କଟକ ଅଫିସ, ୫।୪: କରୋନା ସହ ଲଢିବାକୁ ହେଲେ ସାମାଜିକ ଦୂରତା ରକ୍ଷା କରିବାକୁ ପଡ଼ିବ। ଏହାକୁ ନେଇ ସରକାରଙ୍କ ପକ୍ଷରୁ ବ୍ୟାପକ ସଚେତନତା କରାଯାଉଛି । ଏପରିସ୍ଥଳେ କଟକର କିଛି ମହିଳା କରୋନାକୁ ନେଇ ସଚେତନ କରିବାକୁ ଭିନ୍ନ ପ୍ରୟାସ କରିଛନ୍ତି। କରୋନା ସଂକ୍ରମଣକୁ ନେଇ ସେମାନେ ଅତିଥିମାନଙ୍କୁ ଘରକୁ ନ ଆସିବା ପାଇଁ ବାରଣ କରିଛନ୍ତି । ଏଥିପାଇଁ ସେମାନେ ଘର ବାହାରେ ଏବଂ ଫାଟକରେ ପୋଷ୍ଟର ମାରିଛନ୍ତି ।
କଟକ ରାଣୀହାଟ ଶଗଡିଆ ସାହିରେ ରହୁଥିବା ସମାଜସେବୀ ବିଜୟଲକ୍ଷ୍ମୀ ମହାପାତ୍ର ନିଜ ଘରର ଦୁଆର ମୁହଁରେ ‘ଅତିଥିଙ୍କୁ ମନା କରୁଅଛୁ ଯେ କରୋନା ସଂକ୍ରମଣ ଲାଗୀ ଆମେ ଆପଣଙ୍କୁ ଗୃହ ଭିତରକୁ ପଶିବାର ଅନୁମତି ଦେଇ ପାରୁନାହୁଁ । ଘରେ ରୁହନ୍ତୁ ସୁସ୍ଥ ରୁହନ୍ତୁ’ ଲେଖାଥିବା ପୋଷ୍ଟର ଲଗାଇବା ସହ ସମସ୍ତଙ୍କୁ ଏପରି କରିବାକୁ ଆହ୍ଵାନ ଦେଇଛନ୍ତି । ଏହାଦ୍ୱାରା ଅଧିକ ଲୋକ ସଚେତନ ହେବା ସହ କେହି କାହା ଘରକୁ ଆସିବେ ନାହିଁ ବୋଲି ସେ କହିଛନ୍ତି। ତେବେ ଅନେକ୍ ଲୋକେ ତାଙ୍କଠାରୁ ଅନୁପ୍ରାଣିତ ହୋଇ ନିଜ ଘର ବାହାରେ ଏପରି ପୋଷ୍ଟର ଲଗାଉଥିବା ଦେଖିବାକୁ ମିଳିଛି । ବିଜୟଲକ୍ଷ୍ମୀଙ୍କ ପ୍ରୟାସକୁ ସାଧାରଣରେ ପ୍ରଶଂସା କରାଯାଉଛି ।