ନୂଆଦିଲ୍ଲୀ,୨୬ା୬(ପି.ଟି.): ବହିର୍ବ୍ୟାପାର ମନ୍ତ୍ରୀ ଏସ୍. ଜୟଶଙ୍କର ଗୁଜରାଟରୁ ଭାଜପାର ରାଜ୍ୟ ସଭା ପ୍ରାର୍ଥୀ ହୋଇଛନ୍ତି। ଜୁଲାଇ ୫ରେ ହେବାକୁ ଥିବା ଉପନିର୍ବାଚନ ଲାଗି ସେ ମଙ୍ଗଳବାର ନାମାଙ୍କନପତ୍ର ଦାଖଲ କରିଛନ୍ତି।
ଭାଜପାରେ ବିଧିବଦ୍ଧ ଭାବେ ଯୋଗଦେବା ପରେ ଅହମଦାବାଦରେ ସୋମବାର ସନ୍ଧ୍ୟାରେ ପହଞ୍ଚତ୍ଥିଲେ। ଜୟଶଙ୍କର ମଙ୍ଗଳବାର ପ୍ରଥମ ରାଜ୍ୟ ସଭା ଆସନରୁ ନାମାଙ୍କନପତ୍ର ଦାଖଲ କରିଥିବାବେଳେ ଗୁଜରାଟ ଭାଜପା ଓବିସି ସେଲ୍ ଅଧ୍ୟକ୍ଷ ଯୁଗଲ୍ଜୀ ଠାକୁର ଦ୍ୱିତୀୟ ଆସନରୁ ପ୍ରାର୍ଥୀ ହୋଇଛନ୍ତି। ରିଟର୍ନିଂ ଅଫିସର ସି.ବି. ପାଣ୍ଡେୟଙ୍କ ନିକଟରେ ନାମାଙ୍କନପତ୍ର ଦାଖଲ ବେଳେ ଗୁଜରାଟ ମୁଖ୍ୟମନ୍ତ୍ରୀ ବିଜୟ ରୁପାନୀ ଓ ଭାଜପା ରାଜ୍ୟ ସଭାପତି ଜୁତୁ ବଘାନୀ ଉପସ୍ଥିତ ଥିଲେ।
ପ୍ରକାଶ ଯେ, ୬୪ ବର୍ଷୀୟ ଜୟଶଙ୍କର ମୋଦି ସରକାରଙ୍କ ପ୍ରଥମ ପାଳିରେ ବହିର୍ବ୍ୟାପାର ସଚିବ ଭାବେ କାର୍ଯ୍ୟକରିଥିଲେ। ଦ୍ୱିତୀୟ ପାଳି ସରକାରରେ ତାଙ୍କୁ କ୍ୟାବିନେଟରେ ସ୍ଥାନ ମିଳିଛି। ନିୟମାନୁସାରେ ପାର୍ଲାମେଣ୍ଟର ସଦସ୍ୟ ନ ଥିବା ଜଣେ ମନ୍ତ୍ରୀଙ୍କୁ ଶପଥ ନେବାର ୬ ମାସ ମଧ୍ୟରେ ଗୃହକୁ ନିର୍ବାଚିତ ହେବାକୁ ପଡ଼ିଥାଏ। ମଙ୍ଗଳବାର ନାମାଙ୍କନପତ୍ର ଦାଖଲର ଶେଷଦିନ ଥିବାବେଳେ ଜୁନ୍ ୨୬ରେ ଯାଞ୍ଚ କରାଯିବ। ପ୍ରାର୍ଥତ୍ପତ୍ର ପ୍ରତ୍ୟାହାରର ଶେଷଦିନ ହେଉଛି ଜୁନ୍ ୨୮। ନିର୍ବାଚନ କମିଶନଙ୍କ ବିଜ୍ଞପ୍ତି ଅନୁସାରେ ଦୁଇ ଆସନରେ ଭିନ୍ନ ଭିନ୍ନ ଭାବେ ନିର୍ବାଚନ ହେବାକୁ ଥିବାରୁ ଆସନସଂଖ୍ୟା ଦୃଷ୍ଟିରୁ ଭାଜପା ଜିତିବା ସମ୍ଭାବନା ରହିଛି। କଂଗ୍ରେସ ଦୁଇଟି ରାଜ୍ୟ ସଭା ଆସନ ପାଇଁ ଗୌରବ ପାଣ୍ଡେୟ ଓ ଚନ୍ଦ୍ରିକା ଚୂଡ଼ାସମାଙ୍କୁ ପ୍ରାର୍ଥୀ କରିଛି।
