ବଡସାହି,୧୧ା୧(ସ୍ବ.ପ୍ର.)-ବଡ଼ସାହି ବ୍ଲକ ଅଧୀନ ଭୀମଦା ପଞ୍ଚାୟତ ଚେଙ୍ଗୁଆ-ମଙ୍ଗଳପୁର ଗ୍ରାମରେ ଚାଲିଥିବା ପ୍ରଧାନମନ୍ତ୍ରୀ ଗ୍ରାମ ସଡ଼କ ଯୋଜନାରେ ନିର୍ମାଣାଧୀନ ରାସ୍ତା କାର୍ଯ୍ୟ ନିମ୍ନମାନର ହେଉଥିବା ନେଇ ଗ୍ରାମବାସୀ ଅଭିଯୋଗ କରିଛନ୍ତି । ମାଟି ଉପରେ ପିଚୁ ପକାଇ ରାସ୍ତା ତିଆରି କରୁଥିବା ଦେଖି ଗ୍ରାମବାସୀ କାର୍ଯ୍ୟଟିକୁ ବନ୍ଦ କରି ଏ ସଂକ୍ରାନ୍ତରେ ଜିଲା ପ୍ରକଳ୍ପ ନିର୍ଦ୍ଦେଶକ, ନିର୍ବାହୀ ଯନ୍ତ୍ରୀ ଓ ସହକାରୀଯନ୍ତ୍ରୀଙ୍କ ଦୃଷ୍ଟି ଆକର୍ଷଣ କରିଛନ୍ତି । ପ୍ରଶାସନିକ ଅଧିକାରୀମାନେ ଘଟଣାସ୍ଥଳ ପରିଦର୍ଶନ କରି ରାସ୍ତା କାର୍ଯ୍ୟ ନିମ୍ନମାନର ହୋଇଥିବା ନେଇ ପୁନର୍ବାର ଏହାକୁ ନିର୍ମାଣ କରିବାକୁ ନିର୍ଦ୍ଦେଶ ଦେଇଥିବା ଜଣାପଡ଼ିଛି।
ଗ୍ରାମ୍ୟ ଉନ୍ନୟନ ବିଭାଗ ଆନୁକୂଲ୍ୟରେ ବ୍ଲକର ଭୀମଦା ପଞ୍ଚାୟତ ନୂଆହାଟ ଆର୍ଡି ରାସ୍ତାଠାରୁ ଚେଙ୍ଗୁଆ-ମଙ୍ଗଳପୁର ଗ୍ରାମ ପର୍ଯ୍ୟନ୍ତ ପ୍ରଧାନମନ୍ତ୍ରୀ ଗ୍ରାମ ସଡକ ଯୋଜନାରେ ରାସ୍ତା ନିର୍ମାଣ ଚାଲିଛି । ୯୨ଲକ୍ଷ ୯୭ହଜାର ୮ଶହ ଟଙ୍କା ଅଟକଳରେ ନିର୍ମାଣ ହେବାକୁ ଥିବା ଅଢେଇ କି.ମି. ରାସ୍ତା କାର୍ଯ୍ୟ ମେ ୨୦୧୮ରେ ଆରମ୍ଭ ହୋଇଛି ା ଫେବୃୟାରୀ ୨୦୧୯ରେ କାର୍ଯ୍ୟ ଶେଷ ହେବାକୁ ଥିବା ବେଳେ ଅଦ୍ୟାବଧି ତାହା ସମ୍ପୂର୍ଣ୍ଣ ହୋଇପାରି ନାହିଁ ା ୫ବର୍ଷ ପର୍ଯ୍ୟନ୍ତ ଠିକାଦାରଙ୍କ ଦ୍ୱାରା ନିର୍ଭରତା ଅବଧି ରହିଥିବା ବେଳେ ନିର୍ମାଣ କାର୍ଯ୍ୟ ଅତି ନିମ୍ନମାନର ହେଉଥିବା ନେଇ ଅଞ୍ଚଳରେ ଅସନ୍ତୋଷ ଦେଖାଦେଇଛି। ରାସ୍ତାରୁ ପିଚୁ ଉଠି ଯାଉଥିବା ବେଳେ ବିଭିନ୍ନ ସ୍ଥାନରେ ମାଟି ଉପରେ ପିଚୁ ପକା ଯାଇଥିବା ଅଭିଯୋଗରେ ଦର୍ଶାଯାଇଛି ା ଠିକାଦାରଙ୍କ ଏପରି ଖାମଖିଆଲି ନୀତି ଯୋଗୁ ସରକାରଙ୍କ କୋଟି କୋଟି ଟଙ୍କାର ଯୋଜନାର ସଫଳ ରୂପାୟନ ହୋଇପାରୁ ନାହିଁ। ବିଭାଗୀୟ ଅଧିକାରୀମାନେ କାର୍ଯ୍ୟସ୍ଥଳକୁ ଆସୁ ନ ଥିବାରୁ ଏପରି କାର୍ଯ୍ୟ କରାଯାଉଥିବା ନାଏବ ସରପଞ୍ଚ ବଳରାମ ମହାଳିକ କହିଛନ୍ତି। ସେହିପରି ରାସ୍ତା ନିର୍ମାଣରେ ବ୍ୟବହାର ହେଉଥିବା ମାଟି, ମୋରମ, ମେଟାଲ, ଚିପ୍ସ ଆବଶ୍ୟକ ପରିମାଣର ପଡି ନ ଥିବାରୁ ପିଚୁ ରାସ୍ତାଟି ନଷ୍ଟ ହେବାକୁ ଯାଉଛି ବୋଲି ହେମନ୍ତ କୁମାର ମହାରଣା, ସୋମନାଥ ବେହେରା, ଦିଲୀପ ପ୍ରଧାନ କହିଛନ୍ତି। ଥଣ୍ଡା ପିଚୁରେ ଉକ୍ତ ରାସ୍ତା ନିର୍ମାଣ ହେବାର ନିୟମ ରହିଛି ା ତେବେ ଅଦିନିଆ ବର୍ଷା ସହିତ କୋହଲା ପାଗ ଓ ପିଚୁ ନିର୍ମାଣ ପରେ ଭାରିଯାନ ଚଳପ୍ରଚଳ କରୁଥିବାରୁ ଏଭଳି ପରିସ୍ଥିତି ଉପୁଜିଛି ା ଖୁବଶୀଘ୍ର ଏହାର ତଦନ୍ତ କରାଯାଇ ଠିକ କାର୍ଯ୍ୟ କରାଯିବ ବୋଲି ସହକାରୀଯନ୍ତ୍ରୀ ରାଜେଶ ପ୍ରଧାନ କହିଛନ୍ତି ା ନିର୍ମାଣ ହୋଇଥିବା ରାସ୍ତାର ପୁନଃ ମରାମତି କରା ନ ଗଲେ ଆନ୍ଦୋଳନାମତ୍କ ପନ୍ଥା ଅବଲମ୍ବନ କରାଯିବ ବୋଲି ଗ୍ରାମବାସୀ ଚେତାବନୀ ଦେଇଛନ୍ତି ା