ନୟାଗଡ଼ ଅଫିସ,୨୮।୫-ପ୍ରଥମ ଶ୍ରେଣୀର ଜଣେ ନାବାଳିକାଙ୍କୁ ଅସଦାଚରଣ କରିବା ମାମଲାର ଶୁଣାଣି କରି ଅତିରିକ୍ତ ଜିଲା ଓ ଦୌରାଜଜ୍ ଅଭିଯୁକ୍ତ ଯୁବକଙ୍କୁ ୫ ବର୍ଷ କାରାଦଣ୍ଡାଦେଶ ପ୍ରଦାନ କରିଛନ୍ତି। ଯୁବକ ଜଣଙ୍କ ହେଲେ ଖଣ୍ଡପଡ଼ା ଥାନା ବେଣାଗାଡ଼ିଆ ଗ୍ରାମର ଅଶୋକ ମୁଦୁଲି ଓରଫ ବରୁଣ (୨୧)।
ପ୍ରକାଶ ଯେ, ଭାପୁର ବ୍ଲକ ଫତେଗଡ଼ ଥାନା ଅଞ୍ଚଳର ପ୍ରଥମ ଶ୍ରେଣୀରେ ପଢ଼ୁଥିବା ଜଣେ ନାବାଳିକା ୯ ଅକ୍ଟୋବର ୨୦୧୫ ମସିହା ଅପରାହ୍ନରେ ଖାଇବା ଛୁଟିରେ ବିଦ୍ୟାଳୟରୁ ଘରକୁ ଖାଇବା ପାଇଁ ଆସୁଥିଲେ। ଘରଠାରୁ ଅଳ୍ପ ଦୂରରେ ବରୁଣ ଏକ ନମ୍ବର ବିହୀନ ହିରୋହୋଣ୍ଡା ଗାଡ଼ିରେ ଆସି ନାବାଳିକାଙ୍କୁ ତାଙ୍କ ମାମୁ ଘରକୁ ନେବେ ବୋଲି କହିଥିଲେ। ନାବାଳିକା ଜଣଙ୍କ ମନା କରିବାରୁ ବରୁଣ ତାଙ୍କୁ ଜୋର ଜବରଦସ୍ତ ବାଇକ୍ରେ ବସାଇ ଅସଦାଚରଣ କରିଥିଲେ। ନାବାଳିକା ଚିତ୍କାର କରିବାରୁ ବରୁଣ ତାଙ୍କୁ ଗାଡ଼ିରେ ବସାଇ ନେଇ ପଳାଇ ଯାଇଥିଲେ। ପରେ ଗ୍ରାମର କେତେକ ଲୋକ ବାଇକ୍ରେ ବରୁଣଙ୍କ ପିଛା କରି କିଛି ଦୂରରେ ତାଙ୍କୁ ଧରିଥିଲେ। ଯୁବକଙ୍କୁ ଗ୍ରାମକୁ ଆଣି ଫତେଗଡ଼ ଥାନାକୁ ଖବର ଦେଇଥିଲେ। ଫତେଗଡ଼ ପୋଲିସ ଗ୍ରାମରେ ପହଞ୍ଚତ୍ ବାଇକ ଉଦ୍ଧାର କରିବା ସହିତ ବରୁଣଙ୍କୁ ଗିରଫ କରିଥିଲା। ଥାନାରେ ୧୧୪/୧୫ରେ ମାମଲା ରୁଜୁ କରାଯାଇ ତାଙ୍କୁ କୋର୍ଟ ଚାଲାଣ କରାଯାଇଥିଲା। ଏହା ପରଠାରୁ ବରୁଣ ନୟାଗଡ଼ ଜେଲ୍ରେ ରହି ଆସୁଥିଲେ। ସୋମବାର ଅତିରିକ୍ତ ଜିଲା ଓ ଦୌରାଜଜ୍ ପ୍ରସନ୍ନ କୁମାର ପଣ୍ଡା ୧୦ ଜଣ ସାକ୍ଷୀଙ୍କ ବୟାନ ଓ ନାବାଳିକାଙ୍କ କଥାକୁ ଭିତ୍ତି କରି ମୁଦାଲା ବରୁଣଙ୍କୁ ଦୋଷୀ ସାବ୍ୟସ୍ତ କରିଥିଲେ। ବରୁଣଙ୍କୁ ୫ ବର୍ଷ କାରାଦଣ୍ଡାଦେଶ ଦେବା ସହିତ ୬ ହଜାର ଟଙ୍କା ଜରିମାନା କରିଥିଲେ। ଜରିମାନା ଅନାଦାୟେ ଅଧିକ ୬ ମାସ କାରାଦଣ୍ଡ ଭୋଗ କରିବାକୁ ପଡ଼ିବ। ସରକାରୀ ଓକିଲ ବଂଶୀଧର ରାଉତରାୟ ମାମଲା ପରିଚାଳନା କରିଥିଲେ।