ନୟାଗଡ଼ ଅଫିସ,୨୯ା୧୦: ନୟାଗଡ଼ ଜିଲାରେ ବିଭିନ୍ନ ସ୍ଥାନରେ ସୋମବାର ନିଆରା ଢଙ୍ଗରେ ଦୀପାବଳି ପାଳିତ ହୋଇଯାଇଛି। ଜିଲା ପ୍ରଶାସନଠାରୁ ଆରମ୍ଭ କରି ବିଭିନ୍ନ କ୍ଲବର ପିଲାମାନେ ଏହାକୁ ସ୍ମରଣୀୟ କରିବା ପାଇଁ ଅନାଥାଶ୍ରମ ଓ ଜରାଶ୍ରମରେ ଦୀପାବଳି ପାଳନ କରିଥିଲେ। ସନ୍ଧ୍ୟାରେ ଏସ୍ପି ଶଶିଭୂଷଣ ଶତପଥୀ ପୁରୁଣା ବସ୍ଷ୍ଟାଣ୍ଡଠାରେ ଥିବା ସେବା ଅନାଥାଶ୍ରମରେ ଏହି ଉତ୍ସବ ପାଳନ କରିଥିଲେ। ଅନାଥ ଓ ଦିବ୍ୟାଙ୍ଗ ପିଲାମାନଙ୍କ ସହିତ ମିଶି ସୁଖଦୁଃଖ ହୋଇଥିଲେ। ଏହା ପରେ ସେମାନଙ୍କୁ ମିଠା ଖୁଆଇଥିଲେ। ଦୀପାବଳିରେ ବାଣ ନୁହେଁ, ମୁହଁରେ ହସ ଫୁଟାଇବା ପାଇଁ ଏହିଭଳି ପ୍ରୟାସ କରାଯାଇଥିବା ଏସ୍ପି ଶତପଥୀ ପ୍ରକାଶ କରିଛନ୍ତି। ଅନ୍ୟମାନଙ୍କ ମଧ୍ୟରେ ନୟାଗଡ଼ ଏସ୍ଡିପିଓ ନିରଞ୍ଜନ ପାଢ଼ୀ, ଡିଆଇବି ଡିଏସ୍ପି ସୁବାସ ଚନ୍ଦ୍ର ମହାନ୍ତି, ସଦର ଥାନା ଅଧିକାରୀ ଅନ୍ନପୂର୍ଣ୍ଣା ବେହେରା ପ୍ରମୁଖ ଉପସ୍ଥିତ ଥିଲେ। ସେହିଭଳି ନୟାଗଡ଼ ବ୍ଲକ ଦୁର୍ଗାପ୍ରସାଦ ଗ୍ରାମରେ ଥିବା ଜୟଦୁର୍ଗା କ୍ଲବର ସଦସ୍ୟମାନେ ମଧ୍ୟ ସେବା ଅନାଥାଶ୍ରମକୁ ଯାଇ ଦୀପାବଳି ପାଳନ କରିଥିଲେ। କ୍ଲବର ଯୁବକମାନେ ପିଲାମାନଙ୍କ ସହିତ ବିଭିନ୍ନ ରଙ୍ଗବେରଙ୍ଗ ଆଲୋକ ସୃଷ୍ଟି କରୁଥିବା ବାଣ ଜଳାଇଥିଲେ। ଏହା ସେମାନଙ୍କୁ ଆନନ୍ଦିତ କରିଥିବା କ୍ଲବର ସଦସ୍ୟମାନେ ପ୍ରକାଶ କରିଛନ୍ତି। ଅପରାହ୍ନରେ ଜିଲାପାଳ ଡ. ପୋମା ଟୁଡ଼ୁ ସମର୍ପଣ ଜରାନିବାସରେ ଅନ୍ତେବାସୀଙ୍କ ସହିତ ଦୀପାବଳି ପାଳନ କରିଥିଲେ। ଅନ୍ୟମାନଙ୍କ ମଧ୍ୟରେ ଉପଜିଲାପାଳ ଲଗ୍ନଜିତ ରାଉତରାୟ ଉପସ୍ଥିତ ଥିଲେ।