ବିଭିନ୍ନ ଔଷଧୀୟ ବୃକ୍ଷମାନଙ୍କ ମଧ୍ୟରୁ ନିମ୍ବ ଅନ୍ୟତମ। ଏହାର ପତ୍ରଠାରୁ ଆରମ୍ଭ କରି ଫଳ, ଫୁଲ, ମୂଳ ଇତ୍ୟାଦିକୁ ଅନେକ ରୋଗର ଉପଶମ କ୍ଷେତ୍ରରେ ବ୍ୟବହାର କରାଯାଇଥାଏ। ଏସବୁ ମଧ୍ୟରେ ସ୍ନାନ ସମୟରେ ନିମ୍ବ ପାଣିର ବ୍ୟବହାର ଉପକାରୀ ବୋଲି କୁହାଯାଇପାରେ। ଏହାଦ୍ୱାରା ଅନେକ ସମସ୍ୟା ଦୂର ହୋଇଥାଏ। ଯେପରିକି:-
-ତ୍ୱଚା ସମ୍ବନ୍ଧୀୟ ରୋଗ: ପାଣିରେ ନିମ୍ବ ପତ୍ରକୁ ଫୁଟାଇ ଦିଅନ୍ତୁ। ପରେ ଏହି ମିଶ୍ରଣକୁ ପାଣିରେ ମିଶାଇ ଗାଧୋଇବା ଦ୍ୱାରା କାଛୁ, କୁଣ୍ଡିଆ, ଜ୍ୱଳନ, ଛଉ ଭଳି ସମସ୍ୟା ଦୂରେଇ ଯାଇଥାଏ। ଏଥିସହ ସୋରାୟସିସ୍ ଏବଂ ଏକ୍ଜିମା ଭଳି ତ୍ୱଚା ଜନିତ ରୋଗ ମଧ୍ୟ ହୋଇ ନ ଥାଏ।
-ଶରୀରର ଦୁର୍ଗନ୍ଧ ଦୂର ହୁଏ: ଝାଳ ବାହାରିବା କାରଣରୁ ଅନେକଙ୍କ ଶରୀରରୁ ଦୁର୍ଗନ୍ଧ ବାହାରିବା ଦେଖାଯାଇଥାଏ। ତେବେ ନିମ୍ବ ପାଣିରେ ଗାଧୋଇବା ଦ୍ୱାରା ଏଭଳି ସମସ୍ୟା କମ୍ ହୋଇଥାଏ। ତେବେ ଗାଧୋଇବା ପରେ ନିମ୍ବ ପାଣିରେ ମୁହଁ ଧୋଇବା ଦ୍ୱାରା ତ୍ୱଚା କୋମଳ, ବ୍ରଣ ପରି ସମସ୍ୟା କମ୍ ହୋଇଥାଏ।
-ରୂପି: ରୂପି ହୋଇ କେଶ ଝଡ଼ିବା ଭଳି ସମସ୍ୟା ସାଧାରଣ କଥା। ତେବେ ଏଥିପାଇଁ ସାମ୍ପୁ କରିବା ପରେ ନିମ୍ବ ପାଣିରେ କେଶକୁ ଧୋଇଦିଅନ୍ତୁ। ଏପରି କରିବା ଦ୍ୱାରା କେଶ ମୂଳ ମଜଭୂତ ହେବା ସହ ରୂପି ଦୂର ହୋଇଥାଏ। କେଶରେ ଉଜ୍ୱଳତା ଫେରେ।
– ପୋଡ଼ି ଯିବା ଦ୍ୱାରା ସୃଷ୍ଟ ଘା’କୁ ଠିକ୍ କରିବା ଲାଗି ନିମ୍ବ ପାଣିରେ ଗାଧୋଇବା ଉଚିତ। ଏହାଦ୍ୱାରା ଶୀଘ୍ର ନୂତନ ଚର୍ମ ଆସିଥାଏ। ଏଥିସହ ଆଲର୍ଜି ଓ ସଂଙ୍କ୍ରମଣ ଭୟ ଦୂର ହୋଇଥାଏ।
ନିମ୍ବ ପାଣି ଶରୀରର କଷ୍ଟକୁ ଲାଘବ କରିବା ସହ ତ୍ୱଚାକୁ ପୋଷଣ କରେ। ଏହା ଆଣ୍ଟି ଏଜିଂ ଏଜେଣ୍ଟ ପରି କାମ କରି ତ୍ୱଚାରେ ପ୍ରାକୃତିକ ସୌନ୍ଦର୍ଯ୍ୟ ଫେରାଇ ଆଣିଥାଏ।