ନିମାପଡ଼ା,୩୦।୧୨(ଡି.ଏନ୍.ଏ): ନିମାପଡ଼ାରେ ଟ୍ରାଫିକ ଯନ୍ତ୍ରଣା ବଢ଼ିବାରେ ଲାଗିଛି। ନିତି ବହୁ ସଂଖ୍ୟାରେ ଯାନବାହାନ ଟ୍ରାଫିକ ଜାମ୍ ଯୋଗୁ ଅଟକି ରହୁଛି। ପର୍ଯ୍ୟଟକବାହୀ ଯାନ ହେଉ ଅବା ଆମ୍ବୁଲାନ୍ସ, ସମସ୍ତେ ଏହି ଟ୍ରାଫିକ୍ରେ ଫଶିରହୁଛନ୍ତି। କୋଣାର୍କ, ଅସ୍ତରଙ୍ଗ ଏବଂ କାକଟପୁର ଯିବା ଆସିବା କରିବା ପାଇଁ ରାସ୍ତାରେ ବହୁ ଅସୁବିଧାର ସମ୍ମୁଖିନ ହେବାକୁ ପଡ଼ୁଛି। ଅଣ୍ଡିଆ ଛକ ଠାରୁ ସର୍ବାପଡ଼ା ଜୟଗୁରୁ ଆଶ୍ରମ ଛକ ପର୍ଯ୍ୟନ୍ତ ଦୀର୍ଘ ୪କିମି ଧରି ରାସ୍ତାରେ ଗାଡ଼ି ଭିଡ଼ ରହୁଛି। ବିଦେଶୀ ପର୍ଯ୍ୟଟକଙ୍କ ସମେତ ରାଜ୍ୟର ପର୍ଯ୍ୟଟକମାନେ ଏହାକୁ ନେଇ ଅସନ୍ତୋଷ ପ୍ରକାଶ କରୁଛନ୍ତି। ଏବେ ପିକ୍ନିକ୍ ଋ଼ତୁ ହୋଇଥିବାରୁ ବିଶ୍ୱପ୍ରସିଦ୍ଧ ପର୍ଯ୍ୟଟନ କେନ୍ଦ୍ର କୋଣାର୍କ, ପୁରୀ, ରାମଚଣ୍ଡି, ଅସ୍ତରଙ୍ଗ ଜାହାନିଆପୀର, କାକଟପୁର ମଙ୍ଗଳାଙ୍କ ନିକଟକୁ ଦୈନିକ ହଜାର ହଜାର ସଂଖ୍ୟାରେ ପର୍ଯ୍ୟଟକ ଓ ଯାତ୍ରୀଙ୍କ ଗାଡ଼ି ନିମାପଡ଼ା ବଜାର ରୁଟ୍ରେ ଯାତାୟତ କରୁଛି। ମୁଖ୍ୟ ରାସ୍ତାରେ ସାଧାରଣ ଲୋକଙ୍କ ଯାତାୟାତ, ଶହଶହ ସଂଖ୍ୟାରେ ବାଇକ୍ ଚଳାଚଳ ଓ ଚାରିଚକିଆ ଯାନ, ବସ୍ କାର୍, ଟ୍ରକ୍ ଏବଂ ପର୍ଯ୍ୟଟକଙ୍କ ଗାଡ଼ି ଯାତାୟାତ କରୁଥିବା ଯୋଗୁ ଟ୍ରାଫିକ୍ ଜାମ୍ ହୋଇଯାଉଛି। ଟ୍ରାଫିକ ଜାମ୍ରୁ ରୋଗୀଙ୍କୁ ନେଉଥିବା ଆମ୍ବୁଲାନ୍ସ ବାଦ୍ ପଡ଼ୁନି ା ବହୁ ସମୟ ପର୍ଯ୍ୟନ୍ତ ଆମ୍ବୁଲାନ୍ସ ଭିଡ଼ ଭିତରେ ଫଶିରହୁଛି। ଅନ୍ୟପଟେ ଭିଡ଼ ନିୟନ୍ତ୍ରଣ କରିବା ପାଇଁ ନିମାପଡ଼ା ପୋଲିସ ଦ୍ୱାରା ସମ୍ଭବ ହେଉନି ା ଥାନାରେ ଆବଶ୍ୟକ କର୍ମଚାରୀ ନ ଥିବା ଯୋଗୁ ଅସୁବିଧା ହେଉଛି। ଖୋଦ୍ ନିମାପଡ଼ା ଆଇଆଇସି ଜନାର୍ଦ୍ଦନ ପାଢ଼ି ନିମାପଡ଼ା ଛକ ଠାରେ ଉପସ୍ଥିତ ରହି ଟ୍ରାଫିକ ସଜାଡ଼ୁଥିବା ଦେଖିବାକୁ ମିଳୁଛି। ଅଧିକ ସଂଖ୍ୟକ ପୋଲିସ କର୍ମଚାରୀଙ୍କୁ ନିୟୋଜନ ସହ ଟ୍ରାଫିକ ନିୟନ୍ତ୍ରଣ ଦିଗରେ ଉଚିତ୍ ପଦକ୍ଷେପ ନେବାକୁ ସାଧାରଣରେ ଦାବି ହେଉଛି। ।