ରାମପୁର,୧।୧୦: ଉତ୍ତରପ୍ରଦେଶ ରାମପୁରରୁ ସମାଜବାଦୀ ପାର୍ଟି (ଏସ୍ପି)ର ଏମ୍ପି ଥିବା ଆଜମ ଖାନ୍ ସବୁବେଳେ ଚର୍ଚ୍ଚାରେ ରହିଥାନ୍ତି । ହେଲେ ଏବେ ସେ ନିଜ ପାଇଁ ନୁହେଁ ବରଂ ତାଙ୍କ ସ୍ତ୍ରୀଙ୍କ ଲାଗି ଆସିଛନ୍ତି। ଆଜମଙ୍କ ସ୍ତ୍ରୀ ତଞ୍ଜୀନ ଫାତିମା ନାମାଙ୍କନ ଦାଖଲ କରିବା ପୂର୍ବରୁ ଲକ୍ଷାଧିକ ଟଙ୍କାର ଜରିମାନା ଦେଇଥିବା ଜଣାପଡ଼ିଛି। ସୂଚନାଯୋଗ୍ୟ, ରାମପୁର ବିଧାନସଭା ଆସନ ପାଇଁ ହେଉଥିବା ଉପନିର୍ବାଚନରେ ଫାତିମା ଆଶାୟୀ ପ୍ରାର୍ଥୀ ରହିଛନ୍ତି। ତେଣୁ ସୋମବାର ଫାତିମା ପ୍ରାର୍ଥିପତ୍ର ଦାଖଲ କରିଛନ୍ତି। ହେଲେ ଏହା ପୂର୍ବରୁ ବିଦ୍ୟୁତ୍ ଚୋରି ଅଭିଯୋଗରେ ସେ ୩୦ଲକ୍ଷ ଟଙ୍କା ଜରିମାନା ଦେଇଛନ୍ତି। କିଛି ଦିନ ପୂର୍ବରୁ ଆଜମଙ୍କ ହମ୍ସଫର ରିସୋର୍ଟରେ ଚଢ଼ାଉ କରାଯାଇଥିଲା। ଚଢ଼ାଉ ବେଳେ ୫ କିଲୋ ଓ୍ବାଟ୍ ମିଟରରେ ପ୍ରାୟ ୩୩ କିଲୋ ଓ୍ବାଟ୍ର ଲୋଡ୍ ଥିବା ବିଦ୍ୟୁତ୍ ବିଭାଗ ଜାଣିବାକୁ ପାଇଥିଲା। ଏହାପରେ ରିସୋର୍ଟର ଲାଇନ୍କୁ କାଟି ଦିଆଯିବା ସହ ବିଦ୍ୟୁତ୍ ବିଭାଗ ପକ୍ଷରୁ ଫାତିମାଙ୍କ ଉପରେ ବିଦ୍ୟୁତ୍ ଚୋରି ଅଧିନିୟମ ଅନୁସାରେ ୩୦ ଲକ୍ଷ ଟଙ୍କାର ଜରିମାନା ଲଗାଯାଇଥିଲା।