ପୃକ୍ତ ଅଧିକାରୀ ସୂଚନା ଦେଇଛନ୍ତି।
ଏହି ସମ୍ବେଦନଶୀଳ ମାମଲାର ତଦନ୍ତ କରୁଥିବା ଅନୁଗୋଳ ପୋଲିସ ପଚରାଉଚରା ପାଇଁ ରବିବାର ସହର ଆଖପାଖ ଅଞ୍ଚଳରୁ ୫ ଜଣ ସନ୍ଦିଗ୍ଧଙ୍କୁ ଉଠାଇଆଣିଥିଲା। ପରେ ସେମାନଙ୍କ ମଧ୍ୟରୁ ଜଣଙ୍କୁ ଛାଡ଼ି ଦେଇଥିଲା। ଏହି ତଦନ୍ତ ପ୍ରକ୍ରିୟାରୁ ଅଭିଯୁକ୍ତ ସମ୍ପର୍କରେ କିଛି ପ୍ରମାଣ ମିଳିବାର ଆଶା ରହିଛି। ଏପରି କି ପୋଲିସ ଅଭିଯୁକ୍ତଙ୍କ ନିକଟରେ ଖୁବ୍ଶୀଘ୍ର ପହଞ୍ଚିଯିବ ବୋଲି ଲାଗୁଛି। ଯଦି ପୋଲିସ ଖୋଜୁଥିବା ପ୍ରମାଣ ମିଳିଯାଏ ତା’ହେଲେ ସମ୍ପୃକ୍ତ ଅଭିଯୁକ୍ତଙ୍କୁ ତୁରନ୍ତ ଗିରଫ କରାଯିବ ବୋଲି ଏସ୍ଡିପିଓ ଅଶ୍ୱନୀ ସାହୁ ସୂଚନା ଦେଇଛନ୍ତି। ଚିକିତ୍ସିତ ନାବାଳିକାଙ୍କ ସୁରକ୍ଷା ପାଇଁ କଟକ ବଡ଼ ମେଡିକାଲରେ ପୋଲିସର ଏକ ସ୍ବତନ୍ତ୍ର ଟିମ୍ ଦାୟିତ୍ୱରେ ଥିବା ଏସ୍ଡିପିଓ କହିଛନ୍ତି। ସେହିପରି ଜିଲା ପ୍ରଶାସନ ପକ୍ଷରୁ ନାବାଳିକାଙ୍କ ସମସ୍ତ ଚିକିତ୍ସା ଖର୍ଚ୍ଚ ବହନ କରାଯିବ ବୋଲି ଜିଲାପାଳ ଘୋଷଣା କରିଥିବା ଉପଜିଲାପାଳ ବାସୁଦେବ ଶତପଥୀ ସୂଚନା ଦେଇଛନ୍ତି। ନାବାଳିକାଙ୍କ ସ୍ବାସ୍ଥ୍ୟବସ୍ଥା ଉପରେ ନଜର ରଖିବା ପାଇଁ ଏଡିଏମ୍ଓ ମେଡିକାଲଙ୍କୁ ସ୍ବତନ୍ତ୍ର ଦାୟିତ୍ୱ ଜିଲାପାଳ ଦେଇଥିବା ଶତପଥୀ ପ୍ରକାଶ କରିଛନ୍ତି। ତେବେ ପୋଲିସ ବିଭାଗର ଅନ୍ୟଜଣେ ବରିଷ୍ଠ ଅଧିକାରୀଙ୍କ କହିବା ମୁତାବକ ଘଟଣାର ମୁଖ୍ୟ ଅଭିଯୁକ୍ତ ବୋଲି ପୋଲିସ ସନ୍ଦେହ କରୁଥିବା ବ୍ୟକ୍ତିଙ୍କ ପୋଷାକ ଫରେନ୍ସିକ୍ ଯାଞ୍ଚ ପାଇଁ ପଠାଯାଇଛି। ରାତିରେ ପୋଲିସ ଯାଯାବରମାନେ ଶୋଇଥିବା ଦୋକାନ ବାରଣ୍ଡାରେ ପହଞ୍ଚତ୍ ଅଭିଯୁକ୍ତଙ୍କ ବିଷୟରେ ସେମାନଙ୍କୁ ପଚରା ଉଚରା କରିଥିଲା। ସେହିପରି ବଳାତ୍କାରୀଙ୍କୁ ଏଯାଏ ଗିରଫ କରାଯାଇ ପାରି ନ ଥିବାରୁ ସମ୍ପୃକ୍ତା ନାବାଳିକାଙ୍କ ସମ୍ପର୍କୀୟମାନଙ୍କୁ ଅନୁଗୋଳ ପୋଲିସ ଥାନାରେ ରଖି ସେମାନଙ୍କ କଥା ବୁଝାଶୁଝା କରୁଛି। କାଳେ ଅଭିଯୁକ୍ତ ଧରାପଡ଼ିବା ପରେ ସେମାନେ ଅନ୍ୟକେଉଁଆଡ଼େ ଚାଲିଯିବେ, ସାକ୍ଷୀ ନ ଦେବା ଲାଗି କିଏ ପ୍ରଲୋଭନ ଦେଖାଇବ ସେଥିପାଇଁ ପୋଲିସ ସେମାନଙ୍କୁ ନିଜ ହେପାଜତରେ ରଖିଛି।