ମୁମ୍ବାଇ: ଦୀର୍ଘ ୨ବର୍ଷ ଧରି କ୍ୟାନ୍ସର୍ ସହ ଲଢ଼େଇ କରି ଶେଷରେ ଆରପାରିକୁ ଚାଲିଯାଇଛନ୍ତି ବଲିଉଡ୍ର ଭେଟେରାନ୍ ଅଭିନେତା ଋଷି କପୁର। ତାଙ୍କ ବିୟୋଗ ପରିବାର ଏବଂ ଫ୍ୟାନ୍ ମାନଙ୍କୁ ସ୍ତବ୍ଧ କରିଦେଇଛି। ହେଲେ ଦୀର୍ଘ ୨ ବର୍ଷ ଧରି ତାଙ୍କର ଏହି ଲଢ଼େଇରେ ସାହାଯ୍ୟ କରିଥିବା ଏଚ୍ଏନ୍ ରିଲାଏନ୍ସ ହସ୍ପିଟାଲର ଡାକ୍ତରୀ ଟିମ୍, ନର୍ସ ଏବଂ ଭାଇମାନଙ୍କୁ ଧନ୍ୟବାଦ ଜଣାଇଛନ୍ତି ସ୍ତ୍ରୀ ତଥା ଅଭିନେତ୍ରୀ ନୀତୁ କପୁର। ସେ ନିଜ ଇନ୍ଷ୍ଟା ହ୍ୟାଣ୍ଡଲ୍ରେ ଋଷିଙ୍କ ୨ଟି ଫଟୋ ଶେୟାର କରି ଲେଖିଛନ୍ତି ଯେ, ଏହା ଆମ ପାଇଁ ଏକ ବିରାଟ କ୍ଷତି। ତେବେ ଗତ କିଛିମାସର ଏହି ଲଢ଼େଇ କଥା ଯେତେବେଳେ ଆମେ ଏକାଠି ବସି ମନେ ପକାଉଛୁ, ସେତେବେଳେ ତାଙ୍କୁ ନିଜ ଲୋକ ଭଳି ଯତ୍ନ, ଚିକିତ୍ସା ଓ ଉପଦେଶ ଯୋଗାଇ ଦେଇଥିବା ଡା. ତରଙ୍ଗ ଜ୍ଞାନଚନ୍ଦାନି ଏବଂ ଟିମ୍କୁ ହୃଦୟରୁ ଧନ୍ୟବାଦ ଜଣାଉଛୁ। ରବିବାର ମଧ୍ୟ ନୀତୁ ଏକ ଫଟୋ ଶେୟାର୍ କରି କ୍ୟାପ୍ସନରେ ଲେଖିଛନ୍ତି, ‘ଏଣ୍ଡ୍ ଅଫ୍ ଆଓ୍ବାର୍ ଷ୍ଟୋରି’। ଉଲ୍ଲେଖଯୋଗ୍ୟ, ଋଷି ଲିଉକୋମିଆ ରୋଗରେ ପୀଡ଼ିତ ଥିଲେ। ନ୍ୟୁୟର୍କରେ ଚିକିତ୍ସା ପରେ ସେ ୨୦୧୯ ସେପ୍ଟେମ୍ବରରେ ଭାରତ ଫେରିଥିଲେ। ପରେ ମୁମ୍ବାଇରେ ସେ ଚିକିତ୍ସିତ ଥିବାବେଳେ ଏପ୍ରିଲ୍ ୩୦ରେ ତାଙ୍କର ପରଲୋକ ଘଟିଥିଲା।