ଭୁବନେଶ୍ୱର, ୧୩ା୧(ବ୍ୟୁରୋ): ନିମ୍ନମାନର ସିମେଣ୍ଟ ଇଟା ମେଶିନ ଯୋଗାଇବା ଅଭିଯୋଗରେ ଖଣ୍ଡଗିରି ଥାନା ପୋଲିସ ଜଣେ ଅଭିଯୁକ୍ତଙ୍କୁ ରାଜସ୍ଥାନରୁ ଗିରଫ କରି ଶନିବାର ଫେରିଛି। ସେ ହେଲେ ରାଜସ୍ଥାନ ଆଜମିର ଅଞ୍ଚଳର ଏଲପିଏମ୍ ପ୍ରାଇଭେଟ ଲିମିଟେଡର କର୍ମଚାରୀ ମହାବୀର ପ୍ରସାଦ ମାଲି(୩୬)। ସୂଚନାଯୋଗ୍ୟ, ଡୁମୁଡୁମା ମଧୁସୂଦନ ସମବାୟ ନଗରରେ ରହୁଥିବା ମିତ୍ରା ମିଶ୍ର ପଞ୍ଚସଖା ନଗରରେ ଏକ ସିମେଣ୍ଟ ଇଟା କାରଖାନା କରିବା ପାଇଁ ଯୋଜନା କରିଥିଲେ। ଏଥିନିମନ୍ତେ ଆବଶ୍ୟକ ମେଶିନ ଯୋଗାଇବାକୁ ସେ ମହାବୀରଙ୍କ ସହ ଯୋଗାଯୋଗ କରି ୨୦୧୭ ଡିସେମ୍ବରରେ ୨୭ଲକ୍ଷ ୬୬ ହଜାର ଟଙ୍କା ପଠାଇଥିଲେ। ପରେ ତାଙ୍କୁ ମେଶିନ ଯୋଗାଇ ଦିଆଯାଇଥିଲା। କିନ୍ତୁ ତାହା ଡିଲ୍ ମୁତାବକ କାର୍ଯ୍ୟକ୍ଷମତା ଓ ବ୍ରାଣ୍ଡର ମେଶିନ ନ ଥିଲା। ଏ ସମ୍ପର୍କରେ ମିତ୍ରା ଅଭିଯୋଗ କରିବା ପାଇଁ ଚାହିଁଲେ ମଧ୍ୟ ମହାବୀର ଆଉ ଫୋନ ଉଠାଇ ନ ଥିଲେ। କିଛିଦିନ ପରେ ମେଶିନ ଖରାପ ହେବା ପରେ ମଧ୍ୟ ଯୋଗାଯୋଗ ସମ୍ଭବ ହୋଇପାରି ନ ଥିଲା। ନିରାଶ ହୋଇ ଶେଷରେ ମିତ୍ରାଙ୍କ ଅଭିଯୋଗ ପରେ ପୋଲିସ ୩୪୩/୧୮ନଂ.ରେ ମାମଲା ରୁଜୁ କରି ତଦନ୍ତ କରୁଥିଲା। ଏସ୍ଆଇ ନିରଞ୍ଜନ ଜେନାଙ୍କ ନେତୃତ୍ୱରେ ଏକ ଟିମ୍ ଆଜମିର ଯାଇ ସ୍ଥାନୀୟ ପୋଲିସ ସହଯୋଗରେ ମହାବୀରଙ୍କୁ ଗିରଫ କରିଥିଲେ। ରବିବାର ଅଭିଯୁକ୍ତଙ୍କୁ କୋର୍ଟଚାଲାଣ କରାଯାଇଥିବାବେଳେ ଜାମିନ ଆବେଦନ ଖାରଜ ହେବାରୁ ବିଚାର ବିଭାଗ ହାଜତକୁ ପଠାଇ ଦିଆଯାଇଛି