ବମ୍ବେ: ବଲିଉଡ୍ ଅଭିନେତା ସୁଶାନ୍ତ ସିଂ ରାଜପୁତଙ୍କ ଆତ୍ମହତ୍ୟା କୌଣସି ଥ୍ରିଲର ଫିଲ୍ମଠାରୁ କମ୍ ନୁହେଁ। କ’ଣ ପାଇଁ ସେ ଏଭଳି ଚରମ ନିଷ୍ପତ୍ତି ନେଲେ ତାହାକୁ ନେଇ ଚର୍ଚ୍ଚା ହୋଇ ଆସୁଛି। ‘ନେପୋଟିଜିମ୍’ ଅଥବା ବଂଶବାଦ କାରଣରୁ ସେ ଭାଙ୍ଗି ପଡ଼ିଥିଲେ। ଗୋଟିଏ ପରେ ଗୋଟିଏ ଫିଲ୍ମ ହାତରୁ ଚାଲିଯିବାରୁ ସେ ବିଷାଦଗ୍ରସ୍ତ ହୋଇ ଏଭଳି ପଦକ୍ଷେପ ନେଇଥିବା କୁହାଯାଉଛି। ଅପରପକ୍ଷେ ବଂଶବାଦକୁ ପ୍ରୋତ୍ସାହନ ଦେଉଥିବା କିଛି କଳାକାର ଏବଂ ନିର୍ଦ୍ଦେଶକଙ୍କୁ ସୁଶାନ୍ତଙ୍କ ପ୍ରଶଂସକ ଟାର୍ଗେଟ କରି ଟ୍ରୋଲ କରୁଛନ୍ତି। ଏଥିରୁ ବାଦ୍ ପଡ଼ିନାହାନ୍ତି ଦବଙ୍ଗ ଖାନ୍ ସଲମାନ୍।
ସୋସିଆଲ ମିଡିଆରେ ସଲମାନଙ୍କୁ ସୁଶାନ୍ତଙ୍କ ପ୍ରଶଂସକ ଟ୍ରୋଲ କରିଥିଲେ। ହେଲେ ସଲମାନଙ୍କ ପ୍ରଶଂସକ ଏହାର ପ୍ରତିବାଦ କରିଥିଲେ। ଫଳରେ ଅପ୍ରିତିକର ପରିସ୍ଥିତି ସୃଷ୍ଟି ହୋଇଥିଲା। ଏବେ ଏହାକୁ ଦେଖି ମୁହଁ ଖୋଲିଛନ୍ତି ସଲମାନ୍। ସେ ନିଜ ପ୍ରଶଂସକଙ୍କୁ ସୁଶାନ୍ତଙ୍କ ପରିବାରକୁ ସମର୍ଥନ ଦେବାକୁ କହିଛନ୍ତି।
ଟୁଇଟ୍ କରି ଭାଇଜାନ୍ କହିଛନ୍ତି, ମୁଁ ମୋର ସବୁ ପ୍ରଂଶସକଙ୍କୁ ଅନୁରୋଧ କରୁଛି ସୁଶାନ୍ତଙ୍କ ପ୍ରଶଂସକଙ୍କ ସହ ଛିଡ଼ା ହୁଅନ୍ତୁ। କଟୁ ମନ୍ତବ୍ୟଦିଅନ୍ତୁ ନାହିଁ। ଭାବନାକୁ ବୁଝନ୍ତୁ। ଏପରି ବିପଦ ପରିସ୍ଥିତିରେ ସୁଶାନ୍ତଙ୍କ ପରିବାରକୁ ସାନ୍ବନା ଦିଅନ୍ତୁ। ପ୍ରିୟଜନଙ୍କୁ ହରାଇବା ବେଶ୍ ଦୁଃଖଦାୟକ ବୋଲି ସେ କହିଛନ୍ତି।
