ବାରିପଦା ଅଫିସ,୮ା୯- ମହିଳା ଓ ଶିଶୁ ବିକାଶ ବିଭାଗ ପକ୍ଷରୁ ଗ୍ରାମାଞ୍ଚଳର ପ୍ରସୂତି, ଗର୍ଭବତୀ ଓ ଶିଶୁମାନଙ୍କୁ ବିଭିନ୍ନ ପ୍ରକାର ରନ୍ଧାଖାଦ୍ୟ ଓ ଶୁଖିଲା ଖାଦ୍ୟ ପ୍ରଦାନ କରାଯାଉଛି। ହେଲେ ମୋରଡା ବ୍ଲକ ସମନ୍ବିତ ଶିଶୁ ବିକାଶ ପ୍ରକଳ୍ପ ଅଧୀନ ମୋରଡା ପଞ୍ଚାୟତର ଗଉଡ଼ସାହି ଅଙ୍ଗନଓ୍ବାଡି କେନ୍ଦ୍ରରେ ପ୍ରତିଦିନ ନିମ୍ନମାନର ଖାଦ୍ୟ ପ୍ରଦାନ କରାଯାଉଥିବା ଗ୍ରାମବାସୀ ଅଭିଯୋଗ କରିଛନ୍ତି। ଏଠାକୁ ଅଙ୍ଗନଓ୍ବାଡି କର୍ମୀ ନିୟମିତ ଆସୁ ନ ଥିବା ବେଳେ ପାଚିକା ହିଁ ଏହି କେନ୍ଦ୍ରକୁ ପରିଚାଳନା କରନ୍ତି। ଏହାକୁ ବିରୋଧ କରି ଶୁକ୍ରବାରଠାରୁ ସ୍ଥାନୀୟ ମହିଳାମାନେ କେନ୍ଦ୍ରରେ ତାଲା ପକାଇଥିଲେ। ଶନିବାର ସୁପରଭାଇଜର ରେଣୁବାଲା ମହାନ୍ତି ମହିଳାମାନଙ୍କୁ ବୁଝାଶୁଝା କରି ତାଲା ଖୋଲାଇଥିଲେ। ଅଙ୍ଗନଓ୍ବାଡି କର୍ମୀଙ୍କ ଅବହେଳା ଯୋଗୁ ନିମ୍ନମାନର ଖାଦ୍ୟ ପ୍ରଦାନ କରାଯାଉଥିବା ସୁପରଭାଇଜର ସ୍ବୀକାର କରିଥିଲେ। ସେହିପରି ଏହି ଘଟଣାରେ ସିଡିପିଓ ମିନତି ଦେଇଙ୍କ ମତାମତ ନେବାରୁ ସମ୍ପୃକ୍ତ ଅଙ୍ଗନଓ୍ବାଡି କର୍ମୀଙ୍କୁ ଠିକ୍ ଭାବେ କାର୍ଯ୍ୟ କରିବାକୁ ତାଗିଦ କରିଥିବା ଓ ଏ ସମ୍ପର୍କରେ ଉଚ୍ଚ ଅଧିକାରୀଙ୍କୁ ଜଣାଇବେ ବୋଲି କହିଛନ୍ତି।