ଯାଜପୁର ଅଫିସ,୨୪ା୨: ଯାଜପୁର ଜିଲା ଦଶରଥପୁର ବ୍ଲକ ଅଧୀନ ନନ୍ଦିପୁର ଗ୍ରାମ ପଞ୍ଚାୟତ ଅନ୍ତର୍ଗତ ଚଣ୍ଡିଗୋଳ ହାଟ ନିକଟରେ ଏକ ନକଲି ସିମେଣ୍ଟ କାରଖାନା ଚାଲିଛି। ଏହି ନକଲି ସିମେଣ୍ଟ କାରଖାନା ଦୀର୍ଘବର୍ଷ ଧରି ଚାଲୁଥିବା ସମ୍ପର୍କରେ ସ୍ଥାନୀୟ ଲୋକେ ଅଭିଯୋଗ କରିଆସୁଥିଲେ ମଧ୍ୟ ପ୍ରଶାସନ ସବୁ ଜାଣି ନ ଜାଣିଲା ଭଳି ଅଭିନୟ କରୁଥିବା ଅଭିଯୋଗ ହୋଇଛି। ବିଭିନ୍ନ ନାମୀଦାମୀ ବ୍ରାଣ୍ଡ କମ୍ପାନୀର ଅଖାରେ ଭର୍ତ୍ତି କରାଯାଇ ଏହି ନକଲି ସିମେଣ୍ଟ ବଜାରକୁ ଛଡାଯାଉଛି। ଯାହାକୁ କିଛି ଅସାଧୁ ବ୍ୟବସାୟୀଙ୍କ ମାଧ୍ୟମରେ ଏହି ସିମେଣ୍ଟ ଶସ୍ତାରେ ସ୍ଥାନୀୟ ଜନସାଧାରଣ, ଠିକାଦାର ଓ ଆଖପାଖ ଅଞ୍ଚଳରେ ଆବାସ ଯୋଜନାର ଘର ପାଇଥିବା ହିତାଧିକାରୀଙ୍କୁ ଯୋଗାଇ ଦିଆଯାଉଛି। ଫଳରେ ଏହି ସିମେଣ୍ଟରେ ନିର୍ମାଣ କରାଯାଉଥିବା ଘର, ରାସ୍ତାଘାଟର ସ୍ଥାୟୀତ୍ୱ ଦୀର୍ଘସ୍ଥାୟୀ ହୋଇପାରୁ ନାହିଁ। ପକ୍କାଘର ଖଣ୍ଡେ କରିବା ସବୁଲୋକଙ୍କ ପାଇଁ ସ୍ବପ୍ନ ହୋଇଥିବାବେଳେ ଅନେକ ଗରିବ ଏହି ନକଲି ସିମେଣ୍ଟ କିଣି ଅସୁବିଧାରେ ପଡିବାକୁ ଯାଉଛନ୍ତି ତାହା ସହଜେ ଅନୁମେୟ। ସ୍ଥାନୀୟ କିଛି ରାଜନେତା, ସରକାରୀ ଅଧିକାରୀ ଓ ମାଫିଆଙ୍କ ସହାୟତାରେ ଏହି ବ୍ୟବସାୟ ଚାଲି ଆସୁଥିଲେ ମଧ୍ୟ ଏହାକୁ ରୋକିବା ନିମନ୍ତେ କୌଣସି କାର୍ଯ୍ୟାନୁଷ୍ଠାନ ନିଆଯାଇ ନ ଥିବା ଜଣାଯାଇଛି। ତେଣୁ ଜିଲାପାଳ ଓ ଏସ୍ପି ଏହି ଘଟଣାର ଗୁରୁତ୍ୱକୁ ଉପଲବ୍ଧି କରି ଉକ୍ତ ବେଆଇନ କାରଖାନାକୁ ସିଲ କରିବା ସହିତ ଏହାସହ ସମ୍ପୃକ୍ତ ବ୍ୟବସାୟୀଙ୍କୁ ଗିରଫ କରିବା ନିମନ୍ତେ ଜନସାଧାରଣଙ୍କ ତରଫରୁ ଦାବି ହେଉଛି। ଏ ସଂକ୍ରାନ୍ତରେ ମଙ୍ଗଳପୁର ଥାନା ଆଇଆଇସି ଅସିତ କୁମାର ମହାନ୍ତିଙ୍କୁ ପଚାରିବାରୁ, ଏ ବିଷୟରେ ସେ କିଛି ଜାଣି ନାହାନ୍ତି କି ତାଙ୍କ ନିକଟରେ କେହି ଅଭିଯୋଗ କରି ନାହାନ୍ତି। ଯଦି ଘଟଣାରେ ସତ୍ୟାସତ୍ୟ ଥାଏ ତେବେ ଏହା ଉପରେ ତଦନ୍ତ କରାଯାଇ ନିଶ୍ଚିତ କାର୍ଯ୍ୟାନୁଷ୍ଠାନ ନିଆଯିବ ବୋଲି କହିଛନ୍ତି।