ପାରାଦୀପ,୧୬।୧୦(ସ୍ବ.ପ୍ର.): ପାରାଦୀପ ବନ୍ଦରରେ ୩୦ ବର୍ଷିୟା ବିଓଟି (ବିଲ୍ଡ ଅପରେଟ୍ ଟ୍ରାନ୍ସପୋର୍ଟ) ବର୍ଥ କାମ ପାଇଥିବା ଜେଏସ୍ଡବ୍ଲ୍ୟୁ ପାରାଦୀପ ଟର୍ମିନାଲ ପ୍ରାଇଭେଟ୍ ଲିମିଟେଡ୍ ଅଫିସ ଆଗରେ ମଙ୍ଗଳବାର ସୋବୁ (ଷ୍ଟୁଡେଣ୍ଟ ଅର୍ଗାନାଇଜେଶନ ଅଫ୍ ବିଜୁ ପଟ୍ଟନାୟକ ୟୁନିଭର୍ସିଟି) ପକ୍ଷରୁ ଦିନିକିଆ ସତ୍ୟାଗ୍ରହ କରାଯାଇଛି। ଜେଏସ୍ଡବ୍ଲ୍ୟୁ ପ୍ରକଳ୍ପରେ ସ୍ଥାନୀୟ ଲୋକଙ୍କୁ ନିଯୁକ୍ତି ପ୍ରଦାନ ଦାବିରେ ଏହି ସତ୍ୟାଗ୍ରହ କରାଯାଇଥିଲା। ସୋବୁ ନେତୃତ୍ୱରେ ୫୫୨ ଜଣ ଉଚ୍ଚଶିକ୍ଷିତ ବେରୋଜଗାର ଯୁବକ ଏଥିରେ ସାମିଲ ହୋଇଥିଲେ। ସେମାନେ ଦର୍ଶାଇଛନ୍ତି ଯେ, ସମ୍ପୃକ୍ତ କମ୍ପାନୀ ବାହାର ରାଜ୍ୟର ସଦସ୍ୟଙ୍କୁ ନିଯୁକ୍ତି ଦେଉଛି। ଏଥିପାଇଁ ଶିଳ୍ପ ପ୍ରଭାବିତ ସ୍ଥାନୀୟ ଯୁବତୀ ଯୁବକମାନେ ବେକାର ହୋଇ ବୁଲୁଛନ୍ତି। ଦିନତମାମ ଧାରଣା ଚାଲିବା ପରେ ପ୍ରଶାସନ ପକ୍ଷରୁ ସ୍ଥାନୀୟ ଅତିରିକ୍ତ ଜିଲାପାଳଙ୍କ କାର୍ଯ୍ୟାଳୟଠାରେ ଏନେଇ ସେମାନଙ୍କ ସହ ଆଲୋଚନା କରାଯାଇଥିଲା। ଏଥିରେ ଏଡିଏମ୍ କାହ୍ନୁଚରଣ ଧିର, ଏଏସ୍ପି ବିଷ୍ଣୁଚରଣ ମିଶ୍ର, ଥାନା ଅଧିକାରୀ ରଜନୀକାନ୍ତ ସାମଲ, କମ୍ପାନୀ ପ୍ରତିନିଧି ଆକାଶ ମଜୁମଦାର, ରଜତ ନାୟକ, ସୋବୁ ସଙ୍ଗଠନର କର୍ମକର୍ତ୍ତା ପ୍ରତାପ ମିଶ୍ର, ଭୁବନମୋହନ ଜେନା, ମିଟୁ ସ୍ବାଇଁ, ଶାରଦା ବେହେରା ପ୍ରମୁଖ ଉପସ୍ଥିତ ଥିଲେ। ଉକ୍ତ ପ୍ରକଳ୍ପରେ ଆଗକୁ ଯେଉଁ ନିଯୁକ୍ତି ସୃଷ୍ଟି ହେବ, ସେ ସବୁରେ ସ୍ଥାନୀୟ ଅଞ୍ଚଳର ଯୁବକ ରହିବେ ବୋଲି କମ୍ପାନୀ କର୍ତ୍ତୃପକ୍ଷ ପ୍ରତିଶ୍ରୁତି ଦେବା ପରେ ଧାରଣା ପ୍ରତ୍ୟାହୃତ ହୋଇଥିଲା।