ଲଣ୍ଡନ, ୨୨|୪: ବିଶ୍ୱର ବିଖ୍ୟାତ କ୍ରିକେଟରଙ୍କ ମଧ୍ୟରୁ ୪ ଜଣଙ୍କ ଖେଳ ସେ ସର୍ବଦା ଦେଖିବାକୁ ପସନ୍ଦ କରିବେ ବୋଲି କହିଛନ୍ତି ପୂର୍ବତନ ଇଂଲଣ୍ଡ କ୍ରିକେଟ ଅଧିନାୟକ ନାସିର ହୁସେନ। ସେମାନଙ୍କ ମଧ୍ୟରେ ୩ ଜଣ ପୂର୍ବତନ ଓ ଜଣେ ସକ୍ରିୟ କ୍ରିକେଟର। ତେବେ ସକ୍ରିୟ କ୍ରିକେଟର ଜଣଙ୍କ ହେଉଛନ୍ତି ଟିମ୍ ଇଣ୍ଡିଆ ଅଧିନାୟକ ବିରାଟ କୋହଲି।
କ୍ରିକେଟ ଜଗତର ଜଣେ ପ୍ରତିଷ୍ଠିତ ବିଶ୍ଳେଷକ ଏବଂ ଭାଷ୍ୟକାର ଭାବେ ପରିଚିତ ହୁସେନ ପ୍ରଥମେ ପାକିସ୍ତାନର କିମ୍ବଦନ୍ତୀ ଓପନର ସଇଦ ଅନୱରଙ୍କ ନାମ ନେଇଛନ୍ତି। ଅନୱରଙ୍କ ଦୃଷ୍ଟି ଅନ୍ୟମାନଙ୍କ ଅପେକ୍ଷା ଭଲଭାବେ ବଲ୍ ଉପରେ କେନ୍ଦ୍ରିତ ହୋଇଥାଏ। ଏହା ବ୍ୟତୀତ ସେ ଅଫ୍-ସାଇଡ୍ରେ ଖେଳିବାରେ ମାହିର। ଅନ୍ତର୍ଜାତୀୟ କ୍ୟାରିୟରରେ ପାଖାପାଖି ୧୩,୦୦୦ରନ କରିଥିବା ଅନୱର ପାକିସ୍ତାନର ଅନ୍ୟତମ ଶ୍ରେଷ୍ଠ ଖେଳାଳି। ଉଜ୍ଜ୍ୱଳମୟ ୧୪ ବର୍ଷର କ୍ୟାରିୟରରେ ସେ ଉଭୟ ଟେଷ୍ଟ ଓ ଏକଦିବସୀୟରେ ଚମତ୍କାର ପ୍ରଦର୍ଶନ କରିଥିଲେ।
ନାସିର ଦ୍ୱିତୀୟ ଓ ତୃତୀୟରେ ୱେଷ୍ଟଇଣ୍ଡିଜ ଲିଜେଣ୍ଡ ବ୍ରାଏନ ଲାରା ଏବଂ ବିରାଟ କୋହଲିଙ୍କ ବ୍ୟାଟିଂ ଦେଖିବାକୁ ପସନ୍ଦ କରିବେ ବୋଲି କହିଛନ୍ତି। ମୁଁ ଲାରାଙ୍କ ପୁରୁଣା ଫୁଟେଜ୍ ଦେଖିଛି। ତାଙ୍କର ବ୍ୟାକ୍-ଲିଫ୍ଟ ଅତୁଳନୀୟ। ସେହିପରି କୋହଲି ୫୦ ଓଭର ଫର୍ମାଟରେ ରନଚେଜ୍ ମାଷ୍ଟର। ସ୍କୋର ଯେତେ ଥାଉନା କାହିଁକି ବିରାଟ ସବୁବେଳେ ତାହାକୁ ଚେଜ୍ କରିବାର ଦକ୍ଷତା ରଖିଛନ୍ତି ।
ଚତୁର୍ଥରେ ହୁସେନ ଇଂଲଣ୍ଡ କ୍ରିକେଟ ଲିଜେଣ୍ଡ ଡେଭିଡ ଗାୱାରଙ୍କୁ ପସନ୍ଦ କରିଛନ୍ତି। ତାଙ୍କ କଭର ଡ୍ରାଇଭ୍ ଦର୍ଶନୀୟ। ”ଗାୱାର ହେଉଛନ୍ତି ମୋ ପିଲା ଦିନର ଆଦର୍ଶ। କେଣ୍ଟ୍ରେ ଜନ୍ମିତ ଗାୱାର ଇଂଲଣ୍ଡ ପକ୍ଷରୁ ୧୯୭୮ରୁ ୧୯୯୨ ମଧ୍ୟରେ ୧୧,୩୦୦ରୁ ଊର୍ଦ୍ଧ୍ୱ ରନ ସଂଗ୍ରହ କରିଛନ୍ତି। ଏହା ମଧ୍ୟରେ ୨୫ ଶତକ ଏବଂ ୫୧ ଅର୍ଦ୍ଧଶତକ ସାମିଲ।