ଯୋଧପୁର,୧୫।୧୨: ଗୁରୁଦକ୍ଷିଣା ଭାବେ ଛାତ୍ରୀଛାତ୍ରମାନେ ଶିକ୍ଷାଦାତାଙ୍କୁ ବିଭିନ୍ନ ଉପହାର ଦେଇଥାନ୍ତି। ଏହା ଭାରତୀୟ ସଂସ୍କୃତିରେ ବେଶ୍ ପ୍ରଚଳିତ। ରାଜସ୍ଥାନ ପାଲିସ୍ଥିତ ସୁନ୍ଦରନଗରଠାରେ ଥିବା ରାଜଶ୍ରୀ ସ୍କୁଲର ଛାତ୍ରୀଛାତ୍ର ସେମାନଙ୍କ ଶିକ୍ଷୟିତ୍ରୀଙ୍କୁ ଏକ ନିଆରା ଗୁରୁଦକ୍ଷିଣା ଦେଇଛନ୍ତି। ଶିକ୍ଷୟିତ୍ରୀ ହେମା ପ୍ରଜାପତଙ୍କର ମାତାପିତା ନାହାଁନ୍ତି। ତେଣୁ ତାଙ୍କ ବିବାହ ଅବସରରେ ସ୍କୁଲର ୧୨ ଶହ ଛାତ୍ରୀଛାତ୍ର ନିଜର ପକେଟ ଖର୍ଚ୍ଚ ସଂଗ୍ରହ କରି ଏକ ଲକ୍ଷ ୭୧ ହଜାର ଟଙ୍କା ଜମା କରିବା ସହିତ ହେମାଙ୍କ ବିବାହ କରାଇଛନ୍ତି। ଛାତ୍ରୀଛାତ୍ର ହେମାଙ୍କ କନ୍ୟାଦାନ ମଧ୍ୟ କରିଛନ୍ତି। ଛାତ୍ରୀଛାତ୍ରଙ୍କ ଏଭଳି କାର୍ଯ୍ୟରେ ସ୍କୁଲ ପ୍ରବନ୍ଧନ ସହାୟତା କରିଥିଲେ। ଏବେ ଏହା ସୋସିଆଲ୍ ମିଡ଼ିଆରେ ଭାଇରାଲ ହେବାରେ ଲାଗିଛି। ହେମାଙ୍କୁ ୬ ମାସ ହୋଇଥିବାବେଳେ ତାଙ୍କର ପିତାଙ୍କ ମୃତ୍ୟୁ ଘଟିଥିଲା। ସେହିପରି ୧୬ ବର୍ଷ ବୟସରେ ମାତା ଦୁନିଆ ଛାଡ଼ିଥିଲେ। ପାଠପଢ଼ିବା ପରେ ହେମା ରାଜଶ୍ରୀ ସ୍କୁଲରେ ଯୋଗଦେଇଥିଲେ। ସ୍କୁଲ ସମୟ ପରେ ସେ ଛାତ୍ରୀଛାତ୍ରଙ୍କୁ ବିନା ଫିରେ ୨ ଘଣ୍ଟା କୋଚିଂ ଦେଉଥିଲେ ବୋଲି ସ୍କୁଲର ନିର୍ଦ୍ଦେଶକ ରାଜେନ୍ଦ୍ର ସିଂ ଘୁରାସନି କହିଛନ୍ତି।