ବଅଁରପାଳ, ୨୪।୬(ଡି.ଏନ.ଏ.) ନାଲ୍କୋ ସ୍ମେଲଟର ପ୍ଲାଣ୍ଟ ସ୍ବୀକୃତି ପ୍ରାପ୍ତ ଶ୍ରମିକ ସଙ୍ଗଠନ ଆଲୁମିନିୟମ ମଜଦୁର ସଂଘ (ଏଏମ୍ଏସ୍)ରେ କିଛି ଦିନ ହେଲା ଫାଟ ସୃଷ୍ଟି ହୋଇଛି। ଏଥିଯୋଗୁ ସଂଘ ୨ ଗୋଷ୍ଠୀରେ ପରିଣତ ହେବା ସହ ସଭାପତି ଓ ସମ୍ପାଦକ ପଦବୀକୁ ନେଇ ବିବାଦ ଦେଖାଦେଇଛି। ଏ ନେଇ ହାଇକୋର୍ଟରେ ମାମଲା ହେବା ପରେ ୧୪ ଦିନ ମଧ୍ୟରେ ପୁନଃ ନିର୍ବାଚନ କରି କର୍ମକର୍ତ୍ତା ଚୟନ କରିବାକୁ ନିର୍ଦ୍ଦେଶ ଦିଆଯାଇଥିଲା। ହେଲେ ଏହି ମହଲତ ପୂରିଥିଲେ ମଧ୍ୟ ନିର୍ଦ୍ଦେଶ ପାଳନ କରାଯାଇ ନ ଥିବା ଜଣାପଡିଛି।
ସୂଚନା ମୁତାବକ, ପୂର୍ବରୁ ସୁବାସ ଚନ୍ଦ୍ର ସାହୁ ସଭାପତି ଓ ସାଧାରଣ ସମ୍ପାଦକ ଭାବେ ରମେଶ ଚନ୍ଦ୍ର ବେହେରା ମନୋନୀତ ହୋଇଥିଲେ। ବିବାଦ ପରେ ଅନ୍ୟ ଏକ ଗୋଷ୍ଠୀ ସୃଷ୍ଟି ହେବାରୁ ଏହାର ସଭାପତି ଭାବେ ମୁନା ସାମଲ ଓ ସାଧାରଣ ସମ୍ପାଦକ ଭାବେ ଗୋପାଳ ଚନ୍ଦ୍ର ମଲ୍ଲିକଙ୍କୁ ଏହି ଗୋଷ୍ଠୀ ଚୟନ କରିଥିଲା। ଉଭୟ ଗୋଷ୍ଠୀ ନାଲ୍କୋ କର୍ତ୍ତୃପକ୍ଷଙ୍କଠାରେ ନିଜର ପଦବୀକୁ ଜାହିର କରି ସାରିଛନ୍ତି। ଇତି ମଧ୍ୟରେ ନାଲ୍କୋ କର୍ତ୍ତୃପକ୍ଷ ଗୋଟିଏ ଗୋଷ୍ଠୀକୁ ନାଲ୍କୋର ଏକ ବୈଠକକୁ ଡାକିବା ପରେ ଅନ୍ୟ ଗୋଷ୍ଠୀ ମଧ୍ୟରେ ଅସନ୍ତୋଷ ପ୍ରକାଶ ପାଇଥିଲା। ପ୍ରକୃତ ମାନ୍ୟତା କେଉଁ ଗୋଷ୍ଠୀକୁ ଦିଆଯିବ ସେ ନେଇ ମୁନା ସାମଲଙ୍କ ଗୋଷ୍ଠୀ ପକ୍ଷରୁ ଶ୍ରମି ବିଭାଗର ଦୃଷ୍ଟି ଆକର୍ଷଣ କରାଯାଇଥିଲା। କୌଣସି ସମାଧାନ ନ ହେବାରୁ ସମ୍ପୃକ୍ତ ଗୋଷ୍ଠୀ ପକ୍ଷରୁ ଗୋପାଳକୃଷ୍ଣ ମଲ୍ଲିକ, ସଞ୍ଜୟ ଦେହୁରୀ, ଶିବରାମ ସେଠୀ, ବରୁଣ କୁମାର ବେହେରା ପ୍ରମୁଖ ହାଇକୋର୍ଟଙ୍କ ଦ୍ୱାରସ୍ଥ ହୋଇଥିଲେ। ଗତ ୧୦ ତାରିଖରେ ହାଇକୋର୍ଟ ଦେଇଥିବା ଅର୍ଡର ନଂ ଡବ୍ଲ୍ୟୁପି/ସି କେସ୍ ନଂ. ୧୦୨୯୯/୧୯ରେ ଏହାର ଶୁଣାଣି କରିଥିଲେ। ୧୪ ଦିନ ମଧ୍ୟରେ ନିର୍ବାଚନ କରି କର୍ମକର୍ତ୍ତା ଚୟନ କରାଯିବାକୁ ନାଲ୍କୋନଗର ସହକାରୀ ଶ୍ରମ କମିଶନରଙ୍କୁ ନିର୍ଦ୍ଦେଶ ଦିଆଯାଇଥିଲେ ମଧ୍ୟ ଏହା ହୋଇ ନ ଥିବା ଜଣାପଡିଛି।
ଏ ନେଇ ରମେଶ ଚନ୍ଦ୍ର ବେହେରା କହିଛନ୍ତି, ସଂଘର କର୍ମକର୍ତ୍ତା ଚୟନ ହୋଇଥିଲା। ତେବେ ପ୍ରକୃତ କର୍ମକର୍ତ୍ତା ମାନ୍ୟତା ପାଇଁ ହାଇକୋର୍ଟରେ କେତେଜଣ ମାମଲା କରିଛନ୍ତି। ଆଇନ ଅନୁସାରେ ଯାହା ସମାଧାନ ହେବ। ମୁନା ସାମଲ କୁହନ୍ତି, ସଂଘର କର୍ମକର୍ତ୍ତା ଚୟନ ଠିକ୍ ଭାବେ ହୋଇ ନ ଥିଲା। ତେଣୁ ହାଇକୋର୍ଟରେ ମାମଲା କରାଯାଇଛି। ଅନୁଗୋଳ ଶ୍ରମ ଅଧିକାରୀ ଦୁର୍ଯ୍ୟୋଧନ ସେଠୀ କୁହନ୍ତି, କୌଣସି ନିର୍ଦ୍ଦେଶାନାମା ବିଷୟରେ ଜାଣିନାହିଁ। ପରେ ବୁଝି କହିବି।