ବାଲିଆ,୨୭।୭: ଫନୀ ବାତ୍ୟା ପରେ ବିଦ୍ୟୁତ୍ ଖୁଣ୍ଟ, ତାର ଆଦି ପୁନରୁଦ୍ଧାର ଓ ମରାମତି କାର୍ଯ୍ୟ କିପରି ନିମ୍ନମାନର ହୋଇଛି ତାହାର ଉଦାହରଣ ଦେଖିବାକୁ ମିଳିଛି ରଘୁନାଥପୁର ବିଦ୍ୟୁତ୍ ସେକ୍ସନ ଅଧୀନ ମାଣପୁରରେ। ଏହି ଗଁାର ଗହୀର ମଝିରେ ୧୧ କେଭି ବିଦ୍ୟୁତ୍ ତାର ଯାଇଥିବା ୮ଟି ଖୁଣ୍ଟ ଭାଙ୍ଗିଯାଇଛି। ଏଥିସହ ତାରଗୁଡିକ ଛିଣ୍ଡି ଏଣେତେଣେ ପଡିଛି। ଫଳରେ ୨ଦିନ ହେଲା ବିରିଡ଼ି ବ୍ଲକର ଅରଣା, ମାଳିଅଞ୍ଚ, ଗୋଠପଦା, ପାଇକରାବାଟି, ବଡ଼ଖଣ୍ଡାୟତା, ବେଲେଶ୍ୱରପୁର, ଗଡମା ବଜାର ସମେତ କଟକ ସଦର ବ୍ଲକର ବୋଧପୁର, ପାଇକଣ, ନାନପୁର, ମାଣପୁର, ସରପୁର, ସିଉଳି ଆଦି ମୌଜା ଅନ୍ଧାରରେ ରହିଛି। ଏହାକୁ ନେଇ ସାଧାରଣରେ ତୀବ୍ର ଜନ ଅସନ୍ତୋଷ ପ୍ରକାଶ ପାଇଛି। ନିମ୍ନମାନର କାର୍ଯ୍ୟ କରାଯାଇଥିବାରୁ ଏ ବାବଦରେ ଲକ୍ଷାଧିକ ଟଙ୍କା ପାଣିରେ ପଡିଥିବା ଅଭିଯୋଗ ହେଉଛି। ପ୍ରକାଶ ଯେ, ସେସୁ ପକ୍ଷରୁ ଠିକାଦାର ନିଯୁକ୍ତ କରାଯାଇ ବାତ୍ୟା ପରେ ଉକ୍ତ ଅଞ୍ଚଳରେ ଖୁଣ୍ଟ ପକାଯାଇ ୧୧ କେଭି ତାର ଟଣାଯାଇଥିଲା। ମାତ୍ର ଖୁଣ୍ଟ ପୋତାଯିବା ବେଳେ ଠିକାଦାର, ଯନ୍ତ୍ରୀ ଓ ଅଧିକାରୀଙ୍କ ସଲାସୁତରା ଯୋଗୁ ଠିକ୍ ଭାବେ କାର୍ଯ୍ୟ ହୋଇ ନ ଥିବା ଅଭିଯୋଗ ହୋଇଛି। ଅଳ୍ପ ଗାତ ଖୋଳି ଖୁଣ୍ଟ ପୋତାଯାଇଥିବା ବେଳେ ଖୁଣ୍ଟ ମୂଳ ଢଳେଇ କରାଯାଇ ନ ଥିଲା। ବେପରୁଆ ଭାବେ ଏଭଳି କାର୍ଯ୍ୟ କରାଯାଇଥିବାରୁ ଏଭଳି ଅବସ୍ଥା ହୋଇଥିବା ସ୍ଥାନୀୟ ଲୋକେ କହିଛନ୍ତି। ଭଙ୍ଗା ଖୁଣ୍ଟଗୁଡିକ ଗହିର ମଧ୍ୟରେ ପଡିରହିଥିବା ବେଳେ ପୁଣି ଥରେ ବିଭାଗ ପକ୍ଷରୁ ଅନ୍ୟ ଜଣେ ଠିକାଦାରଙ୍କୁ ଧରି ଅଲଗା ବାଟ ଦେଇ ୧୧ କେଭି ତାର ଟାଣିବାକୁ ଉଦ୍ୟମ ଚାଲିଛି। ତେବେ ନୂତନ ଭାବେ ପୋତାଯାଉଥିବା ଖୁଣ୍ଟର ସ୍ଥାୟୀତ୍ୱକୁ ନେଇ ମଧ୍ୟ ସନ୍ଦେହ ପ୍ରକାଶ ପାଇଛି। କାରଣ ଏହି ଖୁଣ୍ଟ ମଧ୍ୟ ଠିକ୍ ଭାବେ ପୋତାଯାଉ ନାହିଁ କି ମୂଳ ଢଳେଇ କରାଯାଉନାହିଁ। ଏ ସମ୍ପର୍କରେ ରଘୁନାଥପୁର ସେସୁ କନିଷ୍ଠ ଯନ୍ତ୍ରୀ ଭବାନି ପ୍ରସାଦ ମହାନ୍ତିଙ୍କୁ ପଚାରିବାରୁ ସେ କହିଲେ ଯେଉଁ ବାଟ ଦେଇ ବିଦ୍ୟୁତ୍ ସଂଯୋଗ ଦିଆଯାଇଥିଲା ବର୍ଷା ଯୋଗୁ ସେ ବାଟେ ବିଦ୍ୟୁତ ତାର ଟାଣିବା ସମ୍ଭବ ହେଉନାହିଁ। ତେଣୁ ବାଧ୍ୟହୋଇ କଟକ ପାରାଦୀପ ରାସ୍ତା କଡରେ ଖୁଣ୍ଟ ପକାଇ ବିଦ୍ୟୁତ୍ ସଂଯୋଗ ଦେବାକୁ ଯୋଜନା କରିଛୁ।