ଅନ୍ତର୍ଜାତୀୟ କ୍ରିକେଟରେ ରେକର୍ଡ ସୃଷ୍ଟି କରିବା ଏବଂ କିଛି ବର୍ଷ ବ୍ୟବଧାନରେ ସମାନ ଦିନରେ ନିଜ ରେକର୍ଡକୁ ନିଜେ ଭଙ୍ଗ କରିବା। ଏପରି ଏକ ତାରିଖ ସହ ଯୋଡ଼ିହୋଇ ରହିଛନ୍ତି ଭାରତୀୟ କ୍ରିକେଟ ଦଳର ପୂର୍ବତନ ବିସ୍ଫୋରକ ବ୍ୟାଟ୍ସମ୍ୟାନ ବୀରେନ୍ଦ୍ର ସେହ୍ବାଗ। ମାର୍ଚ୍ଚ ୨୯ ସହ ତାଙ୍କର ଅଭୁଲା ସମ୍ପର୍କ ରହିଛି। ପ୍ରତିପକ୍ଷ ବୋଲରଙ୍କ ପାଇଁ ଏକଦା ଦୁଃସ୍ବପ୍ନ ସାବ୍ୟସ୍ତ ହେଉଥିଲେ ଏହି ରେକର୍ଡ ବ୍ରେକର। ତାଙ୍କ ଟାଇମିଂ, ବ୍ୟାଟ୍ଚାଳନା ଏବଂ ଦୃଷ୍ଟିଶକ୍ତି ମଧ୍ୟରେ ଥିଲା ଅଦ୍ଭୁତ ସମନ୍ବୟ। ତାଙ୍କ କ୍ୟାରିୟର ଏପରି ଥିଲା ଯାହାକି ଭାରତୀୟ କ୍ରିକେଟ ଇତିହାସରେ ଅନେକଥର ନୂଆ ଅଧ୍ୟାୟ ଯୋଡ଼ିଥିଲା। ଲୟରେ ଥିବା ଦିନ ସେ ବୋଲରମାନଙ୍କ ବିପକ୍ଷରେ ଝଡ଼ ସ୍ବରୂପ ପ୍ରତୀୟମାନ ହେଉଥିଲେ। ୨୦୦୪ ମାର୍ଚ୍ଚ ୨୯ରେ ସେ ଭାରତୀୟ କ୍ରିକେଟକୁ ସ୍ମରଣୀୟ କରି ଦେଇଥିଲେ। ପାରମ୍ପରିକ ପ୍ରତିଦ୍ୱନ୍ଦ୍ୱୀ ପାକିସ୍ତାନ ବିପକ୍ଷରେ ବାହାର ପରିବେଶରେ ଭାରତୀୟ ଦଳର ପ୍ରଦର୍ଶନ ସେପରି ଭଲ ନ ଥାଏ। ଏପରି ଏକ ସମୟରେ ସେ ମୁଲତାନଠାରେ ପାକ୍ ବୋଲରଙ୍କୁ ଧୂଲେଇ କରି ଭାରତ ପକ୍ଷରୁ ଟେଷ୍ଟରେ ପ୍ରଥମ ତ୍ରିଶତକ ହାସଲ କଲେ। ୫୩୧ ମିନିଟ କ୍ରିଜ୍ରେ ରହିଥିବା ସେହ୍ବାଗ ୩୭୫ଟି ବଲ୍ର ସାମ୍ନା କରି ୩୯ ଚୌକା ଓ ୬ ଛକା ସହାୟତାରେ ୩୦୯ ରନ କରିଥିଲେ। ଏହି ପ୍ରଦର୍ଶନ ପାଇଁ ତାଙ୍କୁ ‘ସୁଲତାନ ଅଫ୍ ମୁଲତାନ’ ଆଖ୍ୟା ଦିଆ ଯାଇଥିଲା। ନିଜର ତ୍ରିଶତକୀୟ ଇନିଂସ ଅବସରରେ ସେ ଓପନିଂ ଯୋଡ଼ିରେ ଆକାଶ ଚୋପ୍ରା(୪୨)ଙ୍କ ସହ ୧୬୦ ଏବଂ ତୃତୀୟ ଉଇକେଟ ଭାଗୀଦାରିରେ ସଚିନ ତେନ୍ଦୁଲକରଙ୍କ ସହ ୩୩୬ ରନର ପାର୍ଟନରଶିପ୍ ଗଢ଼ିଥିଲେ। ସଚିନ ୧୯୪ ରନରେ ଅପରାଜିତ ରହିଥିବାବେଳେ ଅଧିନାୟକ ରାହୁଲ ଡ୍ରାଭିଡ ୬୭୫/୫ରେ ଇନିଂସ ଘୋଷଣା କରିଥିଲେ। ମ୍ୟାଚକୁ ଭାରତ ଏକ ଇନିଂସ ୫୨ ରନରେ ଜିତିଥିଲା।
ଏହାର ଠିକ୍ ୪ ବର୍ଷ ପରେ ‘ନଜଫଗଡ଼ କା ନଓ୍ବାବ’ ପୁଣି ବିସ୍ଫୋରଣ ସୃଷ୍ଟି କଲେ। ୨୦୦୮ ମାର୍ଚ୍ଚ ୨୯ରେ ସେ ଚେନ୍ନାଇର ଚେପକ୍ ଷ୍ଟାଡିୟମରେ ଦକ୍ଷିଣ ଆଫ୍ରିକା ବିପକ୍ଷରେ ୩୦୪ ବଲ୍ରୁ ୩୧୯ ରନ ସଂଗ୍ରହ କରିଥିଲେ। ତାହା ଏବେ ମଧ୍ୟ ଟେଷ୍ଟ କ୍ରିକେଟରେ ଭାରତର ସର୍ବାଧିକ ବ୍ୟକ୍ତିଗତ ସ୍କୋର ହୋଇ ରହିଛି। ନିଜ ଇନିଂସ ମଧ୍ୟରେ ସେ ୪୨ ଚୌକା ଓ ୫ ଛକା ମାରିଥିଲେ। ୨୦୧୫ରେ ଅନ୍ତର୍ଜାତୀୟ କ୍ରିକେଟରୁ ଅବସର ନେଇଥିବା ବୀରେନ୍ଦ୍ର ଭାରତକୁ ଟେଷ୍ଟ ର଼୍ୟାଙ୍କିଙ୍ଗ୍ରେ ନମ୍ବରଓ୍ବାନକୁ ନେବାରେ ଗୁରୁତ୍ୱପୂର୍ଣ୍ଣ ଭୂମିକା ନିର୍ବାହ କରିଥିଲେ।