ବଅଁରପାଳ, ୨୬ା୯(ଡି.ଏନ.ଏ.) – ନାଲ୍କୋ ବିଦ୍ୟୁତ ପ୍ରକଳ୍ପରେ ଏବେ କୋଇଲା ସଙ୍କଟ ଯୋଗୁ ୧୦ରୁ ୫ଟି ୟୁନିଟ ବନ୍ଦ ରହିଛି। ଫଳରେ ସିପିପି ପ୍ଲାଣ୍ଟରୁ ବିଦ୍ୟୁତ ଉତ୍ପାଦନ ହ୍ରାସ ପାଇଛି। ଏହାର କୁପ୍ରଭାବ ସ୍ମେଲଟର ପ୍ଲାଣ୍ଟ ଉପରେ ପଡିଛି। ସ୍ମେଲଟରରେ ୯୬୦ ଟି ପଟ୍ ଥିବାବେଳେ ବୁଧବାର ସୁଦ୍ଧା ୨୦ଟି ପଟ୍ ବନ୍ଦ ରହିଛି। ସିପିପିରେ ବିଦ୍ୟୁତ ଉତ୍ପାଦନ ହ୍ରାସ ପାଇବା ଯୋଗୁ ପଟଗୁଡିକ ଲୋ କିଲୋ ଆମ୍ପିୟରରେ ଚାଲିଛି। ବୁଧବାର ପଟଲାଇନ-୧ ୧୬୭ କିଲୋ ଆମ୍ପିୟରରେ ଚାଲିଛି। ସେହିପରି ପଟଲାଇନ-୨ ୧୬୭ ଆମ୍ପିୟର, ପଟଲାଇନ-୩ ୧୭୪ ଓ ପଟଲାଇନ-୪ ୧୬୪ କିଲୋ ଆମ୍ପିୟରରେ ଚାଲିଛି। ବର୍ତ୍ତମାନ ନାଲ୍କୋ କର୍ତ୍ତୃପକ୍ଷ ଗ୍ରୀଡରୁ ଚଢ଼ାଦରରେ ବିଦ୍ୟୁତ୍ ଶକ୍ତି କ୍ରୟ କରି ପ୍ଲାଣ୍ଟକୁ ଚଳାଉଛନ୍ତି। ସିପିପିରୁ ବିଦ୍ୟୁତ ହ୍ରାସ ଯୋଗୁ କର୍ତ୍ତୃପକ୍ଷ ଶତାଧିକ ପଟକୁ ବନ୍ଦ କରିବା ପାଇଁ ଯୋଜନା କରିଛନ୍ତି। ମଙ୍ଗଳବାର ୧୦ଟି ପଟ୍ ବନ୍ଦ ହୋଇଥିବାବେଳେ ବୁଧବାର ଆଉ ୧୦ଟି ପଟ୍ ବନ୍ଦ କରାଯାଇଛି। ଏଥିଯୋଗୁ ସ୍ମେଲଟର ପ୍ଲାଣ୍ଟରେ ଆଲୁମିନିୟମ ଉତ୍ପାଦନ ହ୍ରାସ ପାଇଛି। ଗୋଟିଏ ପଟ୍ ୧୮୫ କିଲୋ ଆମ୍ପିୟରରେ ଚାଲିଲେ ୧୪୫୦ କେଜି ତରଳ ଆଲୁମିନିୟମ ଉତ୍ପାଦନ ହୋଇଥାଏ। ହେଲେ ବର୍ତ୍ତମାନ ପଟଗୁଡିକ ଲୋ ଆମ୍ପିୟରରେ ଚାଲିବା ଯୋଗୁ ଗୋଟିଏ ପଟ୍ରୁ ୮୫୦ରୁ ୯୦୦ କେଜି ଆଲୁମିନିୟମ ଉତ୍ପାଦନ ହେଉଛି। କ୍ୟାପିଟାଲ ରିପେୟାର ନାମରେ କୋଟି କୋଟି ଟଙ୍କା ଖର୍ଚ୍ଚ କରାଯାଉଥିଲେ ମଧ୍ୟ ପଟ୍ ବନ୍ଦ କରାଯିବାକୁ ନେଇ ନେସ୍ ସଙ୍ଗଠନ ପକ୍ଷରୁ ସାଧାରଣ ସମ୍ପାଦକ ନିର୍ମଳ ସାମଲ ଉଦ୍ବେଗ ପ୍ରକାଶ କରିଛନ୍ତି।