ରଣପୁର,୧୬ା୯(ସ୍ବ.ପ୍ର.): ରଣପୁର ବ୍ଲକ ନରସିଂହପୁର ପଞ୍ଚାୟତର ରାଶନ କାର୍ଡ ହିତାଧିକାରୀମାନେ ନିମ୍ନମାନର ଚାଉଳ ନ ନେଇ ଫେରାଇ ଦେଇଛନ୍ତି। ଏହି ଘଟଣାକୁ ନେଇ ରବିବାର କିଛି ସମୟ ପାଟିତୁଣ୍ଡ ହେବା ସହ ହିତାଧିକାରୀ ଅସନ୍ତୋଷ ବ୍ୟକ୍ତ କରି ଫେରି ଯାଇଛନ୍ତି। ଏହି ପଞ୍ଚାୟତରେ ୮୦୫ କାର୍ଡଧାରୀ ଚାଉଳ ନେଉଛନ୍ତି। ଓଡଗାଁ ମିଲର ପଞ୍ଚାୟତକୁ ଚାଉଳ ଯୋଗାଉଛନ୍ତି। ହେଲେ ଚାଉଳ କଳା ଓ ନାଲି ରଙ୍ଗର ଥିବା ଦେଖିବାକୁ ମିଳିଥିଲା । ତାହା ପୁଣି ଭଲ ବାସ୍ନା ନ ଥିଲା । ଏ ନେଇ ସରପଞ୍ଚ ନିତ୍ୟାନନ୍ଦ ପରିଡା କୁହନ୍ତି, ନିମ୍ନମାନର ଚାଉଳକୁ ଦେଖି ହିତାଧିକାରୀ ଅସନ୍ତୋଷ ବ୍ୟକ୍ତ କରି ଚାଉଳ ନ ନେଇ ଫେରିଯାଇଥିଲେ। ଚାଉଳ ଦେଖିବା ପରେ ଏହା ଉତ୍କୃଷ୍ଟ ମାନର ନୁହେଁ ବୋଲି ଜଣାପଡୁଛି । ବ୍ଲକ ଯୋଗାଣ ଅଧିକାରୀ ବି.ଇ. ହରସ କୁହନ୍ତି, ରାଶନ କାର୍ଡ ହିତାଧିକାରୀଙ୍କୁ ଯୋଗାଇ ଦିଆଯାଉଥିବା ଚାଉଳ ନିମ୍ନମାନର ଆସିଥିବା ଜଣାପଡିଛି। ହିତାଧିକାରୀଙ୍କ ଅଭିଯୋଗ ପରେ ଆମେ ଯାଞ୍ଚ କରି ଏହାକୁ ଫେରସ୍ତ କରିବୁ । ପୁଣି ସେମାନଙ୍କୁ ଉତ୍କୃଷ୍ଟ ମାନର ଚାଉଳ ଯୋଗାଇ ଦିଆଯିବ ବୋଲି ସେ କହିଥିଲେ।