ପଦ୍ମପୁର,୧୭।୩(ଡି.ଏନ.ଏ.)- ଭଦ୍ରକ ଜିଲା ସଦର ବ୍ଲକ ଅଧୀନ ଗୋରାମାଟି ଗଁ। ର ଜଣେ ନିଆରା ମଣିଷ ଗୋଲକ ପ୍ରସାଦ ପାଢ଼ୀ। ସ୍ଥାନୀୟ ସରକାରୀ ପ୍ରାଥମିକ ବିଦ୍ୟାଳୟରେ ଦୀର୍ଘ ୪୨ବର୍ଷ ଧରି ବିନା ଚାକିରି ବିନା ପାରିଶ୍ରମିକରେ ସେ ଶିକ୍ଷାଦାନ କରିଆସୁଛନ୍ତି। ଏଥିସହ ଗ୍ରାମାଞ୍ଚଳରେ ଶିକ୍ଷାର ପ୍ରଚାର ପ୍ରସାର କରିବା ପାଇଁ ଉଦ୍ୟମ ଜାରି ରଖିଛନ୍ତି। ତାଙ୍କୁ ସମସ୍ତେ ବୁଢ଼ା ସାର୍ ବୋଲି ଡାକିଥାନ୍ତି।
ଗୋଲକ ନିଜ ଗ୍ରାମରେ ପ୍ରାଥମିକ ଶିକ୍ଷା ଶେଷ କରିବା ପରେ ତିହିଡ଼ି ବ୍ଲକ ପାଳିଆ ଉଚ୍ଚ ବିଦ୍ୟାଳୟରେ ଏକାଦଶ ଶ୍ରେଣୀ ପର୍ଯ୍ୟନ୍ତ ପଢ଼ିଥିଲେ। ସେ ସମୟରେ ଗ୍ରାମରେ ପ୍ରାଥମିକ ଶିକ୍ଷାର ବିଶେଷ ସୁବିଧା ନ ଥିଲା। ସଚେତନତା ଅଭାବ ସାଙ୍ଗକୁ ଲୋକଙ୍କର ଆର୍ଥିକ ସ୍ଥିତି ଭଲ ନ ଥିଲା। ଏହାକୁ ଆଖି ଆଗରେ ରଖି ସେ ନିଜ ଗ୍ରାମରେ ପ୍ରାଥମିକ ଶିକ୍ଷାର ପ୍ରସାର ପାଇଁ ଆଗେଇ ଆସିଥିଲେ। ଚାକିରି ନ ଖୋଜି ଗଁା ସ୍କୁଲରେ ସ୍ବେଚ୍ଛାକୃତ ଭାବେ ଶିକ୍ଷାଦାନ ଆରମ୍ଭ କରିଥିଲେ। ୧୯୨୧ରେ ସ୍ଥାପିତ ଏହି ବିଦ୍ୟାଳୟରେ ବର୍ତ୍ତମାନ ୧୨୧ ଛାତ୍ରୀଛାତ୍ର ଅଧ୍ୟୟନ କରୁଛନ୍ତି। ୫ ଶିକ୍ଷୟିତ୍ରୀ ଶିକ୍ଷକ ଅଛନ୍ତି। ୧୯୭୮ଠାରୁ ଗୋଲକ ଏହି ବିଦ୍ୟାଳୟକୁ ନିୟମିତ ଯାଇ ବିନା ପାରିଶ୍ରମିକରେ ପାଠ ପଢ଼ାଇ ଆସୁଛନ୍ତି। ଇଂଲିଶ, ଗଣିତ ଓ ସାହିତ୍ୟରେ ସେ ବେଶ୍ ଦକ୍ଷ। ଛାତ୍ରୀଛାତ୍ରଙ୍କ ଭଲପାଇବା ଓ ସେମାନଙ୍କ ଜ୍ଞାନ ଅର୍ଜନରେ ସହାୟତା କରି ଗୋଲକ ନିଜ ଅଞ୍ଚଳରେ ବେଶ୍ ଲୋକପ୍ରିୟ ହୋଇପାରିଛନ୍ତି। ଦେହ ଖରାପ ନ ହେଲେ ସେ ଦିନଟିଏ ବି ସ୍କୁଲ ଯିବା ବନ୍ଦ କରି ନ ଥାନ୍ତି।
ଗୋଲକ କହନ୍ତି, ଶିକ୍ଷାର ପ୍ରସାର ଘଟିଲେ ଗଁା ଗଣ୍ଡାରେ ବିକାଶ ଆସିବ। ଶିକ୍ଷାର୍ଥୀଙ୍କୁ ଭଲପାଇବା ଦେଇ ଶିକ୍ଷାଦାନ କଲେ ତାହା ସେମାନଙ୍କ ଜୀବନକୁ ଉନ୍ନତ କରି ଗଢ଼ି ତୋଳିବ। ବ୍ୟକ୍ତିଗତ ଜୀବନରେ ଗୋଲକ ବେଶ୍ ସରଳ ଓ ଅମାୟିକ। ଘରେ ପୁଅବୋହୂ ଓ ନାତି ନାତୁଣୀଙ୍କୁ ନେଇ ତାଙ୍କ ପରିବାର। ସ୍ତ୍ରୀଙ୍କର ଦେହାନ୍ତ ହେବା ପରେ ଏବେ ପରିଣତ ବୟସରେ ମଧ୍ୟ ନିଜ କାମ ନିଜେ କରିବା ସହିତ ଗଁ। ପିଲାଙ୍କୁ ଶିକ୍ଷାଦାନ କରିଆସୁଛନ୍ତି। ଏପରି କି କୌଣସି ସରକାରୀ ସହାୟତା ନେବାକୁ ସେ ନମ୍ରତାର ସହ ପ୍ରତ୍ୟାଖ୍ୟାନ କରିଥିବା କହିଛନ୍ତି। ସ୍ଥାନୀୟ ସରପଞ୍ଚ ଗଣେଶ ପ୍ରସାଦ ମଲ୍ଲିକ କହିଛନ୍ତି, ଗୋଲକ ଜଣେ ଗାନ୍ଧିବାଦୀ ଓ ସ୍ବାଭିମାନୀ ମଣିଷ। ଅଞ୍ଚଳରେ ଶିକ୍ଷାର ବିକାଶ ପାଇଁ ତାଙ୍କ ଉଦ୍ୟମକୁ ଯେତେ ପ୍ରଶଂସା କଲେ ବି କମ୍ ହେବ। ଗୋଲକଙ୍କ ଶିକ୍ଷାଦାନ ପାଇଁ ଅନେକ ଛାତ୍ରୀଛାତ୍ରଙ୍କ ଭବିଷ୍ୟତ ଉଜ୍ଜ୍ୱଳ ହୋଇଛି ବୋଲି ପ୍ରଧାନ ଶିକ୍ଷକ ଜୀବନବନ୍ଧୁ ପାଣିଗ୍ରାହୀ କହିଛନ୍ତି।