କୋକସରା,୯।୬(ଡି.ଏନ.ଏ.)-ଦିଲ୍ଲୀର ଏକ କମ୍ପାନୀରେ ଚାକିରୀ କରୁଥିବା ପୁଅ ଗାଁକୁ ଫେରିଥିଲେ । ହେଲେ କରେନା କଟକଣାକୁ ପାଳନ କରୁଥିବା ତାଙ୍କ ସରପଞ୍ଚ ମାଆ ପୁଅକୁ କ୍ୱାରାଣ୍ଟାଇନ ସେଣ୍ଟରରେ ରଖି ସମସ୍ତଙ୍କ ପାଇଁ ଉଦାହରଣ ସୃଷ୍ଟି କରିଛନ୍ତି । କଳାହାଣ୍ଡି ଜିଲା କୋକସରା ବ୍ଲକ ଗମ୍ଭାରୀଗୁଡା ପଞ୍ଚାୟତରେ ଏହି ଘଟଣା ଦେଖିବାକୁ ମିଳିଛି ।
ଗମ୍ଭାରୀଗୁଡା ସରପଞ୍ଚ ନନ୍ଦିତା ସାହୁ । ତାଙ୍କ ପୁଅ ଲୋକେଶ ଦିଲ୍ଲୀର ଏକ କମ୍ପାନୀରେ ସଫ୍ଟଓ୍ବୋର ଇଞ୍ଜିନିୟର ଭାବେ କାମ କରୁଥିଲେ । ଲକ୍ଡାଉନ ଯୋଗୁ ସେଠାକାର କମ୍ପାନୀ ବନ୍ଦ ହୋଇଯାଇଥିଲା । ତଥାପି ଫେରିବାର ଉପାୟ ନ ଥିବାରୁ ଲୋକେଶ ସେଠାରେ ବହୁଦିନ ଅଟକି ରହିଥିଲେ । କଟକଣା କେହଳ ହେବା ପରେ ବିମାନ ଚଳାଚଳ ଆରମ୍ଭ ହୋଇଥିଲା । ଫଳରେ ଲୋକେଶ ଦିଲ୍ଲୀରୁ ବିମାନରେ ଆସି ଝାରସୁଗୁଡ଼ା ବିମାନ ବନ୍ଦରରେ ସୋମବାର ପହଞ୍ଚତ୍ଥିଲେ । ସେଠାରୁ ଗାଡ଼ିରେ ନିଜ ଗାଁକୁ ଫେରିଥିଲେ । ହେଲେ ଏତେଦିନ ପରେ ପୁଅ ଘରକୁ ଫେରିଥିଲେ ମଧ୍ୟ ସରପଞ୍ଚ ମାଆ ନନ୍ଦିତା ତିଳେମାତ୍ର ଭାବବିହ୍ବଳ ହୋଇ ନ ଥିଲେ । ନିଜ କର୍ତ୍ତବ୍ୟ ଓ ଦାୟିତ୍ୱକୁ ସେ ପାଳନ କରିଥିଲେ । ରାଜ୍ୟ ବାହାରକୁ ଆସୁଥିବା ପ୍ରବାସୀ ଶ୍ରମିକଙ୍କ ପରି ନିଜ ପୁଅ ଲୋକେଶଙ୍କୁ ସେ ଓଲମା ଗାଁ ରେ ଥିବା କ୍ୱାରାଣ୍ଟାଇନ ସେଣ୍ଟରରେ ରଖିବାକୁ ପରାମର୍ଶ ଦେଇଥିଲେ । ପୁଅ ଲୋକେଶ ବି ମାଆଙ୍କ କଥାକୁ ମାନି ଏବେ ପ୍ରବାସୀ ଶ୍ରମିକଙ୍କ ପରି ସେହି ସେଣ୍ଟରରେ ରହୁଛନ୍ତି । ସେଠାରେ ସମସ୍ତଙ୍କ ପାଇଁ ଯେଉଁ ଖାଦ୍ୟ ମିଳୁଛି ତାକୁ ଖାଉଛନ୍ତି । ଲୋକେଶଙ୍କ ସହିତ ଆସିଥିବା ତାଙ୍କର ୨ ଜଣ ସାଙ୍ଗ ମଧ୍ୟ ସେହି ସେଣ୍ଟରରେ ରହୁଛନ୍ତି । କ୍ୱାରାଣ୍ଟାଇନ ସେଣ୍ଟରର ଅବଧି ସରିବା ପରେ ସମସ୍ତେ ଘରକୁ ଫେରି ହୋମ୍କ୍ୱାରାଣ୍ଟାଇନରେ ରହିବେ ବୋଲି କହିଛନ୍ତି । ଏ ନେଇ ଲୋକେଶ କହିଛନ୍ତି, ମୋ ମାଆ ଜଣେ ସରପଞ୍ଚ ହିସାବରେ ଯେଉଁ ପଦକ୍ଷେପ ନେଇଛନ୍ତି ସେଥିପାଇଁ ମୁଁ ଗର୍ବିତ । କାରଣ ମୁଁ ମଧ୍ୟ ଦିଲ୍ଲୀରୁ ଆସିଛି । ନିୟମ ଅନୁସାରେ ସେ ମୋତେ କ୍ୱାରାଣ୍ଟାଇନ ସେଣ୍ଟରେ ରଖିଛନ୍ତି । ରାଜ୍ୟ ସରକାର ତାଙ୍କୁ ଯେଉଁ ଗୁରୁ ଦାୟିତ୍ୱ ଦେଇଛନ୍ତି ତାକୁ ସମ୍ମାନ ଜଣେଇବା ଆମର ପ୍ରଥମ କର୍ତ୍ତବ୍ୟ ବୋଲି ସେ କହିଛନ୍ତି ।