ଝାରସୁଗୁଡ଼ା ଏକ ଶିଳ୍ପ ବହୁଳ ଜିଲା। ଏଠାରେ ପ୍ରାୟ ୧୧ଟି ବୃହତ୍ ଓ ମଧ୍ୟମ ଶ୍ରେଣୀର ଶିଳ୍ପାନୁଷ୍ଠାନ ରହିଛି। ମାତ୍ର ସରକାରଙ୍କ କୋହଳ ନୀତି ଯୋଗୁ ଅଞ୍ଚଳର ବେକାର ଯୁବତୀ ଯୁବକଙ୍କ ନିଯୁକ୍ତି ପାଇଁ ବାଟ ଫିଟି ପାରୁନାହିଁ। ଏବେ ମଧ୍ୟ ଜିଲାର ଶହ ଶହ ଶିକ୍ଷିତ ଯୁବତୀ ଯୁବକ ନିଯୁକ୍ତି ଅନ୍ବେଷଣରେ ଗୋଟିଏ ଶିଳ୍ପାନୁଷ୍ଠାନରୁ ଆଉ ଗୋଟିଏ ଶିଳ୍ପାନୁଷ୍ଠାନକୁ ବାୟୋଡ଼ାଟା ଧରି ଘୂରି ବୁଲୁଛନ୍ତି। ବହୁ ଶିକ୍ଷିତ ଯୁବତୀ ଯୁବକ ଜିଲାରେ ଚାକିରି ଆଶା ଛାଡ଼ି ଦେଇଛନ୍ତି। ଏମାନଙ୍କ ମଧ୍ୟରୁ ଅନେକ ନିଜର ଭବିଷ୍ୟତ ତଥା ପରିବାର ପେଟପାଟଣା ପାଇଁ ଅନ୍ୟ ରାଜ୍ୟକୁ ଯାଇ ଛୋଟ ଛୋଟ ଶିଳ୍ପ ସଂସ୍ଥାରେ ଚାକିରି କରିବା ପାଇଁ ବାଧ୍ୟ ହେଉଛନ୍ତି। ବହୁ ଅଶିକ୍ଷିତ ଯୁବକ ଏବେ ମଧ୍ୟ ବିଭିନ୍ନ ଠିକା ସଂସ୍ଥାରେ କାମ ପାଇବା ପାଇଁ ସଂଘର୍ଷ କରୁଛନ୍ତି। ଗତ ସେପ୍ଟେମ୍ବର ମାସ ସୁଦ୍ଧା ନିଯୁକ୍ତି ଆଶା ରଖି ୧୮ ହଜାର ଯୁବତୀ ଯୁବକ ଜିଲା କର୍ମ ନିୟୋଜନ କାର୍ଯ୍ୟାଳୟରେ ନାମ ପଞ୍ଜୀକରଣ କରିଛନ୍ତି। ହେଲେ ସେମାନଙ୍କୁ କୌଣସି ସ୍ଥାନରେ ଚାକିରି ମିଳୁନି। କର୍ମ ନିୟୋଜନ ବିଭାଗ ପକ୍ଷରୁ ବର୍ଷକୁ ଥରେ ଦି ଥର ନିଯୁକ୍ତି ମେଳାର ଆୟୋଜନ କରାଯାଉଛି। ଅନେକ ଶିଳ୍ପ ସଂସ୍ଥା ଏହି ମେଳାକୁ ଉପେକ୍ଷା କରି ଚାଲିଛନ୍ତି। ଯଦିଓ କିଛି ସଂସ୍ଥାର ପ୍ରତିନିଧି ମେଳାକୁ ଆସୁଛନ୍ତି ସେମାନେ ପ୍ରାର୍ଥୀମାନଙ୍କ ଅଭିିଜ୍ଞତା ନ ଥିବା କହି କିମ୍ବା ଶିଳ୍ପସଂସ୍ଥାରେ ଆବଶ୍ୟକତା ନ ଥିବା ଦର୍ଶାଇ ଯୁବତୀ ଯୁବକମାନଙ୍କୁ ସ୍ଥାୟୀ ନିଯୁକ୍ତି ଦେବା ପାଇଁ ଅନିଚ୍ଛା ପ୍ରକାଶ କରୁଛନ୍ତି। କେବଳ କେତେଜଣ ଯୁବକଙ୍କୁ ଠିକାସଂସ୍ଥାରେ ନିଯୁକ୍ତି ଦେଇ ଶିଳ୍ପସଂସ୍ଥାଗୁଡ଼ିକ ବାହାବା ସାଉଁଟି ଚାଲିଛନ୍ତି। ବାସ୍ତବରେ ଅଧିକାଂଶ ଶିଳ୍ପାନୁଷ୍ଠାନରେ ନେତା ଓ ଅଧିକାରୀଙ୍କ ସଲାସୁତରାରେ ଭିତିରି ନିଯୁକ୍ତି ଚାଲିଛି। ମାତ୍ର ଏ କ୍ଷେତ୍ରରେ ପ୍ରଶାସନ ଓ ସରକାର ନୀରବ ରହିଛନ୍ତି। ସବୁଠାରୁ ବଡ଼ ସମସ୍ୟା ଜିଲାରେ ନିଯୁକ୍ତି ଆଶାଥିବା ତଥା ବନ୍ଦ ପଡ଼ିଥିବା ଶିଳ୍ପାନୁଷ୍ଠାନଗୁଡ଼ିକର ପୁନରୁଦ୍ଧାର ହୋଇପାରୁନି। ଉଦାହରଣ ସ୍ବରୂପ ବ୍ରଜରାଜନଗରର ସର୍ବ ପୁରାତନ ଶିଳ୍ପାନୁଷ୍ଠାନ ଓରିଏଣ୍ଟ କାଗଜ କଳ ୧୯୯୯ ମସିହାରୁ ବନ୍ଦ ପଡିଛି ା ମରାକୁଟା ଗଁା ନିକଟରେ ଥିବା ଏମ୍ଏସ୍ପି ମେଟାଲିକ ପ୍ଲାଣ୍ଟ ୨୦୧୬ ଫେବୃୟାରୀରୁ ଲକ୍ଆଉଟ ହେଲା ପରେ ଶତାଧିକ ଯୁବକ କର୍ମସଂସ୍ଥାନ ହରାଇଛନ୍ତି। ଜିଲାର ସାହାଜବାହାଲଠାରେ ସ୍ଥାପିତ ଶିଳ୍ପସଂସ୍ଥା ଇଣ୍ଡବରାଥ ଏନର୍ଜି ଉତ୍କଳ ଲିମିଟେଡ ମଧ୍ୟ ନିର୍ମାଣାଧୀନ ଅବସ୍ଥାରେ ଗତ ୩ ବର୍ଷ ପୂର୍ବରୁ ବନ୍ଦ ହୋଇରହିଛି। ସରକାରଙ୍କ ନିଯୁକ୍ତି ନୀତିର କାର୍ଯ୍ୟାନ୍ବୟନ ଅଭାବ ଯୋଗୁ ମହାନଦୀ କୋଇଲା ଖଣି ଅଧୀନ ଇବ୍ କୋଇଲା କ୍ଷେତ୍ର ଓ ଲଖନପୁର କୋଇଲା କ୍ଷେତ୍ରରେ ମଧ୍ୟ ସ୍ଥାନୀୟ ଯୁବତୀ ଯୁବକଙ୍କ ପାଇଁ ନିଯୁକ୍ତି ସୁଯୋଗ ସଙ୍କୁଚିତ ହୋଇଯାଇଛି।